Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : شراب اور اس کی قیمت اور خنزیر اور اس کی قیمت اور مردار اور اس کی قیمت حرام ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : مؤذن کی جہاں تک آواز جاتی ہے ، اس کی بخشش ہو جاتی ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب میری امت کے لوگ تکبر کرتے ہوئے چلیں اور ان کی خدمت فارس اور روم کے لوگ کریں ، ان پر بعض کو بعض پر مسلط کیا جائے گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اللہ تبارک و تعالیٰ ارشاد فرماتا ہے : مجھے میرے بندوں میں وہ پسند ہیں جو جلدی افطار کرتے ہیں ۔ ( وقت ہو جانے کے بعد )

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تین باتوں میں ساتھی کی عیادت نہ کرنے میں کوئی حرج نہیں ہے ، آنکھ کا درد ( آشوب چشم) ڈاڑھ درد اور پھنسی پھوڑے والے کی ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : دنیا میں نیکی کرنے والے آخرت میں نیک ہوں گے ، دنیا میں برائی کرنے والے آخرت میں بھی برے ہوں گے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم کو فرماتے ہوئے سنا : آگ سے پکی ہوئی شی کھانے کے بعد وضو کرو ( یعنی ہاتھ دھو لو ) ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم میں سے کوئی اپنی بیوی سے جماع کرے تو پردہ کرے ، اگر پردہ نہیں کرے گا تو فرشتے حیاء کرتے ہوئے نکل جائیں گے اور شیطان آ جائے گا، اگر بچہ ہوا تو اس میں شیطان کی شرکت ہو گی۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اللہ عزوجل فرماتا ہے : جب میں اپنے بندے کی دو محبوب چیزیں ( آنکھیں ) لے لیتا ہوں اور وہ ثواب حاصل کرنے کی نیت سے صبر کرتا ہے ، تو ان کے بدلے میں اسے جنت دوں گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے دنیا میں مسلمان کی تکلیف کو دور کیا تو اللہ عزوجل قیامت کے دن اس کی تکلیف دور کرے گا، جس نے مسلمان کے عیب پر پردہ ڈالا تو اللہ عزوجل اس کے عیب پر پردہ ڈالے گا، جو اپنے بھائی کی ضرورت پوری کرے تو اللہ عزوجل اس بندہ کی ضرورت پوری کرے گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : بلال کی مثال شہد کی مکھی کی سی ہے ، جو میٹھی کڑوی ہر چیز کو کھاتی ہے پھر وہ ساری کی ساری میٹھی ہو جاتی ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم سے گم شدہ بکری کے متعلق پوچھا گیا آپ نے فرمایا : وہ تیرے لیے ہے یا بھیڑیے کیلئے یا تیرے بھائی کیلئے ۔ پھر آپ صلی اللہ علیہ و الہ وسلم سے گم شدہ اونٹ کے متعلق پوچھا گیا تو آپ نے فرمایا : تجھے اس سے کیا غرض ہے ؟ اس کے ساتھ اس کا مشکیزہ اور اس کے (پاؤں میں ) جوتے ہیں ، اس کا مالک آنے تک اس کو چھوڑ دے ۔