Al Muajam Al Kabir Tibrani

حضرت ابن عمر رضی اللہ عنہ روایت فرماتے ہیں کہ حضور صلی اللہ علیہ وسلم نے ایک آدمی کو سنا، وہ اپنی امانت کی قسم اٹھا رہا تھا‘(جب وہ بعد میں آپ کی خدمت میں آیا تو) آپ صلی اللہ علیہ وسلم نے فرمایا: کیا تو وہی نہیں ہے جو امانت کی قسم اٹھا رہا تھا۔

حضرت ابن عمر رضی اللہ عنہ سے مروی ہے کہ حضور صلی اللہ علیہ وسلم نے اپنے صحابہ سے فرمایا: درختوں میں سے ایک درخت ہے‘ اس کے پتے گرتے نہیں ہیں‘ صحابہ کرام وادی میں اس درخت کو تلاش کرنے لگے‘ آپ صلی اللہ علیہ وسلم نے فرمایا: وہ کھجور کا درخت ہے۔ حضرت عبداللہ رضی اللہ عنہ فرماتے ہیں: میرے دل میں اس کا جواب آیا لیکن میں نے آپ کو بتانے سے حیاء کی ( چونکہ میری عمر چھوٹی تھی)۔

حضرت ابن عمر رضی اللہ عنہ فرماتے ہیں کہ حضور صلی اللہ علیہ وسلم نے فرمایا: افضل ایمان والا وہ ہے جس سے لوگ محفوظ ہوں‘ افضل اسلام وہ ہے جس کی زبان اور ہاتھ سے دوسرے لوگ محفوظ رہیں‘ افضل ہجرت یہ ہے کہ گناہوں کو چھوڑ دو‘ افضل جہاد یہ ہے کہ شہید ہو جانا اور اپنے گھوڑے کی کونجیں کاٹنا۔

حضرت نافع فرماتے ہیں کہ میں حضرت ابن عمر رضی اللہ عنہ کے پیچھے سوار تھا‘ آپ ایک چرواہے کے پاس سے گزرے جو مزامیر بجا رہا تھا‘ آپ نے اونٹ کے چہرے پر مار کر اسے راستے سے پھیرا اور اپنے کانوں میں انگلیاں ڈال لیں اس حال میں کہ آپ فرمارہےتھے: کیا تو سنتا ہے؟ یہاں تک کہ آواز آنا بند ہو گئی۔ پس میں نے جواب دیا: میں نہیں سنتا ہوں۔ آپ نے اپنی سواری کو راستے کی طرف لوٹا کر فرمایا: میں نے رسول کریم صلی اللہ علیہ وسلم کو اسی طرح کرتے ہوئے دیکھا۔

حضرت ابن عمر رضی اللہ عنہ فرماتے ہیں کہ حضور صلی اللہ علیہ وسلم نے فرمایا: رات کی نماز دو دو رکعت ہے‘ جب صبح ہونے کا خوف ہو تو ایک کے ساتھ وتر کرلے۔

حضرت ابن عمر رضی اللہ عنہ فرماتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: جب قیامت کا دن ہو گا تو اللہ اپنے بندوں میں سے ایک بندے کو بلوائے گا‘ اس کو اپنے سامنے کھڑا کرے گا‘ اس سے عزت کے متعلق ایسے ہی پوچھے گا جس طرح اس سے اس کے مال کے متعلق پوچھے گا۔

حضرت ابن عمر رضی اللہ عنہ فرماتے ہیں کہ حضور صلی اللہ علیہ وسلم نےفرمایا: ماں کا ذبح بچے کا ذبح ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: رات اور دن کی نماز دو دو رکعت ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: تمہاری مدت تم سے پہلے لوگوں میں اتنی ہے جتنی نماز عصر اور مغرب کے درمیان کا وقت ہوتا ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے خیبر والوں پر عامل مقرر کیا‘ جو کھیتی اور کھجوریں نکلتی ہیں ان کو لینے کیلئے ‘ آپ اس سے اپنی ازواج کو دیتے ‘ سال میں ایک سو وسق ‘ اسی دست کھجوریں ‘ بیس وسق جو ۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: قریش سے دس جنتی ہیں: ابوبکر‘ عمر ‘ عثمان ‘ علی‘ طلحہ ‘ زبیر ‘ سعد ‘ سعید بن زید ‘ عبدالرحمنٰ بن عوف ‘ ابوعبیدہ بن جراح رضی اللہ عنہم جنتی ہیں۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے میرے جسم کا حصہ پکڑا ‘ فرمایا: اے عبداللہ ! دنیا میں مسافر کی طرح رہ اور اپنے آپ کو قبر والوں میں شمار کر۔