Majma uz Zawaid Wa Manba ul Fawaid

9491 - وَعَنْ أَبِي الدَّرْدَاءِ قَالَ: «قَالَ رَسُولُ اللَّهِ - صَلَّى اللَّهُ عَلَيْهِ وَسَلَّمَ -: " مَنْ جَلَسَ عَلَى الْبَحْرِ احْتِسَابًا وَنِيَّةً احْتِيَاطًا لِلْمُسْلِمِينَ كَتَبَ اللَّهُ لَهُ بِكُلِّ قَطْرَةٍ فِي الْبَحْرِ حَسَنَةً» ". رَوَاهُ الطَّبَرَانِيُّ وَفِيهِ يُوسُفُ بْنُ السَّفْرِ وَهُوَ مَتْرُوكٌ وَالْإِسْنَادُ مُنْقَطِعٌ.

حضرت ابو درداء رضی اللہ عنہ روایت کرتے ہیں : نبی اکرم صلی اللہ علیہ و آلہ وسلم نے ارشاد فرمایا: " جو شخص ثواب کی امید رکھتے ہوئے نیک نیتی کے ساتھ مسلمانوں کی حفاظت کے لئے سمندر پر بیٹھا رہتا ہے اللہ تعالیٰ سمندر کے ہر قطرے کے عوض میں اس کے لئے ایک نیکی نوٹ کرتا ہے "۔ یہ روایت امام طبرانی نے نقل کی ہے ۔ اس کی سند میں ایک راوی یوسف بن سفر ہے اور وہ متروک ہے اور اس کی سند منقطع ہے ۔

أَبِي الدَّرْدَاءِ،

9492 - وَعَنْ أَبِي عَطِيَّةَ «أَنَّ رَسُولَ اللَّهِ - صَلَّى اللَّهُ عَلَيْهِ وَسَلَّمَ - جَلَسَ فَحَدَّثَ أَنَّ رَجُلًا تُوُفِّيَ فَقَالَ: هَلْ رَآهُ أَحَدٌ مِنْكُمْ عَلَى عَمَلٍ مِنْ أَعْمَالِ الْخَيْرِ؟ فَقَالَ رَجُلٌ: نَعَمْ حَرَسْتُ مَعَهُ لَيْلَةً فِي سَبِيلِ اللَّهِ فَقَامَ رَسُولُ اللَّهِ - صَلَّى اللَّهُ عَلَيْهِ وَسَلَّمَ - وَمَنْ مَعَهُ فَصَلَّى عَلَيْهِ فَلَمَّا أُدْخِلَ الْقَبْرَ حَثَا رَسُولُ اللَّهِ - صَلَّى اللَّهُ عَلَيْهِ وَسَلَّمَ - بِيَدِهِ مِنَ التُّرَابِ ثُمَّ قَالَ: " إِنَّ أَصْحَابَكَ يَظُنُّونَ أَنَّكَ مِنْ أَهْلِ النَّارِ وَأَنَا أَشْهَدُ أَنَّكَ مِنْ أَهْلِ الْجَنَّةِ ". ثُمَّ قَالَ رَسُولُ اللَّهِ - صَلَّى اللَّهُ عَلَيْهِ وَسَلَّمَ - لِعُمَرَ بْنِ الْخَطَّابِ: " لَا تَسْأَلْ عَنْ أَعْمَالِ النَّاسِ وَلَكِنْ سَلْ عَنِ الْفِطْرَةِ» ". رَوَاهُ الطَّبَرَانِيُّ عَنْ شَيْخِهِ إِبْرَاهِيمَ بْنِ مُحَمَّدِ بْنِ عِرْقٍ الْحِمْصِيِّ ضَعَّفَهُ الذَّهَبِيُّ.

