Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا :جس نے دنیا میں کسی مسلمان بھائی سے تکلیف کو دور کیا تو آخرت میں اللہ عزوجل اس سے تکلیف کو دور کرے گا اور جس نے کسی کے عیب کی پردہ پوشی کی تو اللہ عزوجل دنیا و آخرت میں اس کے عیب کی پردہ پوشی کرے گا اور اللہ اس بندہ کی مدد فرماتا ہے جو اپنے بھائی کی مدد کرتا ہے ۔

حضرت ابو ہریرہ فرماتے ہیں : حضرت ابو ذر اپنی بکریوں میں ہوتے تھے ، جو مدینہ میں تھیں، پس جب وہ آئے تو نبی کریم صلی اللہ علیہ و الہ وسلم نے ان سے فرمایا : اے ابو ذر ! وہ خاموش رہے ۔ آپ صلی اللہ علیہ و الہ وسلم نے دوبارہ فرمایا : تو وہ خاموش رہے ۔ فرمایا : اے ابو ذر ! تیری ماں تجھے روئے ( جواب کیوں نہیں دیتا ۔ ) عرض کی : میرا بدن پاک نہیں ہے ۔ پس انہوں نے اپنی لونڈی کو پانی لانے کے لیے کہا ۔ پس وہ لائی ۔ انہوں نے اپنی سواری کو پردہ بنا کر غسل کیا پھر نبی کریم صلی اللہ علیہ و الہ وسلم کی خدمت میں آئے تو نبی کریم صلی اللہ علیہ و الہ وسلم نے ان سے فرمایا : اگر تجھے بیس سال تک پانی نہ ملے تو پاک مٹی تجھے کافی ہے ۔ پس جب تو اسے پا لے تو اسے اپنی جلد پر لگا لے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : قیامت آنے سے پہلے حضرت عیسیٰ بن مریم تشریف لائیں گے ، آپ عدل کرنے والے بادشاہ ہوں گے اور انصاف کرنے والے قاضی ہوں گے ، آپ صلیب توڑیں گے اور خنزیر اور بندر کو قتل کریں گے اور جزیہ معاف کریں گے ، سجدہ سارے کا سارا ساری کائنات کو پالنے والے رب کو ہوگا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب نگاہ داخل ہو گئی تو اجازت کی ضرورت نہ رہی ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم اذا السماء انشقت ، میں سجدہ تلاوت فرماتے تھے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تم ضرور نیکی کے کاموں کا حکم کرو اور برائی کے کاموں سے منع کرو ، ورنہ تم پر برے لوگ مسلط ہوں گے ، پھر تمہارے نیک لوگ دعا کریں گے ، تمہارے حق میں دعا قبول نہیں ہو گی۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم کے پاس دو آدمیوں کو چھینک آئی ، ایک شریف تھا اور دوسرا تیز تھا ۔ آپ نے تیز والے کی چھینک کا جواب دیا، شریف کی چھینک کا جواب نہیں دیا۔ اس نے عرض کی : یا رسول اللہ ! آپ نے میری چھینک کا جواب نہیں دیا، یا اس کی چھینک کا جواب دیا۔ آپ صلی اللہ علیہ و الہ وسلم نے فرمایا : اس نے اللہ کا ذکر کیا ( یعنی چھینک آنے پر الحمد للہ کہا ) تو اللہ نے اسے یاد کیا تو اللہ عزوجل کو بھول گیا تھا ، تجھے بھلا دیا گیا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے شام کے وقت یہ کلمات پڑھے : " اعوذ بکلمات اللہ التامات کلھا من شر ما خلق" اس کو کوئی شی نقصان نہیں دے گی۔

حضرت ابو ہریرہ سے مروی ہے کہ انہوں نے فرمایا : میرے اس تھیلے میں ایک ایسی حدیث ہے کہ اگر میں اس کو بیان کروں تو تم مجھے پتھر مارو پھر کہا : اے اللہ مجھے ساٹھ ہجری کے آخر تک زندہ رکھنا ۔ لوگوں نے سوال کیا : ساٹھ ہجری کے آخر میں کیا ہو گا؟ فرمایا : بچوں کی حکومت ، فیصلے کو بیچنا، شرطوں کی کثرت، اور جان پہچان کی بنیاد پر گواہی دینا اور لوگ امانت کو مال غنیمت سمجھیں گے اور صدقہ دینے کو چٹی سمجھیں گے ۔ ایک گروہ ایسا ہوگا، جو قرآن کو مزامیر بنا لے گا۔ حماد کا قول ہے : میرا گمان ہے کہ کہا : خون کے سلسلے میں سستی کی جائے گی۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اگر آسمان اور زمین والے سارے مل کر ایک مسلمان آدمی کو قتل کریں تو اللہ عزوجل ان سب کو جہنم میں اوندھے منہ گرائے گا۔

حضرت عبداللہ رومی ، حضرت ابو ہریرہ کے بارے میں روایت کرتے ہیں ، کہ وہ مدینہ کے بازار سے گزرنے لگے تو کھڑے ہو کر فرمایا : اے بازار والو ! تم کس قدر عاجز ہو ؟ انہوں نے عرض کی : اے ابو ہریرہ ! کیا بات ہے ؟ فرمایا : یہ اللہ تعالیٰ کے رسول صلی اللہ علیہ و الہ وسلم کی میراث تقسیم ہو رہی ہے اور تم یہاں ہو کر وہاں اپنا حصہ حاصل کرنے کے لیے نہیں جاتے ۔ کہا، وہ کہاں ہے ؟ فرمایا : مسجد میں ہے ۔ پس وہ جلدی جلدی نکل کر مسجد میں گئے اور حضرت ابو ہریرہ ان کے آنے تک وہیں ٹھہر گئے ۔ ان سے فرمایا : تمہیں کیا ہے؟ انہوں نے عرض کی : اے ابو ہریرہ ! ہم مسجد میں جا کر داخل ہوئے ، پس ہم نے تو اس میں کوئی شی نہیں دیکھی ، جو پیش کی جا رہی ہو۔ پس حضرت ابو ہریرہ نے ان سے فرمایا : کیا تم نے مسجد میں کسی آدمی کو دیکھا ؟ انہوں نے عرض کی : کیوں نہیں ہم نے ایک گروہ کو دیکھا جو نماز پڑھ رہا تھا ۔ ایک گروہ قرآن پڑھ رہا تھا اور ایک گروہ حلال و حرام کے بارے میں مذاکرہ کر رہے تھے ۔ پس حضرت ابو ہریرہ نے ان سے فرمایا : تمہیں افسوس ! یہی تو حضرت محمد صلی اللہ علیہ و الہ وسلم کی میراث تھی ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے کسی کو ظلماً کوڑا مارا، قیامت کے دن اس سے قصاص لیا جائے گا۔