Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں : ہم مدینے آئے اور بنو غفار کے سباع بن عرفطہ نامی شخص کو مدینہ پر نائب بنایا گیا تھا ۔ پس ہم نے ان کی معیت میں نماز پڑھی۔ انہوں نے پہلی رکعت میں سورہ مریم اور دوسری میں سورہ مطففین پڑھی جبکہ ہم میں ایک توتلی زبان والا آدمی بھی تھا۔ پس جب ہم نماز سے فارغ ہوئے تو رسول کریم صلی اللہ علیہ و الہ وسلم کو پیچھے سے جا ملے جبکہ آپ صلی اللہ علیہ و الہ وسلم خیبر فتح کر چکے تھے ۔ پس لوگوں نے اجازت طلب کی کہ ہمارے لئے مال غنیمت تقسیم کیا جائے ۔ پس لوگوں کو اجازت مل گئی ۔ پس ہم میں مال غنیمت تقسیم کر دیا گیا۔

حضرت عکرمہ فرماتے ہیں کہ ہم نے حضرت ابو ہریرہ رضی اللہ عنہ کے پیچھے نماز پڑھی، آپ تکبیر کہتے اٹھتے بیٹھے ، میں نے اس کا ذکر حضرت عباس رضی اللہ عنہ کے ہاں کیا تو انہوں نے فرمایا : یہ ابو القاسم صلی اللہ علیہ و الہ وسلم کی سنت مبارکہ ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جو لوگوں کیلئے وہی پسند کرے جو لوگ پسند کرتے ہیں اور اللہ کی مخالفت کرے جس کو اللہ نا پسند کرتا ہے ، تو وہ اللہ سے ملے گا کہ اللہ اس سے ناراض ہو گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے پھینکنے اور چھونے کی بیع سے منع فرمایا ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے بغیر عذر کے تین جمعے نہیں پڑھے ، اس کے دل پر مہر لگا دی جائے گی۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم میں سے کوئی سفر کا ارادہ کرے تو اپنے بھائیوں کو سلام کرے کیونکہ ان کی دعا سے بھلائی میں اضافہ ہو گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : میرے دوست ابو القاسم صلی اللہ علیہ و الہ وسلم نے مجھے تین کاموں کی وصیت کی ،، میں ان کو ہر گز نہیں چھوڑتا ہوں : سونے سے پہلے وتر پڑھنے کی ، ہر ماہ تین روزے رکھنے کی اور نماز چاشت کی ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جو آدمی اپنے اونٹوں کی زکوٰۃ نہیں دیتا ہے ، وہ اونٹ قیامت کے دن اس کو کاٹے گا بہت زیادہ اور اپنے پاؤں کے ساتھ روندے گا، جب دوسرا روند کر گزرے گا تو پہلا دوبارہ ( روندنے ) آ جائے گا قیامت کا دن پچاس ہزار سال کی مقدار جتنا ہو گا۔ اور بکریوں اور سونے اور چاندی کی زکوٰۃ کے متعلق بھی اسی طرح ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اسلام کی خوبی یہ ہے کہ لا یعنی کاموں سے روکتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب اللہ عزوجل نے مخلوق کو پیدا کیا تو اپنے پاس کتاب میں لکھا کہ میرے غصہ پر میری رحمت غالب آ گئی یا سبقت لے گئی ۔

حضرت ابو ہریرہ رضی اللہ عنہ سے مروی ہے کہ ایک آدمی نے نبی کریم صلی اللہ علیہ و الہ وسلم کی خدمت میں حاضر ہو کر عرض کی : اے اللہ کے رسول ! بیشک میں اپنی بیٹی کی شادی کرنے والا ہوں اور میرا شوق ہے کہ آپ کسی چیز کے ساتھ میری مدد کریں ۔ فرمایا : میرے پاس تو کوئی چیز نہیں ہے ، لیکن جب آئندہ دن کی صبح ہو تو آ جانا اور کھلے منہ والی ایک بوتل اور درخت کی ایک لکڑی لے کر آنا۔ میرے اور تیرے درمیان نشانی یہ ہو گی کہ میں دروازے کے کنارے ملوں گا۔ راوی کا بیان ہے : پس کھلے منہ والی ایک بوتل اور درخت کی ایک لکڑی لے کر آیا۔ پس آپ صلی اللہ علیہ و الہ وسلم نے اپنے بازوؤں سے پسینہ اتار کر اس بوتل میں ڈالنا شروع کر دیا حتی کہ بوتل بھر گئی ۔ فرمایا : پکر لے اور اپنی بیٹی کو کہنا : جب خوشبو لگانے کا ارادہ کرے تو یہ لکڑی بوتل میں ڈال کر خوشبو لگا لے ۔ راوی کا بیان ہے : پس صورتحال یہ ہوئی کہ جب وہ خوشبو لگاتی تو پورے مدینے والے اس کی خوشبو سے مستفیض ہوتے تو انہوں نے اس کا نام ہی " خوشبو والوں کا گھر " رکھ دیا۔

حضرت ابو ہریرہ رضی اللہ عنہ فرماتے ہیں کہ رسول کریم صلی اللہ علیہ و الہ وسلم نے فرمایا : اپنے دوستوں کو اکٹھا کر ۔ پس میں مسجد میں ان میں سے ایک ایک آدمی کے پاس گیا۔ میں نے ان کو جگایا ۔ پس ہم سب مل کر نبی کریم صلی اللہ علیہ و الہ وسلم کے دروازے پر آ کر اندر داخل ہوئے تو ہمارے سامنے ایک پیالہ رکھا گیا، جس میں تقریباً دو مد جو کی گنجائش تھی ۔ پس آپ صلی اللہ علیہ و الہ وسلم نے ہم سے فرمایا : " اللہ کا نام لے کر کھاؤ !" اور رسول کریم صلی اللہ علیہ و الہ وسلم یہ بھی فرمایا ، جب پیالہ رکھا گیا کہ قسم ہے ، اس ذات کی ، جس کے قبضہ قدرت میں حضرت محمد صلی اللہ علیہ و الہ وسلم کی جان ہے ۔ آل محمد کے گھر میں اس سے بڑا کوئی برتن نہیں ہے ، جو آپ دیکھ رہے ہیں ۔ پس ہم نے کھایا یہاں تک کہ ہم سیر ہو گئے اور اس میں سے باقی بھی بچ گیا جبکہ ہم ستر ( 70) سے اسی (80) آدمی تھے ۔ حضرت ابو ہریرہ سے ان کے شاگردوں نے سوال کیا : جب تم اس سے فارغ ہوئے تو اس میں کوئی شی تھی ؟ فرمایا : ( قسم بخدا ! ) جتنا رکھا گیا ، اتنا ہی باقی تھا سوائے اس کے کہ اس میں انگلیوں کے نشان تھے ۔ اس حدیث کو ابو اسحاق بن سالم سے صرف انیس بن ابو یحییٰ نے ہی روایت کیا ہے ۔