حضرت ابو عطیہ رضی اللہ عنہ بیان کرتے ہیں : نبی اکرم صلی اللہ علیہ و آلہ وسلم تشریف فرما ہوئے آپ صلی اللہ علیہ و آلہ وسلم نے یہ بات بیان کی ایک شخص کا انتقال ہو گیا آپ صلی اللہ علیہ و آلہ وسلم نے دریافت کیا : کیا تم میں سے کسی ایک نے اس کو کوئی نیکی کا کام کرتے ہوئے دیکھا ہے ؟ ایک شخص نے عرض کی : جی ہاں ۔ میں نے اس کے ساتھ اللہ کی راہ میں ایک رات پہرا دیا ہے ، تو نبی اکرم صلی اللہ علیہ و آلہ وسلم اور اپ صلی اللہ علیہ و آلہ وسلم کے ساتھی کھڑے ہوئے آپ صلی اللہ علیہ و آلہ وسلم نے اس شخص کی نماز جنازہ ادا کی جب اس شخص کو قبر میں اتار دیا گیا تو نبی اکرم صلی اللہ علیہ و آلہ وسلم نے اپنے دست مبارک کے ذریعے اس کی قبر پر مٹی ڈالی اور پھر آپ صلی اللہ علیہ و آلہ وسلم نے ارشاد فرمایا: تمہارے ساتھی یہ گمان کر رہے تھے کہ تم اہل جہنم میں سے ہو اور میں اس بات کی گواہی دیتا ہوں کہ تم اہل جنت میں سے ہو، پھر نبی اکرم صلی اللہ علیہ و آلہ وسلم نے حضرت عمر بن خطاب رضی اللہ عنہ سے فرمایا: تم لوگوں کے اعمال کے بارے میں دریافت نہ کرو بلکہ تم فطرت کے بارے میں دریافت کرو۔ یہ روایت امام طبرانی نے اپنے استاد ابراہیم بن محمد بن عرق حمصی سے نقل کی ہے جسے امام ذہبی نے ضعیف قرار دیا ہے ۔

أَبِي عَطِيَّةَ

9493 - عَنْ قُرَّةَ بْنِ إِيَاسٍ قَالَ: «قَالَ رَسُولُ اللَّهِ - صَلَّى اللَّهُ عَلَيْهِ وَسَلَّمَ -: " مَنْ كَبَّرَ تَكْبِيرَةً عَلَى سَاحِلِ الْبَحْرِ عِنْدَ غُرُوبِ الشَّمْسِ رَافِعًا صَوْتَهُ أَعْطَاهُ اللَّهُ مِنَ الْأَجْرِ بِعَدَدِ كُلِّ قَطْرَةٍ فِي الْبَحْرِ عَشْرَ حَسَنَاتٍ وَمَحَا عَنْهُ عَشْرَ سَيِّئَاتٍ وَرَفَعَ لَهُ عَشْرَ دَرَجَاتٍ مَا بَيْنَ الدَّرَجَتَيْنِ مَسِيرَةَ مِائَةِ عَامٍ بِالْفَرَسِ الْمُسْرِعِ» ". رَوَاهُ الطَّبَرَانِيُّ وَفِيهِ خَلِيفَةُ بْنُ حُمَيْدٍ قَالَ الذَّهَبِيُّ: فِيهِ جُهَّالٌ وَهَذَا خَبَرٌ سَاقِطٌ.

حضرت قرہ بن ایاس رضی اللہ عنہ روایت کرتے ہیں : نبی اکرم صلی اللہ علیہ و آلہ وسلم نے ارشاد فرمایا: " جو شخص سمندر کے ساحل پر سورج غروب ہونے کے وقت بلند آواز میں ایک مرتبہ تکبیر کہتا ہے اللہ تعالیٰ اسے اتنا اجر عطا کرتا ہے کہ سمند ر کے ہر ایک قطرے کے عوض میں دس نیکیاں ملتی ہیں اور اس کے دس گناہ مٹا دیتا ہے اور اس کے دس درجات بلند کرتا ہے جن میں سے ہر دو درجوں کے درمیان تیز رفتار گھوڑے کی طے کی ہوئی ایک سو سال کی مسافت جتنا فاصلہ ہوتا ہے "۔ یہ روایت امام طبرانی نے نقل کی ہے ۔ اس کی سند میں ایک راوی خلیفہ بن حمید ہے ۔ امام ذہبی کہتے ہیں : اس میں مجہول راوی پائے جاتے ہیں اور یہ روایت ساقط ہے ۔

