Al Muajam Al Kabir Tibrani

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : بیماری متعدی نہیں ہوتی۔ ایک دیہاتی کھڑا ہوا، اس نے عرض کی : یا رسول اللہ ! آپ کا کیا خیال ہے کہ اونٹ ہرنیوں کی طرح ریت کے ٹیلوں میں تھے تو ایک خارش والا اونٹ ان میں آیا تو سب کو بیماری لگ گئی ؟ آپ صلی اللہ علیہ و الہ وسلم نے فرمایا : پہلے کو کس نے لگائی تھی ؟

حضرت ابو ہریرہ رضی اللہ عنہ فرماتے ہیں : ہم نبی کریم صلی اللہ علیہ و الہ وسلم کی معیت میں ایک جنازہ میں شامل ہوئے ۔ پس جب اس کے دفن سے فارغ ہوئے اور لوگ جانے لگے تو نبی کریم صلی اللہ علیہ و الہ وسلم نے فرمایا : یہ ( قبر والا ) تمہارے جوتوں کی آواز سن رہا ہے ۔ اس کے پاس منکر نکیر آ گئے ہیں ، جن کی آنکھیں تانبے کی ہانڈیوں جیسی ہیں ۔ ان کے دانت گائے کے سینگوں کی مانند ہیں اور ان کی آوازیں بادل کی گرج کی مانند ہیں ۔ پس ان دونوں نے اسے اٹھا کر بٹھا دیا ہے اور اس سے پوچھ رہے ہیں کہ وہ کس کی عبادت کیا کرتا تھا، اور اس کا نبی کون تھا ؟ پس اگر ان لوگوں میں سے ہوا، جو اللہ کی عبادت کرتے ہیں تو کہے گا : میں اللہ کی عبادت کیا کرتا تھا اور نبی حضرت محمد صلی اللہ علیہ و الہ وسلم ہیں ، جو واضح نشانیاں لیکر آئے ۔ پس ہم ایمان لائے اور پیروی کی۔ پس یہ اللہ تعالیٰ کے اس فرمان کی وجہ سے ہوا۔ : " اللہ مسلمانوں کو دنیا اور آخرت کی زندگی میں حق بات ( کلمہ توحید ) پر ثابت قدمی عطا فرماتا ہے ، اسے کہا جائے گا : یقین پر تو نے زندگی گزاری ، یقین پر ہی تیری موت ہوئی اور اسی پر تو اٹھایا جائے گا، پھر اس کے لئے جنت کا دروازہ کھول دیا جائے گا، اور اس کی قبر ( تاحد نظر ) وسیع کر دی جائے گی اور اگر وہ شک والوں سے ہوگا تو کہے گا : میں کچھ نہیں جانتا ۔ لوگوں کو سنتا تھا ، وہ ایک بات کہتے تھے تو میں بھی وہی کہہ دیتا تھا۔ پس اسے کہا جائے گا : تو نے شک پر زندگی گزار ی ۔ اسی پر مرا اور اسی پر تو قیامت کے دن اٹھایا جائے گا پھر اس کے لئے جہنم کی طرف سے دروازہ کھول دیا جائے گا اور اس پر بچھو اور سانپ مسلط کر دیئے جائیں گے ۔ فرض کیا ، کوئی ان میں سے دنیا میں ایک پھونک مارے تو ( زمین اس طرح جل جائے کہ ) اس میںکوئی شی پیدا نہ ہو سکے ۔ وہ اسے نوچیں گے اور زمین کو حکم دیا جائے گا کہ مل جائے یہاں تک کہ اس کی ایک طرف کی ہڈیاں دوسری طرف نکل جائیں گی۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : جب زمین والوں کی آمین آسمان والوں کی آمین کے موافق ہو جائے تو ان کو بخش دیا جاتا ہے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے تین وقتوں میں نماز پڑھنے سے منع فرمایا : سورج طلوع ہونے سے لے کر مکمل طلوع ہونے تک اور زوال کے وقت اور سورج کے غروب ہونے کے وقت ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : اپنی بیوی کے پاس نہ جانے کی قسم اٹھا کر اڑ جانا اور کفارہ ادا نہ کرنا ، بہت بڑا گناہ ہے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : جو شخص مال دار ہونے کے باوجود قرض ادا کرنے میں تاخیر کرے تو وہ بڑا ظالم ہے ، جب تمہارا قرض کسی مالدار معتبر آدمی کی طرف پھیر دیا جائے تو قبول کر لو، قیدی عورتیں جو حاملہ ہیں ، ان کے ساتھ جماع نہ کرو۔ جب تک حمل نہ جن دیں ، پھل پکنے سے پہلے فروخت نہ کرو۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے منع فرمایا کہ عورت اور اس کی خالہ اور پھوپھی کو ایک نکاح میں جمع کیا جائے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : ایمان کے چونسٹھ دروازے یا چونسٹھ شعبے ہیں ، ان میں سے بلند ترین لا الہ الا اللہ ہے اور کم درجہ راستے ستے تکلیف دہ شی اٹھانا ہے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : جو عورت اپنے رب سے ڈرے اور اپنی شرمگاہ کی حفاظت کرے اور شوہر کی اطاعت کرتے ، اس کیلئے جنت کے آٹھوں دروازے کھول دیئے جائیں گے ، اسے کہا جائے گا : جس سے چاہے داخل ہو جا۔

23534حضرت ابو ہریر ہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جب تم میں سے کوئی کسی کو مارے تو چہرہ پر مارنے سے پرہیز کرے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے سہو کے دو سجدے سلام کے بعد کئے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جب تم میں سے کوئی کسی آزمائش والے (بیمار ) کو دیکھے تو یہ دعا کرے : "الحمدللہ الذی فضلنی علیہ الیٰ آخرہٖ " جب اس نے یہ پڑھ لیا تو اس نے اس نعمت کا شکریہ ادا کیا۔