Al Muajam Al Kabir Tibrani

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جب میں اپنے بندہ کی دو محبوب چیزیں (آنکھیں ) لے لوں اور وہ صبر کرے اور ثواب کی نیت رکھے تو اس کی جزاء جنت ہے۔

حضرت ابو ہریرہ رضی اللہ تعالیٰ عنہ فرماتے ہیں: رسول کریم صلی اللہ علیہ وآلہ وسلم منبر پر تشریف لائے۔ پس جب سیڑھی پر پاؤں رکھا تو کہا: آمین ۔ دوسری پر چڑھے تو کہا: آمین۔ تیسری پر چڑھے تو کہا: آمین۔ فرمایا: میرے پاس جبریل علیہ السلام آئے اور کہا: جس نے رمضان کا مبارک مہینہ پایا اور اس حال میں فوت ہوا کہ ااس کی بخشش نہیں ہوئی تو اللہ تعالیٰ اسے اپنی رحمت سے دور کرے۔ میں نے کہا: آمین۔ کہا: اور جس نے والدین کو یا ان میں سے ایک کو پایا۔ اور اس حال میں فوت ہوا کہ اس کی بخشش نہیں ہوئی تو اللہ اسے اپنی رحمت سے دور کرے۔ میں نے کہا: آمین ۔ کہا: جس آدمی کے پاس میرا ذکر کیا گیا اور اس نے مجھ پر درود نہیں پڑھا تو اللہ اسے اپنی رحمت سے دور کر دے۔ میں نے کہا: آمین۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: چھ اعمال میں جلدی کرو: دجال' دھواں ' زمین سے نکلنے والا جانور ' سورج کا مغرب کی جانب سے طلوع ہونا' امر عامہ اور تم میں سے خاص کو۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: نماز کے بعد دوسری نماز کے انتظار میں رہنا ' یہ زیادہ افضل ہے' اللہ کی راہ میں گھوڑا تیار رکھنے سے ' فرشتے اس کےلئے دعا کرتے رہتے ہیں'جب تک آدمی بے وضو نہ ہو یا نہ اُٹھے ' یہ بہت بڑی اللہ عزوجل کی راہ میں نگہبانی کرنا ہے۔

حضرت معاویہ بن قرہ اپنے والد سے روایت کرتے ہیں کہ میں اپنے والد کے ساتھ حضور صلی اللہ علیہ وآلہ وسلم کی طرف گیا' آپ صلی اللہ علیہ وآلہ وسلم نے تہبند باندھا ہوا تھا' میرے والد آپ کے پیچھے ہوئے اور اپنا ہاتھ آپ صلی اللہ علیہ وآلہ وسلم کی مہر نبوت مبارک پر رکھا۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: مسلمان کو قتل کرنا حرج ہے' یہ آپ صلی اللہ علیہ وآلہ وسلم نے تین مرتبہ فرمایا۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جب نماز کےلئے اقامت ہو جائے تو صرف فرض نماز ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے ستاروں کے دیکھنے سے منع فرمایا (یعنی ستاروں کے ذریعے اندازہ لگانے سے) ۔

حضرت ابو ہریرہ رضی اللہ تعالیٰ عنہ فرماتے ہیں : نبی کریم صلی اللہ علیہ وآلہ وسلم کے پاس قبائل کا تذکرہ ہوا۔ لوگوں نے آپ سے بنو عامر کے بارے میں پوچھا تو فرمایا: خوبصورت رنگ والا اونٹ درخت کے اطراف سے کھاتا ہے۔ لوگوں نے آپ سے بنو ہوازن کے بارے میں پوچھا تو فرمایا: کلی اپنے پانی کا اتباع کرتی ہے۔ لوگوں نے آپ سے بنو تمیم کے بارے میں پوچھا تو فرمایا: ثابت قدم ، پختہ عقلوں (رائے) والے، بڑے سروں والے آخری زمانے میں دجال پر بہت سخت ہوں گے، سرخ ٹیلہ ہے، جو اس سے ٹکرائے گا، اسے نقصان نہ دے سکے گا۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جو لوگ بغیر کسی کی اجازت کے ان کے گھروں میں جھانکتے ہیں' وہ ان کی آنکھیں پھوڑ دیں تو ان پر کوئی دیت نہیں ہے اور نہ ہی قصاص ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: رمضان کا چاند دیکھنے کے لئے شعبان کا چاند شمار کرو۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جب تم میں سے کوئی مسجد میں داخل ہو تو بیٹھنے سے پہلے دو رکعت پڑھے۔