Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : ایمان کے ستر حصے ہیں ، ان میں اعلیٰ ترین : لا الہ الا اللہ پڑھنا ، راستے سے تکلیف دہ شی کو دور کرنا ہے اور حیاء بھی ایمان کا حصہ ہے ۔

حضرت ابو ہریرہ رضی اللہ عنہ سے مروی ہے کہ رسول کریم صلی اللہ علیہ و الہ وسلم جب رمضان المبارک قریب آتا تو آپ فرماتے : تم کو تمہارا یہ مہینہ سایہ مہیا کر رہا ہے ۔ حضرت ابو القاسم صلی اللہ علیہ و الہ وسلم نے جن چیزوں کی قسم کھائی ہے ، ان میں رمضان شریف ہے ۔ مسلمانوں پر اس کی مثل کوئی ماہ نہیں گزرا، کیونکہ اللہ تعالیٰ اس کو داخل کرنے سے پہلے اس کا اجر و نوافل ضرور لکھتا ہے اور اس کے گناہ اور شقاوت بھی اس کے داخل کرنے سے پہلے لکھتا ہے ۔ اس کی وجہ یہ ہے کہ ایماندار اپنے کنبے کے لیے اپنا نفقہ اور قوت تیار کرتا ہے ، لیکن گناہ گار مسلمانوں کو غافل کرنے اور ان کے عیب فاش کرنے کا پروگرام بناتا ہے ۔ پس یہ مومن کے لیے نعمت اور کافر کیلے سزا کا سامان ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جو جنازہ کے پیچھے چلا ، نماز جنازہ پڑھی تو اس کیلے ایک قیراط کے برابر ثواب ہوگا، جو جنازہ میں شریک ہو اور اس کو دفن کر کے واپس آیا تو اس کیلئے دو قیراط کے برابر ثواب ہے ، ان میں چھوٹا ، احد پہاڑ کی طرح ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب امام آمین کہے تو تم بھی آمین کہو، جس کی آمین فرشتوں کی آمین کے موافق ہو جائے تو اس کے پہلے کے گناہ معاف کر دیئے جاتے ہیں ۔

حضرت ابو ہریرہ رضی اللہ عنہ فرماتے ہیں کہ صحابہ کرام ، حضور صلی اللہ علیہ و الہ وسلم کے پاس کھجوریں لائے تو آپ اس کے متعلق پوچھتے تھے ، اگر وہ عرض کرتے کہ صدقہ ہے ، تو آپ صلی اللہ علیہ و الہ وسلم فرماتے : کھاؤ ! خود نہیں کھاتے تھے اور اگر صحابہ عرض کرتے کہ یہ تحفہ ہے ، تو آپ صلی اللہ علیہ و الہ وسلم ان کے ساتھ مل کر کھاتے تھے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : انسان کے ہر عمل کا ثواب ہے ، روزہ میرے لیے اور میں خود اس کی جزاء دوں گا ، روزے دار کے منہ کی خوشبو اللہ کے ہاں کستوری کی خوشبو سے زیادہ اچھی ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : مسکین چکر لگانے کے ساتھ نہیں ہے جس کو ایک لقمہ اور دو لقمے دیئے جائیں ایک کھجور اور دو کھجوریں دی جائیں ، ہاں ! مسکین وہ ہے جو اتنا مال نہ پائے ، جس سے وہ غنی ( صاحب نصاب ) ہو جائے لیکن پھر بھی وہ لوگوں سے نہ مانگے تاکہ لوگ اسے دیں ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : انسان کا ہر عمل اس کے لیے ہے ، لیکن روزہ میرے لیے ہے اور میں خود اس کی جزاء دوں گا، روزے دار کے منہ کی خوشبو اللہ کے ہاں کستوری کی خوشبو سے زیادہ اچھی ہے ، وہ میری طرف سے اپنی بیوی سے جماع اور شہوت کھانا، پینا چھوڑتا ہے ، روزہ میرے لیے ہے اور میں خود اس کی جزاء دوں گا، روزے دار کیلئے دو خوشیاں ہیں : ایک افطار کے وقت اور ایک جب مجھ سے ملے گا ، روزہ ڈھال ہے ، اگر اس سے کوئی لڑے یا اسے گالی دے تو اس سے گفتگو نہ کرے ، کہے : میں روزہ کی حالت میں ہوں ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : عورت ٹیڑھی پسلی سے پیدا کی گئی ہے ، یہ ایک اخلاق پر نہیں رہے گی، اگر سیدھی کرو گے تو ٹوٹ جائے گی ، اس کو توڑنا ، اسے مارنا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جو قاضی بنایا گیا، وہ ایسے ہیں جس طرح بغیر چھری کے ذبح کیا جائے ۔