قُرَّة بن إِيَاس،

9494 - عَنْ عَبْدِ اللَّهِ بْنِ عَمْرٍو «أَنَّ رَسُولَ اللَّهِ - صَلَّى اللَّهُ عَلَيْهِ وَسَلَّمَ - قَالَ: " رِبَاطُ يَوْمٍ خَيْرٌ مِنْ صِيَامِ شَهْرٍ وَقِيَامِهِ» ". رَوَاهُ أَحْمَدُ، وَفِيهِ ابْنُ لَهِيعَةَ، وَحَدِيثُهُ حَسَنٌ، وَفِيهِ ضَعْفٌ.

حضرت عبداللہ بن عمر رضی اللہ عنہ نبی اکرم صلی اللہ علیہ و آلہ وسلم کا یہ فرمان نقل کرتے ہیں : " ایک دن کی پہریداری ایک مہینے کے نفلی روزوں اور نوافل سے بہتر ہے "۔ یہ روایت امام احمد نے نقل کی ہے اس کی سند میں ایک راوی ابن لہیعہ ہے اور اس کی نقل کردہ حدیث حسن ہے اور اس میں ضعف پایا جاتا ہے ۔

عَبْدِ اللہِ بْنِ عَمْرٍو

9495 - وَعَنْ عُقْبَةَ بْنِ عَامِرٍ قَالَ: «قَالَ رَسُولُ اللَّهِ - صَلَّى اللَّهُ عَلَيْهِ وَسَلَّمَ -: " كُلُّ مَيِّتٍ يُخْتَمُ عَلَى عَمَلِهِ إِلَّا الْمُرَابِطَ فِي سَبِيلِ اللَّهِ فَإِنَّهُ يَجْرِي عَلَيْهِ أَجْرُ عَمَلِهِ حَتَّى يَبْعَثَهُ اللَّهُ ". وَفِي رِوَايَةٍ: " وَيُؤَمَّنُ مِنْ فَتَّانِ الْقَبْرِ» ". رَوَاهُ أَحْمَدُ وَالطَّبَرَانِيُّ، وَفِيهِ ابْنُ لَهِيعَةَ، وَحَدِيثُهُ حَسَنٌ.

حضرت عقبہ بن عامر رضی اللہ عنہ روایت کرتے ہیں : نبی اکرم صلی اللہ علیہ و آلہ وسلم نے ارشاد فرمایا: " ہر میت کے عمل پر مہر لگا دی جاتی ہے البتہ اللہ کی راہ میں پہرا دینے والے کا معاملہ مختلف ہے ، کیونکہ اس کے عمل کا اجر اس کے لئے اس وقت تک جاری رہتا ہے جب تک اللہ تعالیٰ اسے دوبارہ زندہ نہیں کرے گا"۔ ایک روایت میں یہ الفاظ ہیں : " اور اس کی قبر کو آزمائش سے محفوظ رکھتا جاتا ہے "۔ یہ روایت امام احمد اور امام طبرانی نے نقل کی ہے ۔ اس کی سند میں ایک راوی ابن لہیعہ ہے اور اس کی نقل کردہ حدیث حسن ہے ۔

عُقْبَۃَ بْنِ عَامِرٍ

9496 - وَعَنْ أُمِّ الدَّرْدَاءِ - تَرْفَعُ الْحَدِيثَ - قَالَ: " «مَنْ رَابَطَ فِي شَيْءٍ مِنْ سَوَاحِلِ الْمُسْلِمِينَ ثَلَاثَةَ أَيَّامٍ أَجْزَأَتْ عَنْهُ رِبَاطُ سَنَةٍ» ". رَوَاهُ أَحْمَدُ وَالطَّبَرَانِيُّ مِنْ رِوَايَةِ إِسْمَاعِيلَ بْنِ عَيَّاشٍ عَنِ الْمَدَنِيِّينَ، وَبَقِيَّةُ رِجَالِهِ ثِقَاتٌ.

