Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے قسم اٹھائی اور ساتھ ہی ان شاء اللہ کہا ، وہ حانث نہیں ہوگا۔

حضرت ابو ہریرہ رضی اللہ عنہ فرماتے ہیں کہ رسول کریم صلی اللہ علیہ و الہ وسلم نے فرمایا : بیشک کوئی آدمی ایسا بھی ہوتا ہے ، جو ستر سال تک بھلائی کرنے والوں جیسا عمل کرتا رہتا ہے ۔ پس ( فوت ہونے سے پہلے ) جب وہ وصیت کرتا ہے تو اپنی وصیت میں ظلم کرتا ہے تو اس کے لیے برے عمل کے ساتھ مہر لگا دی جاتی ہے ۔ پس وہ دوزخ میں داخل ہو جاتا ہے اور کوئی آدمی ایسا ہوتا ہے جو ستر سال تک برے لوگوں والے عمل کرتا رہتا ہے ، لیکن وہ اپنی وصیت میں عدل کرتا ہے تو اس کے لیے اچھے عمل کے ساتھ مہر لگا دی جاتی ہے ۔ پس وہ جنت میں داخل ہو جاتا ہے ۔ راوی کا بیان ہے : حضرت ابو ہریرہ فرماتے ہ تھے : اگر تمہارا جی چاہے تو اللہ کے اس فرمان کی تلاوت کرو : " یہ اللہ کی حدیں ہیں " اس فرمان تک " اور اس کے لیے ذلت کا عذاب ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : سلام اللہ کے ناموں میں سے ایک نام ہے اس کو اپنے درمیان پھیلاؤ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم میں سے کسی کے برتن میں مکھی گرے تو اسے برتن میں ڈبوؤ کیونکہ اس کے ایک پر میں بیماری ہے اور دوسرے میں شفاء ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : روزے دار کے منہ کی خوشبو ، اللہ کے ہاں کستوری کی خوشبو سے زیادہ پاکیزہ ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : عمرو بن لحی بن قمعہ بن خندف رضی اللہ عنہ ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : امام ضامن اور مؤذن امانت والا ہوتا ہے ، اے اللہ ! ائمہ کو ہدایت دے اور مؤذنوں کو بخش دے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جو اللہ اور آخرت کے دن پر ایمان رکھتا ہے وہ اپنے پڑوسی کو تکلیف نہ دے ، جو اللہ اور آخرت کے دن پر ایمان رکھتا ہے وہ اچھی بار کرے یا خاموش رہے ، جو اللہ اور آخرت کے دن پر ایمان رکھتا ہے ، وہ مہمان کی عزت کرے ۔ صحابہ کرام نے عرض کی : یا رسول اللہ !عزت کتنے دن کرنی چاہیے ؟ آپ صلی اللہ علیہ و الہ وسلم نے فرمایا ؛ مہمان کی عزت تین رات تک کافی ہے ، جو اس کے بعد ہے ، وہ صدقہ ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم کی عادت مبارکہ تھی کہ آپ قضائے کیلئے بھی ایسے ہی سکون سے ٹھہرتے تھھے جس طرح کہ اپنے گھر میں اترنے کیلئے ٹھہرا کرتے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم آدمی کو کھڑے پانی میں پیشاب کرنے اور پھر اسی پانی سے وضو یا غسل کرنے سے منع فرمایا ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : بھلائی گھوڑے کی پیشانی میں قیامت کے دن تک کیلئے رکھی گئی ہے اور گھوڑے پر خرچ کرنے والا اس طرح ہے جس طرح خرچ کرنے والے کی مٹھی کبھی بند نہ ہو۔

حضرت ابو ہریرہ رضی اللہ عنہ فرماتے ہیں کہ رسول کریم صلی اللہ علیہ و الہ وسلم ایک دن ہمارے پاس تشریف لائے اس حال میں کہ آپ صلی اللہ علیہ و الہ وسلم فرما رہے تھے : " جب الحزن " سے اللہ کی پناہ مانگا کرو۔ صحابہ نے عرض کی : اے اللہ کے رسول ! " جب الحزن " سے کیا مراد ہے ؟ فرمایا : " جب الحزن " جہنم کی گہرائی میں ایک وادی ہے ، جس سے جہنم بھی ہر روز چار سو مرتبہ پناہ مانگتی ہے ۔ اللہ تعالیٰ نے اسے اپنے اعمال میں دکھاوا کرنے والے قاریوں کیلئے تیار کیا ہے ۔ بیشک اللہ کی مخلوق میں سے سب سے زیادہ ناپسندیدہ وہ قاری ہے ، جو حکمرانوں سے ملاقات کرتا ہے ۔