حضرت ابو ہریرہ رضی اللہ عنہ فرماتے ہیں کہ رسول کریم صلی اللہ علیہ و الہ وسلم نے فرمایا : میرا یہ منبر، جنت کی نہروں میں سے ایک نہر پر ہے ۔

حضرت ابو ہریرہ رضی اللہ عنہ فرماتے ہیں : اللہ جل جلالہ ، نے اپنے نبی صلی اللہ علیہ و الہ وسلم پر مکہ میں یہ آیت نازل فرمائی : " عنقریب اس جتھے کو شکست دی جائے گی اور یہ پیٹھ پھیر کر بھاگیں گے " ۔ تو حضرت عمر بن خطاب رضی اللہ عنہ نے عرض کی : اے اللہ کے رسول ! کونسا لشکر ؟ یہ معرکہ بدر سے پہلے کی بات ہے ۔ راوی کا بیان ہے ، پس جب بدر کا دن تھا اور قریش کو شکست ہوئی تو رسول کریم صلی اللہ علیہ و الہ وسلم کی طرف دیکھا ، اس حال میں کہ آپ ان کے قدموں کے نشانات میں تلوار بے نیام کیے ہوئے تھے اور فرما رہے تھے : " عنقریب اس جتھے کو شکست دی جائے گی، اور یہ پیٹھ پھیر کر بھاگیں گے "۔ اور اس کا مظاہرہ بدر والے دن ہوا۔ پس اللہ تعالیٰ نے ان کے بارے میں فرمایا : " یہاں تک کہ جب ہم نے ان کے بڑوں کو عذاب سے پکڑا۔ " اور یہ آیت بھی نازل فرمائی : " کیا آپ نے ان لوگوں کو نہیں دیکھا ، جنہوں نے اللہ کی نعمت پر شکر کی بجائے نا شکری کی "۔ اور رسول کریم صلی اللہ علیہ و الہ وسلم نے ان پر مٹھی پھینکی تو مٹھی ان سب پر پڑی اور ان کی آنکھیں اور منہ بھر گئے یہاں تک کہ کوئی آدمی قتل ہوا تو اس کی آنکھیں مٹی سے بھری ہوئی تھیں۔ پس اللہ تعالیٰ نے اس آیت کو نازل فرمایا : " اور اے حبیب ! جب آپ نے مٹی پھینکی تو در حقیقت آپ نے نہیں پھینکی بلکہ اللہ نے پھینکی ( تاکہ کافروں کو مغلوب کرے ۔ ) " اور ابلیس کے بارے میں نازل کیا ۔ " پھر جب دونوں لشکر آمنے سامنے ہو گئے تو وہ الٹے پاؤں بھاگا اور کہنے لگا : " میں تم سے جدا ہوں ، بیشک میں وہ کچھ دیکھ رہا ہوں جو تم نہیں دیکھتے ، بیشک میں اللہ سے ڈرتا ہوں اور اللہ سخت عذاب والا ہے ۔ " اور عتبہ بن ربیعہ اور ان کے ساتھ مشرکین میں سے کچھ لوگوں نے بدر کے دن کہا : ان لوگوں کو ان کے دین نے دھوکے میں ڈالا۔ " تو اللہ نے یہ آیت نازل کی : " جب منافقوں اور ان لوگوں نے کہا جن کے دل میں بیماری تھی: ان کے دین نے ان کو دھوکا دیا۔ "