Al Muajam Al Kabir Tibrani

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جو لوگ اکٹھے ہوں اور اللہ کا ذکر کیے بغیر جدا ہو جائیں تووہ مردار سے بھی زیادہ بدبو دار شی سے جدا ہوئے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا : اگر کسی آدمی نے اللہ کی رضا کے لئے نفلی روزہ رکھا پھر اسے زمین بھر سونا دیا گیا تو اس ایک روزے کا اجر پورا نہ ہوا' بس وہ قیامت کے دن ہی پورا ہو گا۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: انسان کا ہر عمل اس کےلئے ہے مگر روزہ میرے لیے ہے' میں خود اس کی جزاء دوں گا' روزے دار کے منہ کی خوشبو اللہ کے ہاں کستوری کی خوشبو سے زیادہ پاکیزہ ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: میرے د وست صلی اللہ علیہ وآلہ وسلم نے مجھے تین کاموں کی وصیت کی: نماز چاشت' سونے سے پہلے وتر ادا کرنے کی اور ہر ماہ تین روزے رکھنے کی۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: اللہ عزوجل نے سورہ ٔ طٰہٰ و یٰسین حضرت آدم علیہ السلام کی ولادت سے ایک ہزار پہلے پڑھیں' جب فرشتوں نے قرآن سنا تو انہوں نے کہا: اس امت کے لئے خوشخبری جس پر یہ نازل ہو گا اور مبارک ہے، ان سینوں کے لئے جو اسے اٹھائیں گے اور ان زبانوں کے لئے خوشخبری جو اس کی تلاوت کریں گے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: اس ذات کی قسم جس کے قبضۂ قدرت میں میری جان ہے! کبھی کبھی میرا ارادہ بنتا ہے کہ میں لکڑیاں اکٹھی کرنے کا حکم دوں۔ پس لکڑیا ں اکٹھی کی جائیں پھر میں نماز کا حکم دوں تو نماز کے لئے اذان کہی جائے پھر کسی عظیم شخص کو حکم دوں تو وہ لوگوں کو نماز پڑھائے پھر میں ان لوگوں کے پاس چلا جاؤں ، (جو نماز پڑھنے کے لئے نہیں آئے) تو ان کے اپنے گھروں میں ہوتے ہوئے، ان کے گھروں کو آگ لگا کر جلا دوں۔ اس ذات کی قسم جس کے قبضۂ قدرت میں میری جان ہے! اگر ان لوگوں میں سے کوئی آدمی جان لے کہ اسے چھوٹی سی موٹی ہڈی ملے گی یا جانور کے دو خوبصورت کھر تو ضرور عشاء کی نماز میں حاضر ہو۔

حضر ت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا : اللہ عزوجل نے جنت کو پیدا کیا اور جنت والوں کو پیدا کیا' ان کے قبائل اور ان میں سے کوئی کمی اور زیادتی نہیں ہو گی' جہنم کو پیدا کیا اور اس میں رہنے والوں کے خاندانوں اور قبیلوں کو پیدا کیا' ان میں کمی اور اضافہ نہیں ہو گا۔ ایک آدمی نے عرض کی: یا رسول اللہ ! پھر عمل کی کیا ضرورت ہے؟ آپ صلی اللہ علیہ وآلہ وسلم نے فرمایا: عمل کرو' ہر آدمی کے لئے وہی عمل آسان کر دیا جاتا ہے، جس کے لئے وہ پیدا کیا گیا ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جب تم میں سے کسی کے برتن میں کتا منہ مار ے تو اس برتن میں کوئی شی نہ ڈالی جائے جب تک کہ سات مرتبہ اسے دھو نہ لیا جائے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جانور اگر کسی کو لات سے نقصان پہنچائے تو اس کے مالک پر تاوان نہیں ہے۔ (اس حدیث کو امام طبرانی نے مرفوعاً روایت کیا اور خطابی نے کہا: امام شعبی کا قول ہے۔)

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: دنیا میں نیکی کرنے والے آخرت میں بھی نیکی والے ہوں گے اور دنیا میں برائی کرنے والے آخرت میں بھی برے ہوں گے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: لیلۃ القدر ستائیس یا انتیس کو ہے' اس رات کو فرشتے زمین میں کنکریوں کی تعداد سے زیادہ ہوتے ہیں۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جنت کی خوشبو پانچ سو سال کی مسافت سے محسوس کی جاتی ہے، لیکن اپنے کام کا احسان جتلانے والا' والدین کا نافرمان اور شراب کا عادی اس کی خوشبو بھی نہیں پا سکے گا۔