Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : بھاؤ نہ بڑھاؤ ، آپس میں غصہ نہ کرو، حسد نہ کرو، تدبیر نہ کرو، اللہ کے بندو ! بھائی بھائی بن جاؤ، جس طرح اللہ نے تمہیں حکم دیا ہے ۔

حضرت ابو ہریرہ رضی اللہ عنہ فرماتے ہیں کہ ایک آدمی نے عرض کی : یا رسول اللہ صلی اللہ علیہ و الہ وسلم ! میں نے آج رات آپ صلی اللہ علیہ و الہ وسلم کو دعا کرتے ہوئے سنا ہے ، جو مجھ تک آپ کے حوالہ سے پہنچی ہے ، آپ صلی اللہ علیہ و الہ وسلم اللہ کی بارگاہ میں عرض کر رہے تھے : " اللھم اغفرلی ذنبی الیٰ آخرہ " ۔ فرمایا : کیا تو سمجھتا ہے کہ ان میں کوئی چیز چھوڑ دی ہے ؟

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم میں سے کوئی کسی قوم کے پاس آئے اور لوگ بیٹھے ہوئے ہوں تو ان کو سلام کرے ، جب اپنی ضرورت پوری کر لے اور کھڑا ہونے کا ارادہ کرے تو سلام کرے ، پہلا دوسرے سے زیادہ حقدار ہے ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے مجھ سے فرمایا : اے ابو ہریرہ ! اللہ کی تقسیم پر راضی ہو جا، مالدار ہو جائے گا۔ متقی ہو جا، اللہ کا بندہ بن جائے گا، اور لوگوں کیلئے وہی پسند کر جو اپنے لئے کرتا ہے مومن ہو جائے گا۔ اور ہمسایوں سے اچھا سلوک کر مسلمان ہو جائے گا۔ اور بہت زیادہ ہنسنے سے پرہیز کر کیونکہ یہ دل کو مردہ کرتا اور قہقہہ شیطان کی طرف سے ہوتا ہے اور تبسم اللہ کی طرف سے ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : رکوع و سجود مکمل نہ کرنے والے کی نماز نہیں ہوتی ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے یہ دعا کی : اے اللہ ! حاجیوں کو بخش دے اور جو حاجی کیلئے دعا کرے اس کو بھی بخش دے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : میرے گھر اور منبر کے درمیان والی جگہ جنت کے باغوں میں سے ایک باغ ہے ، میرا منبر جنت کی کیاریوں میں سے ایک کیاری ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تم اپنے مردوں کو لا الہ الا اللہ کی تلقین کرو اور پڑھو : " الثبات الثبات ، ولا قوۃ الا باللہ " ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : انبیاء علیہم السلام اپنی قبروں سے قیامت کے دن اپنی سواریوں پر اٹھیں گے ، حضرت صالح علیہ السلام اپنی اونٹنی پر ، میرے دونوں شہزادے حسن و حسین میری غضباء نامی اونٹنی پر، حضرت علی براق پر سوار ہوں گے جس کے پاؤں وہاں پہنچیں گے جہاں اس کی نظر پڑے گی، حضرت بلال جنت کی اونٹنی پر سوار ہوں گے ، اذان دیں گے اور حق کے ساتھ گواہی دیں گے ، جب " اشھدان محمداً رسول اللہ " پڑھیں گے تو اولین و آخرین ایمان والے گواہی دیں گے ، قبول کر لیا جس نے قبول کرنا ہے اور رد کیا جس نے رد کرنا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : مؤمن کی روح لٹکتی رہتی ہے ، قرض ادا نہ کرنے کی بناء پر جب قرض ادا ہوگا، تب جان چھوٹے گی ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے خیانت کا ذکر کیا ، آپ نے فرمایا : خیانت سے بچو ، تم میں سے جو کوئی خیانت کرے گا وہ قیامت کے دن آئے گا، اونٹ اس کی گردن پر بلبلا رہا ہوگا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تم ایسے زمانہ میں ہو جو دس کام چھوڑے اس کے ہلاک ہونے کا خوف نہیں ، عنقریب ایسا زمانہ آئے گا کہ دس کام کریں گے پھر بھی پوری نہیں پڑے گی۔