سیدہ ام درداء رضی اللہ عنہا مرفوع حدیث کے طور پر یہ بات نقل کرتی ہیں : ( نبی اکرم صلی اللہ علیہ و آلہ وسلم نے ارشاد فرمایا: ) " جو شخص مسلمانوں کی حفاظت کے لئے ایک دن پہرا دیتا ہے اس کی طرف سے ایک سال کا پہرا کفایت کر جاتا ہے ( یعنی اسے ایک سال کے پہرے کا ثواب ملتا ہے ) "۔ یہ روایت امام احمد اور امام طبرانی نے اسماعیل بن عیاش کے حوالے سے اہل مدینہ سے نقل کر دہ روایت کے طور پر نقل کی ہے اور روایت کے بقیہ رجال ثقہ ہیں۔

أُمِّ الدَّرْدَاءِ تَرْفَعُ الْحَدِيثَ

9497 - وَعَنْ أَنَسِ بْنِ مَالِكٍ «عَنْ رَسُولِ اللَّهِ - صَلَّى اللَّهُ عَلَيْهِ وَسَلَّمَ - أَنَّهُ قَالَ: " مَنْ حَرَسَ لَيْلَةً عَلَى سَاحِلِ الْبَحْرِ كَانَ أَفْضَلَ مِنْ عِبَادَتِهِ فِي أَهْلِهِ أَلْفَ سَنَةٍ [السَّنَةُ ثَلَاثُ مِائَةٍ وَسِتُّونَ يَوْمًا، وَكُلُّ يَوْمٍ أَلْفُ سَنَةٍ]». قُلْتُ: رَوَاهُ ابْنُ مَاجَهْ خَلَا قَوْلَهُ: " عَلَى سَاحِلِ الْبَحْرِ ". رَوَاهُ أَبُو يَعْلَى، وَفِيهِ سَعِيدُ بْنُ خَالِدِ بْنِ أَبِي طَوِيلٍ الْقُرَشِيُّ، وَهُوَ ضَعِيفٌ، وَإِنْ كَانَ ابْنُ حِبَّانَ وَثَّقَهُ فَقَدْ قَالَ فِي الضُّعَفَاءِ لَا يَجُوزُ الِاحْتِجَاجُ بِهِ.

حضرت انس بن مالک رضی اللہ عنہ نبی اکرم صلی اللہ علیہ و آلہ وسلم کا یہ فرمان نقل کرتے ہیں : " جو شخص سمندر کے ساحل پر ایک رات پہرا دیتا ہے ، تو یہ اس شخص کے اپنے گھر میں ایک ہزار سال تک عبادت کرنے سے زیادہ فضیلت رکھتا ہے ( وہ سال ایسا ہوگا) کہ ایک سال تین سو ساٹھ دن کا ہو اور ہر دن ایک ہزار سال کا ہو"۔ ( علامہ ہیثمی فرماتے ہیں : ) میں یہ کہتا ہوں : یہ روایت امام ابن ماجہ نے نقل کی ہے تاہم انہوں نے یہ الفاظ نقل نہیں کئے ہیں : " سمندر کے ساحل پر"۔ یہ روایت امام ابو یعلیٰ نے نقل کی ہے ۔ اس کی سند میں ایک راوی سعید بن خالد ابو طویل قرشی ہے اور وہ ضعیف ہے اگرچہ امام ابن حبان نے اسے ثقہ قرار دیا ہے ، لیکن انہوں نے کتاب الضعفاء میں یہ بات بیان کی ہے ۔ اس سے استدلال کرنا جائز نہیں ہے ۔

اَنَسِ بْنِ مَالِکٍ،

9498 - وَعَنْ عُثْمَانَ بْنِ عَفَّانَ وَأَبِي هُرَيْرَةَ «عَنِ النَّبِيِّ - صَلَّى اللَّهُ عَلَيْهِ وَسَلَّمَ - قَالَ: " مَنْ مَاتَ مُرَابِطًا فِي سَبِيلِ اللَّهِ أُجْرِيَ عَلَيْهِ عَمَلُ الصَّائِمِ وَأُجْرِيَ عَلَيْهِ رِزْقُهُ وَأَمِنَ مِنَ الْفَتَّانِ وَيَبْعَثُهُ اللَّهُ يَوْمَ الْقِيَامَةِ آمِنًا مِنَ الْفَزَعِ الْأَكْبَرِ» ". قُلْتُ: حَدِيثُ أَبِي هُرَيْرَةَ رَوَاهُ ابْنُ مَاجَهْ. رَوَاهُ الْبَزَّارُ وَفِيهِ عَبْدُ اللَّهِ بْنُ صَالِحٍ وَثَّقَهُ عَبْدُ الْمَلِكِ بْنُ شُعَيْبٍ فَقَالَ: ثِقَةٌ مَأْمُونٌ، وَضَعَّفَهُ غَيْرُهُ، وَبَقِيَّةُ رِجَالِهِ ثِقَاتٌ.

