Al Muajam Al Kabir Tibrani

حضور صلی اللہ علیہ و الہ وسلم نے فرمایا : دین غریبوں سے شروع ہوا تھا اور عنقریب غریبوں میں واپس آئے گا جس طرح شروع ہوا تھا ، غریبوں کیلئے خوشخبری ہے ۔

اسی سند سے آپ رضی اللہ عنہ فرماتے ہیں کہ رسول کریم صلی اللہ علیہ و الہ وسلم نے فرمایا : کیا تم جانتے ہو ، مفلس کون ہے ؟ صحابہ نے عرض کی : اے اللہ کے رسول ! ہمارے اندر وہ آدمی جس کے پاس دراھم اور سامان دنیا نہ ہو ۔ فرمایا : میرے امت کا مفلس وہ ہے ، جو قیامت کے دن روزے ، نمازیں اور صدقات لائے گا جبکہ اس نے کسی پر ظلم کمایا ہوگا، کسی کا مال کھایا ہوگا، کسی کو بے جا مارا ہوگا اور کسی کو گالی دی ہو گی۔ پس اسے بٹھا دیا جائے گا اور اس کی نیکیوں میں سے ایک ایک آدمی کو بدلہ دلوایا جائے گا۔ پس اگر اس کی نیکیاں ختم ہو جائیں گی تو دوسرے لوگوں کے گناہ لے کر اس پر ڈال دیئے جائیں گے اور ( آخرکار ) اسے جہنم میں ڈال دیا جائے گا۔

اور اسی سند کے ساتھ آپ رضی اللہ عنہ فرماتے ہیں : رسول کریم صلی اللہ علیہ و الہ وسلم نے فرمایا : اگر مومن کو معلوم ہو جائے کہ اللہ کے پاس کتنی سزا ہے ان میں سے کوئی بھی جنت کی طمع نہ کرے ، اگر کافر کو معلوم ہو جائے کہ اللہ کی رحمت کتنی ہے تو جنت سے نا امید نہ ہو، اللہ نے رحمت کے سو حصے بنائے ہیں ، پھر اس نے ایک رحمت کا حصہ دنیا میں اپنے بندوں کے درمیان اتارا، جس کے ذریعے وہ آپس میں رحم کرتے ہیں اور ننانوے حصے اپنے پاس رکھے ، یہ دنیا کی آگ جہنم کی آگ کے سو میں سے ایک حصہ ہے ۔

اور اسی سند کے ساتھ آپ رضی اللہ عنہ فرماتے ہیں : رسول کریم صلی اللہ علیہ و الہ وسلم نے فرمایا : بیشک ایک آدمی لمبا عرصہ جنتیوں والے اعمال کرتا رہتا ہے پھر اللہ تعالیٰ اس کا خاتمہ دوزخیوں والے اعمال پر فرماتا ہے تو اسے دوزخی بنا دیتا ہے اور بیشک ایک دوسرا آدمی لمبا عرصہ دوزخیوں والے اعمال کرتا رہتا ہے پھر اللہ تعالیٰ اس کا خاتمہ جنتیوں والے اعمال پر فرماتا ہے تو اسے جنتی بنا دیتا ہے ۔

اور اسی سند کے ساتھ آپ رضی اللہ عنہ فرماتے ہیں : رسول کریم صلی اللہ علیہ و الہ وسلم نے فرمایا : مجھے حکم دیا گیا کہ لوگوں سے جہاد کروں لا الہ الا اللہ محمد رسول اللہ پڑھنے تک اور جو میں لے کر آیا ، اس پر ایمان رکھنے تک ، جب وہ ایسا کریں گے تو انہوں نے مجھ سے اپنا خون اور مال بچا لیا مگر حق کے ساتھ ان کا حساب اللہ کے ذمہ ہے ۔

اور اسی سند کے ساتھ آپ رضی اللہ عنہ فرماتے ہیں : رسول کریم صلی اللہ علیہ و الہ وسلم نے فرمایا : دنیا مومن کیلئے قید خانہ ہے اور کافر کیلئے جنت ہے ۔

اور اسی سند کے ساتھ کہ رسول کریم صلی اللہ علیہ و الہ وسلم نے فرمایا : لوگوں پر ایسا زمانہ آئے گا کہ آدمی اپنے چچا کے بیٹے اور قریبی کو پکارے گا، آؤ ! کوشحالی کی طرف حالانکہ مدینہ ان کیلئے بہتر ہوگا اگر وہ جانتے ہوں ۔

اور اسی سند کے ساتھ آپ رضی اللہ عنہ فرماتے ہیں : رسول کریم صلی اللہ علیہ و الہ وسلم نے فرمایا : قیامت نہیں آئے گی جب تک مدینہ برے لوگوں کو نکال نہ دے گا جس طرح بھٹی لوے سے زنگ دور کرتی ہے ۔

اور اسی سند سے ہے کہ حضور صلی اللہ علیہ و الہ وسلم نے فرمایا : گرمی جہنم کی تپش سے ہے ، پس اس کو نماز کے ساتھ ٹھنڈا کرو۔

اور اسی سند کے ساتھ آپ رضی اللہ عنہ فرماتے ہیں : ایک آدمی نے عرض کی : یا رسول اللہ ! میرے رشتہ دار ہیں کہ میں ان سے جوڑتا ہوں اور وہ مجھ سے توڑتے ہیں ، میں ان سے بردباری سے پیش آتا ہوں اور وہ مجھ سے جہالت سے پیش آتے ہیں ، میں ان سے اچھا سلوک کرتا ہوں اور وہ مجھ سے برے طریقے سے پیش آتے ہیں ۔ آپ صلی اللہ علیہ و الہ وسلم نے فرمایا : اگر تو ایسے ہی ہے جس طرح تو کہتا ہے تو ہمیشہ تیرے ساتھ اللہ کی طرف سے ان کے خلاف ایک مددگار ہوگا جب تک تیر یہ رویہ رہے گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اللہ اور فرشتوں اور تمام لوگوں کی لعنت ہو اس آدمی پر جو کسی قوم کے غلام پر اس کے مالکوں کی اجازت کے بغیر دعویٰ کرے ۔

حضرت ابو ہریرہ رضی اللہ عنہ فرماتے ہیں کہ رسول کریم صلی اللہ علیہ و الہ وسلم نے فرمایا : بیشک اللہ تعالیٰ جب کسی بندے سے محبت فرماتا ہے تو حضرت جبرائیل علیہ السلام سے فرماتا ہے : بیشک میں فلاں سے محبت کرتا ہوں ، پس جبرائیل بھی اس سے محبت کرنا شروع کر دیتا ہے ۔ پس حضرت جبرائیل آسمان والوں میں منادی کرتے ہیں کہ اللہ تعالیٰ فلاں سے محبت کرتا، تم بھی اس سے محبت کرو ۔ پس وہ ا سے محبت کرتے ہیں پھر اسے زمین میں قبول عام عطا کیا جاتا ہے ۔