Al Muajam Al Kabir Tibrani

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے عرض کی اے اللہ ! حاجی کو بخش دے ، جس کیلئے حاجی بخشش کی دعا کرے ، اس کو بخش دے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے اللہ عزوجل کے ارشاد : " جو مومن کو جان بوجھ کر قتل کرے ، اس کی سزا جہنم ہے ۔ " کے متعلق فرمایا : اس کا مطلب ہے : بیشک ہم اسے سزا دیں گے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : عورت کے ساتھ اس کی پھوپھی اور اس کی خالہ پر نکاح نہ کیا جائے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : جب نماز کیلئے اقامت پڑھی جائے تو وہ صرف وہی نماز ہے ، جس کیلئے اقامت پڑھی جائے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے صحابہ کرام کو نماز پڑھائی ، آپ نے نماز کے دوران اپنے نعلین مبارک اتارے ، جب صحابہ کرام نے یہ محسوس کیا ، تو انہوں نے بھی اپنے جوتے اتار دیئے ، جب حضور صلی اللہ علیہ و الہ وسلم نماز سے فارغ ہوئے تو لوگوں کی طرف متوجہ ہو کر فرمایا : میرے پاس ایک فرشتہ آیا، اس نے مجھے بتایا : آپ کے نعلین میں قذر ( تکلیف دہ چیز ) ہے ۔ پس جب تم میں سے کوئی مسجد کے دروازے کی طرف آئے تو اپنے جوتے الٹ پلٹ کے دیکھ لے ، اگر اس میں کوئی شی دیکھے تو اسے صاف کر لے ، پھر اس میں نماز پڑھے ، اگر اس کی مرضی ہو ورنہ اسے اتار دے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : قرآن کی تلاوت کیا کرو۔ اس کے بدلے نہ کھاؤ۔ اس کے بدلے کثرت طلب نہ کرو۔ اس میں غلو نہ کرو۔ اس سے جفا کرو۔ قرآن کا علم سیکھو، کیونکہ یہ قیامت کے دن قرآن پڑھنے والے کا سفارشی ہو گا۔ زہراوین یعنی سورۃ بقرہ اور آل عمران ضرور سیکھو۔ کیونکہ قیامت کے دن یہ دونوں آئیں گی گویا دو بادل ہیں یا دو درخت یا صف باندھے ہوئے فرشتوں کے دو جھنڈ ہیں ۔ قیامت کے دن یہ دونوں اپنے پڑھنے والے کی سفارش کریں گی۔ سورہ بقرہ کا علم حاصل کرو، کیونکہ اس کا حاصل کرنا برکت ہے اور چھوڑنا حسرت ہے جبکہ مذاق کرنے والے اس کی طاقت نہیں رکھ سکیں گے ۔

حضرت ابو ہریرہ رضی اللہ عنہ سے مروی ہے کہ نبی کریم صلی اللہ علیہ و الہ وسلم نے فرمایا : قیامت قائم نہیں ہو گی ، یہاں تک کہ مد والے اپنے مدوں پر درھموں والے ، درھموں پر غالب نہ آ جائیں اور لوگ اپنے علاقوں کو واپس نہ آ جائیں ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے ہمیں ایک کپڑے میں لپٹ کر نماز پڑھائی، آپ نے اس کپڑے کو باندھا ہوا تھا۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : جب آدمی اپنے مسلمان بھائی کو کہے : اے کافر ! تو کفر ان میں سے ایک کی طرف ضرور لوٹے گا۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : کلونجی ہر بیماری کی دواء ہے سوائے سام کے ۔ صحابہ کرام نے عرض کی : " سام " سے مراد کیا ہے ؟ آ پ صلی اللہ علیہ و الہ وسلم نے فرمایا : موت۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : بیشک تین گروہ چلے تو راستے میں انہیں بارش نے آ لیا ، انہوں نے ایک غار میں پناہ لی ۔ اسی دوران کہ وہ اس میں تھے کہ پہاڑ کے ٹوٹنے سے ایک چٹان لڑھک کر ان کے اوپر آ پڑی یہاں تک کہ غار کا منہ بند ہو گیا۔ قوم نے ایک دوسرے سے کہا : بارش رک گئی ہے ، اور اس کا اثر بھی ختم ہو گیا ہے اور تمہیں اللہ کے سوا دیکھنے والا کوئی نہیں ہے ( کہ تمہیں بچا لے ) ۔ پس تم میں سے ہر ایک اپنی زندگی کا سب سے زیادہ فضیلت والا عمل دیکھے اور اس کا وسیلہ پیش کر کے ، اللہ سے دعا کرے ۔ پس ان میں سے ایک نے کہا : اے اللہ یقیناً تو جانتا ہے ، میں اپنے والدین سے نیکی کرنے والا ہوں ، میں ان کے لیے شام کا دودھ نکال کر ( شراب بنا کر : یاد رہے پہلی امتوں میں شراب حلال تھی ) لاتا اور انہیں پلاتا اور کبھی میں ان کے لئے شام کا دودھ لاتا اور انہیں دیکھتا کہ وہ اپنی خوابگاہوں میں جا کر سو گئے ہیں تو میں انہیں جگانا پسند نہ کرتا اور انہیں پلانے سے پہلے واپس لوٹنا بھی پسند نہ کرتا اور ہمیشہ انتظار کرتا رہتا اور وہ سوتے رہتے یہاں تک کہ صبح ہو جاتی ۔ پس تجھے اچھی طرح معلوم ہے کہ میں نے یہ کام تیرے خوف سے کیا۔ تو ہم سے یہ مشکل ٹال دے ۔ فرمایا : ان سے کچھ مشکل دور ہو گئی حتیٰ کہ ان کو قدرے روشنی محسوس ہونے لگی۔ دوسرے نے عرض کی : اے اللہ ! میں نے ایک عورت کو چاہا۔ اس سے محبت کی ، اس پر اپنا مال خرچ کیا اور اسے پانے میں کامیاب بھی ہو گیا۔ اور اس کی جگہ بیٹھ گیا ، جہاں ایک خاوند اپنی بیوی کے بیٹھتا ہے ، تو اس نے مجھ سے کہا: تیرے لئے حلال نہیں ہے کہ تو نا حق میری مہر کھولے ۔ پس میں ( تیرے ڈر سے ) اسے چھوڑ کر اٹھ کھڑا ہوا۔ پس تجھے اچھی طرح معلوم ہے کہ میں نے تیرے خوف سے یہ کام کیا۔ پس چٹان جھکی۔ تھوڑی گنجائش پیدا ہوئی یہاں تک کہ قوم اگر نکلنا چاہے تو نکل سکے ۔ ایک اور بولا : اے اللہ ! تو جانتا ہے کہ میں نے لوگوں کو اجرت پر لگایا۔ انہوں نے کام کیا اور میں نے ان کو پوری پوری مزدوری ادا کر دی مگر ایک آدمی اپنی مزدوری لینے کے وقت نہ آیا، اور اس نے اپنی مزدوری وصول نہ کی ، میں نے اس کا مال کاروبار میں لگا لیا ) یہاں تک کہ اس کا مال کئی گنا زیادہ ہو گیا تو اس کے بعد وہ آیا۔ اس نے اپنی مزدوری مانگی تو میں نے اس سے کہا : یہ ہے ، پکڑ لے ، تیری جملہ مزدوری ہے ۔ پس تجھے معلوم ہے کہ میں نے یہ کام تیرے ڈر کی وجہ سے کیا۔ " ہماری مشکل دور کر دے " ۔ فرمایا : چٹان جھکی اور لڑھک کر پیچھے ہٹ گئی ۔ پس وہ اٹھ کر چل نکلے اس حال میں کہ ایک دوسرے کے گلے مل رہے تھے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : جب عورت پانچ وقت کی نماز پڑھے اور ماہ رمضان کے روزے رکھے ، اپنی شرمگاہ کی حفاظت کرے اور اپنے شوہر کی اطاعت کرے تو جنت کے جس دروازے سے چاہے داخل ہو۔