Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں : میرے خلیل حضرت ابو القاسم صلی اللہ علیہ و الہ وسلم نے مجھے تین کاموں کی وصیت کی جنہیں میں مرتے دم تک نہیں چھوڑوں گا : ہر ماہ تین روزے رکھنے کی، چاشت کی دو رکعت اور سونے سے پہلے وتر پڑھنے کی ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے لگاتار روزہ رکھنے سے منع فرمایا ، صحابہ کرام نے عرض کی : یا رسول اللہ ! آپ لگاتار روزہ رکھتے ہیں ۔ آپ صلی اللہ علیہ و الہ وسلم نے فرمایا : تم میری مثل نہیں ہو، میرا رب مجھے کھلاتا بھی ہے اور پلاتا بھی ہے ۔

حضرت ابو ہریرہ رضی اللہ عنہ فرماتے ہیں کہ ایک آدمی حضور صلی اللہ علیہ و الہ وسلم کے پاس آیا، اس نے عرض کی : میں نے جان بوجھ کر رمضان کا روزہ افطار کیا اور میں نے اپنی بیوی سے جماع کیا ۔ آپ صلی اللہ علیہ و الہ وسلم نے فرمایا : تو غلام آزاد کر ۔ اس نے عرض کی : میں اس کی طاقت نہیں رکھتا ہوں ۔ آپ صلی اللہ علیہ و الہ وسلم نے فرمایا : اونٹ صدقہ کر۔ اس نے عرض کی : میں طاقت نہیں رکھتا ، آپ صلی اللہ علیہ و الہ وسلم نے فرمایا : بیس صاع کھجور صدقہ کر، یا سترہ صاع یا اکیس صاع۔ اس نے عرض کی : میں طاقت نہیں رکھتا ۔ پھر حضور صلی اللہ علیہ و الہ وسلم کے پاس کھجوروں کا ٹوکرا لایا گیا جس میں بیس صاع کھجوریں تھیں تو آپ نے فرمایا : تو اسے صدقہ کر۔ اس نے عرض کی : مدینہ میں مجھ سے زیادہ کوئی ضرورت مند نہیں ہے ۔ آپ صلی اللہ علیہ و الہ وسلم نے فرمایا : تو اپنے گھر والوں کو کھلا دے ۔ ( تیر ا کفارہ ادا و جائے گا )

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : گھوڑے اور غلام پر صدقہ نہیں ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے عمرو بن جدعان سے فرمایا : جب تو جوتا خریدے تو اچھا سا خریدنا اور جب تو کپڑے خریدے تو عمدہ خریدنا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جہنم والوں میں سے دو قسم کے لوگ میں نے اس کے بعد نہیں دیکھے ، وہ عورتیں جو ننگی اور دوسروں کی طرف مائل ہونے والی اور دوسروں کو اپنی طرف متوجہ کرنے والیاں ہیں ، ان کے سروں پر بختی اونٹوں کے کوہانوں کی مانند بال ہیں اور وہ قوم جن کے بال ایسے ہے جیسے گاوں کی دُمیں نہ تو وہ جنت میں داخل ہوں گے ۔ اور نہ اس کی خوشبو سونگھ سکیں گے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے مجھے وتر پڑھے بغیر سونے سے منع فرمایا ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے کتاب میں میرے اوپر درود لکھا تو فرشتے مسلسل اس کیلئے دعاء استغفار کرتے رہیں گے ، جب تک کہ میرا نام کتاب میں رہے گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب اللہ نے عقل کو پیدا کیا تو اسے فرمایا : کھڑی ہو، وہ کھڑی ہوئی ، پھر اس کو فرمایا : تو پیچھے چل ، وہ چلی ، پھر اس کو فرمایا : بیٹھ جا ! تو وہ بیٹھ گئی ، فرمایا : میری عزت کی قسم ! میں نے تجھ سے بہتر چیز پیدا نہیں کی اور تجھ سے زیادہ عزت والی اور تجھ سے زیادہ افضل نہ تجھ سے زیادہ اچھی ، تیرے ذریعہ پکڑوں گا اور تیرے ذریعہ عطا کروں گا، تیرے ذریعہ پہچان جاؤں گا ، تیرے ذریعہ عذاب دوں گا، تیرے ذریعے ثواب دوں گا اور تیرے اوپر سزا کا دارومدار ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم کو چھینک آتی تو اپنا چہرہ مبارک ڈھانپ لیتے تھے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم میں سے کوئی اپنی شرمگاہ کی طرف اپنا ہاتھ لے جائے بغیر پردہ کے تو اس پر وضو واجب ہے ( یعنی ہاتھ دھو لے ) ۔

حضرت ابو ہریرہ سے مروی ہے : رسول کریم صلی اللہ علیہ و الہ وسلم نے فرمایا : میں نے اپنے رب سے اپنی امت کے لیے چار چیزوں کی اپیل کی ۔ پس میرے رب نے مجھے تین چیزیں عطا کیں اور ایک مانگنے سے روک دیا ۔ میں نے سوال کیا : میری امت ایک دم کافر نہ بن جائے تو یہ مجھے عطا کی ۔ میں نے اپنے رب سے سوال کیا کہ میری امت کے دشمن کو ان پر مسلط نہ فرمانا تو یہ مجھے عطا کیا۔ میں نے مانگا کہ میری امت کو اس طریقے سے عذاب نہ دینا جس سے پہلی امتوں کو عذاب دیا تو یہ بھی مجھے عطا کیا اور میں نے عرض کی کہ ان کے آپس میں جنگ اور لڑائی نہ ہو تو مجھے یہ مانگنے سے روک دیا۔