حضرت عثمان رضی اللہ عنہ اور حضرت ابو ہریرہ رضی اللہ عنہ نبی اکرم صلی اللہ علیہ و آلہ وسلم کا یہ فرمان نقل کرتے ہیں : " جو شخص اللہ کی راہ میں پہرا دینے کے دوران مر جائے تو روزے دار کا عمل اس کے لئے جاری رہتا ہے اور اس کا رزق اس کے لئے جاری رہتا ہے اور وہ (قبر کی ) آزمائش سے محفوظ ہوگا"۔ ( علامہ ہیثمی فرماتے ہیں : ) میں کہ کہتا ہوں ۔ حضرت ابوہریرہ رضی اللہ عنہ سے منقول حدیث کو امام ابن ماجہ نے روایت کیا ہے ۔ یہ روایت امام بزار نے نقل کی ہے ۔ اس کی سند میں ایک راوی عبداللہ بن صالح ہے جسے عبداللہ بن شعیب نے ثقہ قرار دیا ہے وہ کہتے ہیں : یہ ثقہ اور مامون ہے دیگر حضرات نے اسے ضعیف کہا ہے ۔ اس روایت کے بقیہ رجال ثقہ ہیں۔

عُثْمَانَ بْنِ عَفَّانَ وَأَبِي هُرَيْرَةَ

9499 - وَعَنْ أَنَسِ بْنِ مَالِكٍ قَالَ: «سُئِلَ رَسُولُ اللَّهِ - صَلَّى اللَّهُ عَلَيْهِ وَسَلَّمَ - عَنْ أَجْرِ الرِّبَاطِ فَقَالَ: " مَنْ رَابَطَ يَوْمًا حَرَسًا مِنْ وَرَاءِ الْمُسْلِمِينَ كَانَ لَهُ أَجْرُ مَنْ خَلْفَهُ مِمَّنْ صَامَ وَصَلَّى» ". رَوَاهُ الطَّبَرَانِيُّ فِي الْأَوْسَطِ وَرِجَالُهُ ثِقَاتٌ.

حضرت انس بن مالک رضی اللہ عنہ بیان کرتے ہیں : نبی اکرم صلی اللہ علیہ و آلہ وسلم سے پہریداری کے اجر کے بارے میں دریافت کیا گیا : تو آپ صلی اللہ علیہ و آلہ وسلم نے ارشاد فرمایا: " جو شخص مسلمانوں سے پرے ایک دن حفاظت کے لئے پہرا دیتا ہے اسے اپنے پیچھے موجود روزہ دار اور نماز پڑھنے والوں کی مانند اجر ملتا ہے "۔ یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں۔

أَجْرِ الرِّبَاطِ، ← سُئِلَ رَسُولُ اللَّهِ ← اَنَسِ بْنِ مَالِکٍ،

9500 - وَعَنْ جَابِرٍ قَالَ: «سَمِعْتُ رَسُولَ اللَّهِ - صَلَّى اللَّهُ عَلَيْهِ وَسَلَّمَ - يَقُولُ: " مَنْ رَابَطَ يَوْمًا فِي سَبِيلِ اللَّهِ جَعَلَ اللَّهُ بَيْنَهُ وَبَيْنَ النَّارِ سَبْعَةَ خَنَادِقَ كُلُّ خَنْدَقٍ كَسَبْعِ سَمَاوَاتٍ وَسَبْعِ أَرَضِينَ» ". رَوَاهُ الطَّبَرَانِيُّ فِي الْأَوْسَطِ وَفِيهِ عِيسَى بْنُ سُلَيْمَانَ أَبُو طَيْبَةَ وَهُوَ ضَعِيفٌ.

