Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : عورت ٹیڑھی پسلی سے پیدا کی گئی ہے ، اس کی مثال ٹیڑھی پسلی کی ہے ، اگر آپ اس کو سیدھا کریں گے ، تو وہ ٹوٹ جائے گی ، اگر چھوڑ دو گے تو ٹیڑھی رہے گی ( لیکن ٹوٹنے سے بچ جائے گی اور آپ اس سے فائدہ حاصل کرتے رہیں گے ) ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : ہم میں سے نہیں ہے ، جس نے گالوں کو پیٹا ، گریبان پھاڑ اور جاہلیت والی باتیں کیں ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اللہ عزوجل اچھے اخلاق والے بندے کو روزہ اور نماز پڑھنے والے کے درجے میں پہنچا دیتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : فرشتے خوشی سے اطاعت و فرمانبرداری کرتے ہیں اور انصار خوشی سے اسلام لاتے ہیں اور عبدالقیس بھی خوشی سے اسلام لائے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے مجھے تین وصیت کیں : فجر کی سنتوں کی ، نماز چاشت کی دو رکعتوں کی اور عشاء کے فوراً بعد وتر ادا کرنے کی ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تمہیں لوگوں کے کام اور ان کی عادات کے متعلق نہ بتاؤں ! وہ آدمی جس کو غصہ جلدی آتا ہے ، اس کا غصہ جلدی چلا جاتا ہے ، اس پر کوئی گناہ نہیں ، اس کو کوئی فائدہ بھی نہیں ، ایک وہ آدمی جسے غصہ دیر سے آئے اور جلدی چلا جائے تو یہ اس کیلئے ثواب ہے اور اس پر کوئی گناہ نہیں ، وہ آدمی جس کو غصہ جلدی آئے اور دیر سے جائے تو یہ اس کیلئے گناہ ہے ، اسے کوئی نفع نہیں ۔ وہ آدمی جو پورا کر کے دیتا ہے ، جو اس پر لازم ہے یعنی اپنی ڈیوٹیاں نبھاتا ہے ، لیکن وہ پورا کر کے نہیں لیتا ، جو اس کا حق ہے ۔ پس اس سے نہ اس پر کوئی حرج ہے اور نہ اس کو کوئی فائدہ ہے ۔ وہ آدمی جو دوسروں سے تو حقوق پورے کر کے لیتا ہے ، لیکن اپنے حقوق ادا نہیں کرتا۔ اس کا نفع اس کو ہوتا ہے ، لیکن نقصان کوئی نہیں ہوتا اور وہ آدمی جو دوسروں سے اپنے حقوق پورے کر کے لیتا ہے ، لیکن لوگوں کو ٹالتا رہتا ہے ، جو ان کے حقوق ہیں ۔ اس کا اس پر بوجھ ہے لیکن اسے ( آخرت میں ) نفع کوئی نہیں ہوگا۔

حضرت ابو ہریرہ رضی اللہ عنہ روایت کرتے ہیں کہ دو آدمی اپنا جھگڑا لے کر حضور صلی اللہ علیہ و الہ وسلم کے پاس آئے ، ان میں سے ہر ایک کے پاس ایک ایک عادل گواہ تھا، حضور صلی اللہ علیہ و الہ وسلم نے ان کے درمیان قرعہ ڈالا اور ( اللہ کی بارگاہ میں ) عرض کی : اے اللہ ! ان کے درمیان فیصلہ فرما۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : بخار جہنم کی تپش سے ہے ، اس کو پانی کے ساتھ ٹھنڈا کرو۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے درآمد ہونے والے مال کو آگے جا کر لینے سے منع فرمایا کہ پس جس نے شہر سے باہر جا کر آگے سے ملا اور مال خرید لیا تو اس کا مالک زیادہ حق دار ہے ، جب وہ ( مارکیٹ میں ) آئے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : سنت کی دو قسمیں ہیں : 1۔ فر میں سنت ۔ 2۔ غیر فرض میں سنت ۔ جو سنت فرض میں ہے ، اس کی اصل ، اللہ کی کتاب میں ہے ، اس پر عمل کرنا ہدایت ہے یعنی وہ سنن ہدی سے ہے اور اس کا چھوڑنا گمراہی ہے ۔ وہ سنت جس کی اصل قرآن میں نہیں ، اس پر عمل کرنا افضل ہے ، اس کا چھوڑنا گناہ نہیں ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے وتر نہیں پڑھے ، اس کی نماز نہیں ( لہذا وتر واجب ہیں ) ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم سے مشرکوں کے بچوں کے متعلق پوچھا گیا تو آپ نے فرمایا : اللہ بہتر جانتا ہے ، جو انہوں نے کرنا تھا۔