Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : ایک عمرہ سے لے کر دوسرے عمرہ تک کے درمیان ہونے والے گناہوں کی معافی ہے اور حج مبرور کی جزاء جنت ہی ے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : میری اس مسجد کی اذان سن کر نکلنے والا یا تو ضرورت مند ہوگا ، یا منافق ہو گا، جو واپس نہیں لوٹے گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : قیامت آنے سے پہلے سر عام اللہ کا انکار ہو گا، یہ کام اس وقت ہو گا جب وہ اپنے رب کے بارے میں کلام کریں گے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم کے پاس تھا کہ ایک آدمی یعنی قیس آپ کے پاس آیا، اس نے عرض کی : یا رسول اللہ ! قبیلہ حمیر پر لعنت کریں ؟ حضور صلی اللہ علیہ و الہ وسلم نے ان سے اعراض فرمایا: وہ دوسری طرف سے ہو کر آیا تو حضور صلی اللہ علیہ و الہ وسلم نے اس بار بھی اعراض فرمایا : پھر حضور صلی اللہ علیہ و الہ وسلم نے فرمایا : اللہ حمیر پر رحم کرے ، ان کے دل جھکے ہوئے ان کے کام سلامتی والے ،ان کے ہاتھ کھانا کھلانے والے ، وہ امن اور ایمان والے ہیں ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : نماز چاشت کی حفاظت صرف رجوع کرنے والا ہی کر سکتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تحفہ دے کر واپس لینے والا ، ایسے ہے جس طرح کتا قے کرے اور دوبارہ اس کو چاٹ لے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : میری اس مسجد میں نماز دوسری مسجدوں میں سوائے مسجد حرام کے ہزار نمازیں پڑھنے سے بہتر ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم سے کھجوروں کے متعلق پوچھا گیا تو آپ صلی اللہ علیہ و الہ وسلم نے فرمایا : یہ کیچڑ میں بھی مضبوطی سے کھڑی ہونے والی ہیں اور قحط سالی کے موسم میں کھانے کا کھانا ہیں ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جمعہ کا دن ہو تو میری بارگاہ میں کثرت سے درود پڑھو کیونکہ تمہارا درود میری بارگاہ میں پیش کیا جاتا ہے اور میری وسیلہ سے مانگو۔ صحابہ کرام نے عرض کی : یا رسول اللہ ! وسیلہ سے مراد کیا ہے ؟ آپ صلی اللہ علیہ و الہ وسلم نے فرمایا : جنت میں میرے ساتھ اعلیٰ درجہ ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم میں سے کوئی نماز کے لیے کھڑا ہو تو پوری طرح نماز کی طرف متوجہ ہو یہاں تک کہ نماز سے فارغ ہو جائے ۔ نماز میں ادھر ادھر توجہ کرنے سے بچو ۔ کیونکہ جب تک تم نماز میں ہو، تم اپنے رب سے بالمشافہ گفتگو کر رہے ہو۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تم میں سے ایک ایسی مالداری کا منتظر ہے ، جو سرکش بنانے والی ہے یا ایسی غریبی جو بھلا دینے والی ہے یا صحت میں خرابی پیدا کرنے والی مرض کا یا فناہ کر دینے والے بڑھاپے کا ایسی موت کا جو جلدی سے کام تمام کر دے ۔ یا دجال کا اور دجال غائب چیزوں میں سے سب سے بری چیز ہے ، جس کا انتظار کیا جاتا ہے یا قیامت ہے اور قیامت سب سے زیادہ ڈراؤنی اور کڑوی ہے ۔

حضرت ابو ہریرہ رضی اللہ عنہ روایت کرتے ہیں کہ میرے محبوب صلی اللہ علیہ و الہ وسلم نے مجھے تین وصیت کیں : فجر کی سنتوں کی ، نماز چاشت کی دو رکعتوں کی اور عشاء کی نماز کے فوراً بعد وتر ادا کرنے کی ۔