حضرت جابر رضی اللہ عنہ بیان کرتے ہیں: میں نے نبی اکرم صلی اللہ علیہ و آلہ وسلم کو یہ ارشاد فرماتے ہوئے سنا ہے " جو شخص اللہ کی راہ میں ایک دن پہرا دیتا ہے اللہ تعالیٰ اس شخص اور جہنم کے درمیان سات خندقیں حائل کر دے گا جن میں سے ہر ایک خندق سات آسمانوں اور سات زمینوں کی مانند ہوگی"۔ یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عیسیٰ بن سلیمان ابو طیبہ ہے اور وہ ضعیف ہے ۔

رَسُولِ اللَّهِ ← جَابِرٍ

9501 - وَعَنْ أَبِي أُمَامَةَ «أَنَّ النَّبِيَّ - صَلَّى اللَّهُ عَلَيْهِ وَسَلَّمَ - قَالَ: " مَنْ رَابَطَ فِي سَبِيلِ اللَّهِ أَمَّنَهُ اللَّهُ مِنْ فِتْنَةِ الْقَبْرِ» ". رَوَاهُ الطَّبَرَانِيُّ فِي الْكَبِيرِ وَالْأَوْسَطِ.

حضرت ابو امامہ رضی اللہ عنہ نبی اکرم صلی اللہ علیہ و آلہ وسلم کا یہ فرمان نقل کرتے ہیں : " جو شخص اللہ کی راہ میں پہرا دیتا ہے اللہ تعالیٰ اسے قبر کی آزمائش سے محفوظ رکھتا ہے "۔ یہ روایت امام طبرانی نے معجم کبیر اور معجم اوسط میں نقل کی ہے ۔

اَبِیْ اُمَامَۃَ،

9502 - وَعَنْ أَبِي سَعِيدٍ الْخُدْرِيِّ «أَنَّ رَسُولَ اللَّهِ - صَلَّى اللَّهُ عَلَيْهِ وَسَلَّمَ - قَالَ: " مَنْ صَامَ يَوْمًا فِي سَبِيلِ اللَّهِ بَاعَدَهُ اللَّهُ مِنَ النَّارِ سَبْعِينَ خَرِيفًا وَمَنْ تُوُفِّيَ مُرَابِطًا وُقِيَ فِتْنَةَ الْقَبْرِ وَجَرَى عَلَيْهِ رِزْقُهُ» ". قُلْتُ: رَوَى النَّسَائِيُّ وَابْنُ مَاجَهْ مِنْهُ الصَّوْمَ فَقَطْ. رَوَاهُ الطَّبَرَانِيُّ فِي الْأَوْسَطِ وَفِيهِ رِشْدِينُ بْنُ سَعْدٍ وَهُوَ ضَعِيفٌ وَقَدْ تَقَوَّى بِالْمُتَابَعَاتِ.

حضرت ابو سعید خدری رضی اللہ عنہ نبی اکرم صلی اللہ علیہ و آلہ وسلم کا یہ فرمان نقل کرتے ہیں : " جو شخص اللہ کی راہ میں ایک دن روزہ رکھتا ہے اللہ تعالیٰ اسے جہنم سے ستر برس کی مسافت جتنا دور کر دیتا ہے اور جو شخص پہرا دینے کے دوران انتقال کر جاتا ہے اسے قبر کی آزمائش سے بچا لیا جاتا ہے اور اس کا رزق اس پر جاری ہوتا ہے "۔ ( علامہ ہیثمی فرماتے ہیں : ) میں یہ کہتا ہوں : امام نسائی اور امام ابن ماجہ نے اس روایت میں سے صرف روزے سے متعلق حصہ نقل کیا ہے ۔ یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی رشدین بن سعد ہے اور وہ ضعیف ہے یہ روایت متابعات کے ذریعے قوی ہو جاتی ہے ۔

أَبِي سَعِيدٍ الْخُدْرِيِّ،