Al Muajam Al Kabir Tibrani

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: اچھے اخلاق کی وجہ سے بندہ' نفلی روزہ رکھنے والے کے برابر اور اللہ کی راہ میں جہاد کرنے والے کے برابر ثواب پا لیتا ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ رسول کریم صلی اللہ علیہ وآلہ وسلم گھر سے نکل کر صفہ والوں کے پاس تشریف لائے جبکہ ان کی آوازیں بلند ہو رہی تھیں اور ہنسی سے لوٹ پوٹ ہو رہے تھے۔آپ صلی اللہ علیہ وآلہ وسلم کو یہ دیکھ کر غصہ آ گیا۔ فرمایا: تم ہنسنے کے لئے پیدا نہیں کیے گئے اور ان کے حق میں اس بات کو اچھا خیال نہ کیا۔ پس اللہ تعالیٰ کی طرف سے حضرت جبریل علیہ السلام نازل ہوئے اور کہا: " بے شک اللہ تعالیٰ حکم دیتا ہے کہ آسانی اختیار کرو، مشکل میں نہ ڈالو۔ بشارتیں دیا کرو اور نفرت نہ پھیلایا کرو۔ " پس (دوبارہ) رسول کریم صلی اللہ علیہ وآلہ وسلم ان کے پاس آئے تو ان کو بشارت دی، ان کے سامنے خوشی کا اظہار کیا اور ان سے مبسوط ہوئے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: میرے بعد عنقریب تم پر حکمران مسلط ہوں گے' اچھے تم کو اچھے طریقے سے اور برے تم کو برے طریقے سے پیش آئیں گے' ان کی بات سننا ' پھر اس بات کی اطاعت کرنا، جو حق کے موافق ہو' ان کے پیچھے نماز پڑھنا' اگر وہ تمہارے ساتھ اچھا سلوک کریں گے تو تمہارے اور ان کے لئے ثواب ہو گا' اگر برے طریقے سے پیش آئیں گے تو تمہارے لیے ثواب اور ان کے لئے گناہ ہو گا۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: حاجی اور عمرہ کرنے والے اللہ کے مہمان ہوتے ہیں' اگر وہ دعا کریں تو ان کی دعا قبول ہو گی' اگر بخشش مانگیں تو ان کی مغفرت ہو گی۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے مشکیزہ سے منہ لگا کر پینے سےمنع فرمایا۔

حضرت ابو ہریرہ رضی اللہ تعالیٰ عنہ روایت کرتے ہیں : رسول کریم صلی اللہ علیہ وآلہ وسلم نےفرمایا: سات لوگ، ایسے ہیں جن کو اللہ تعالیٰ اپنا سایہ عطا فرمائے گا جس دن اللہ تعالیٰ کےسوا کوئی سایہ نہ ہو گا: 1۔ امام عادل۔ 2۔ وہ جوان: جو اللہ تعالیٰ کی عبادت میں پلا۔ 3۔ وہ دو آدمی جو اللہ تعالیٰ کی رضا کے لئے ایک دوسرے سے محبت کرتے ہیں، اسی پر اکٹھے ہو تے اور جدا ہوتے ہیں۔ 4۔ وہ آدمی ، جس کا دل مسجد سے متعلق رہتا ہے کہ وہاں سے نکلتا ہی نہیں ہے یہاں تک کہ اس کی طرف لوٹ آئے۔ 5۔ وہ آدمی ، جس کو حسب و نسب والی عورت اپنے نفس کی طرف بلائے اور وہ جواب میں کہے: میں اللہ سے ڈرتا ہوں۔ 6۔ وہ آدمی ، جو اس طریقے سے صدقہ کرے کہ اپنے بائیں ہاتھ سے بھی چھپائے یہاں تک کہ اس کے بائیں ہاتھ کو معلوم نہ ہو، جو اس کا دایاں ہاتھ خرچ کرے۔ 7۔ وہ آدمی ، جو اللہ کا ذکر کرنا شروع کرے تو اس کی آنکھوں سے آنسو بہنے لگیں۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضو ر صلی اللہ علیہ وآلہ وسلم نے فرمایا: جب تم میں سے کوئی جوتی پہنے تو پہلے دائیں طرف والی پہنے اور جب اُتارے تو پہلے بائیں طرف والی اتارے یا دونوں اکٹھی اتارے یا دونوں اکٹھی پہنے۔

حضرت ابو ہریرہ رضی اللہ تعالیٰ عنہ روایت کرتے ہیں کہ ایک دیہاتی نے عرض کی: یا رسو ل اللہ ! ہم ریت والے علاقہ میں رہتے ہیں ' ہمارے حیض و نفاس اور جنابت والی عورتیں ہوتی ہیں۔ آپ صلی اللہ علیہ وآلہ وسلم نے فرمایا: تم تیمم کر لیا کرو۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جب تم مشرکوں سے کسی راستہ میں ملو تو ان کو سلام میں ابتداء نہ کرو' ان کو تنگ راستے کی طرف مجبور کرو۔

حضرت ابو ہریرہ رضی اللہ تعالیٰ عنہ روایت کرتے ہیں : رسول کریم صلی اللہ علیہ وآلہ وسلم نے منع فرمایا کہ درآمد شدہ مال شہر سے باہر جاکر لیا جائے اور اگر کسی نے شہر سے باہر جاکر باہر آنے والے تاجر سے مال خرید ا تو اس میں سامان والے کو اختیار ہے جب وہ بازار میں آئے۔ (چاہے تو بیع توڑ دے یا برقرار رکھے)۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: نکاح ولی اور دو عادل گواہوں کے ساتھ ہوتا ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جس نے لا الٰہ الا اللہ پڑھا اس کو ایک دن فائدہ ' ایک زمانے سے زیادہ ہو گا' جو اس کو اس سے پہلے پہنچا ہے، جو پہنچا ہے۔