Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : دو بھوکے بھیڑیے بکریوں کے ریوڑ میں رات گزاریں، اور بکریوں کے مالک اس سے غافل ہوں، وہ تیزی سے کھائیں تو اتنا نقصان نہیں کریں گے جتنا کوئی مال اور عزت کا بھوکا ، اسلام کا نقصان کرتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے یقین کے ساتھ " لا الہ الا اللہ محمد رسول اللہ " پڑھا وہ جنت میں داخل ہوگا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : انسان کا سارا جسم گل جائے گا۔ سوائے ریڑھ کی ہڈی کی ، قیامت کے دن لوگ اس پر سوار ہوں گے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم منبر پر کھڑے ہوئے ، آپ کے دست مبارک میں کتاب تھی ، فرمایا : میں یہ کتاب اس آدمی کو دوں گا جو اللہ اور اس کے رسول سے محبت کرتا ہو گا اور اللہ اور اس کا رسول اس سے محبت کرتے ہوں گے ، اے عثمان بن ابو العاص ! کھڑا ہو۔ حضرت عثمان بن ابو العاص رضی اللہ عنہ کھڑے ہوئے ، آپ نے وہ کتاب ان کو دے دی ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے حضرت عمرو بن جدعان سے فرمایا : جب تو جوتا خریدے تو عمدہ قسم کا لے اور جب تو کپڑا خریدے تو اچھی قسم کا کپڑا خرید۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : مشرق اور مغرب کے درمیان قبلہ ہے ۔

حضرت ابو ہریرہ رضی اللہ عنہ فرماتے ہیں کہ ایک آدمی نے حضور صلی اللہ علیہ و الہ وسلم کی بارگاہ میں اپنے حافظہ کی کمزوری کے متعلق عرض کی ، آپ صلی اللہ علیہ و الہ وسلم نے فرمایا : اپنے دائیں سے اپنے حفظ پر مدد مانگا کر ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اپنی چادر ( جھولی ) پھیلا ۔ میں نے چادر پھیلائی تو رسول کریم صلی اللہ علیہ و الہ وسلم نے سارا دن مجھے حدیثیں سنائیں پھر میری چادر میں ڈالا، جس کو میں نے اپنے سینے سے لگا لیا تو اس کے بعد میں کبھی کوئی چیز نہیں بھولا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب فجر طلوع ہو جائے تو صرف نماز فجر کی دو سنتیں ہی جائز ہیں ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے نماز مغرب کے بعد چھ رکعتیں ادا کیں ، ان کے درمیان کسی سے گفتگو نہیں کی تو اس کو بارہ سال کی عبادت کرنے کا ثواب ملے گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : ہر شی کا کوڑا کچرا ہوتا ہے ، مسجد کا کوڑا کچرا ، لا واللہ ، و بلیٰ و اللہ ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم میں سے کوئی نماز کیلئے وضو کرے تو انگلیوں کو انگلیوں میں نہ ڈالے ۔