Al Muajam Al Kabir Tibrani

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : جس نے لا الہ الا اللہ پڑھ لیا تو اسے زندگی میں ایک دن ضرور نفع ہو گا خواہ سختی آنے کے بعد ہی ہو ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے حضرت علاء الحضرمی رضی اللہ عنہ کو بحرین بھیجا تو میں ان کے پیچھے چلا گیا۔ میں نے ان کی باتوں کو نوٹ کیا اور میں نہیں جانتا کہ ان میں زیادہ عجیب کونسی ہے ۔ جب ہم دریا کے کنارے پہنچے تو انہوں نے کہا : اللہ کا نام لو اور اونٹوں کو ڈال دو ۔ ہم نے بسم اللہ پڑھی اور اونٹوں کو ڈال دیا۔ پھر ہم نے دریا عبور کیا لیکن ہمارے اونٹوں کے سموں کے علاوہ کچھ بھی گیلا نہ ہوا۔ پھر ہم ایک بیابان میں سے گزرے تو ہمارے پاس پانی نہ تھا ہم نے ان کی پانی کی شکایت کی تو انہوں نے نماز پڑھی اور لوگوں نے بھی ان کے ساتھ دو رکعتیں پڑھی پھر انہوں نے اللہ سے دعا کی تو بادل کا ٹکڑا آیا اور اس نے ہم پر خوب پانی برسایا ، ہم نے پانی پیا اور خوب سیراب ہوئے ۔ اور ان کا وصال ہو گیا تو ہم نے انہیں ریت میں دفن کر دیا جب ہم تھوڑی دور گئے تو سوچا کہ انہیں کوئی درندہ نہ کھا جائے ۔ جب ہم واپس لوٹ کر آئے تو ہم نے انہیں وہاں نہ پایا ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم ہمارے پاس تشریف لائے اور فرمایا : اپنی ڈھال پکڑ لو۔ ہم نے عرض کی : یا رسول اللہ صلی اللہ علیہ و الہ وسلم کیا دشمن آ گیا ہے ؟ آپ صلی اللہ علیہ و الہ وسلم نے فرمایا : اپنے لئے جہنم سے ڈھال پکڑ لو ۔ تم سب کہو " سبحان اللہ و الحمد للہ ولا الہ الا اللہ و اللہ اکبر ولا حول و لا قوۃ الا باللہ " بے یہ شک کلمات قیامت کے دن آگے اور پیچھے سے آئیں گے اور نجات دلانے والے بن کر آئیں گے اور بے شک یہی باقی رہ جانے والی نیکیاں ہیں ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : جنت کی خوشبو پانچ سو سال کی مسافت سے سونگی جا سکتی ہے لیکن اپنے عمل پر احسان جتلانے والا، عادی شرابی اور ماں باپ کا نافرمان اسے خوشبو کو سونگھ نہ سکے گا۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : جہنم میں جو بندے اکٹھے نہیں ہونگے : ایک وہ شخص جس نے اپنے ساتھی کو تکلیف پہنچائی اور دوسرا وہ مسلمان جس نے کسی کافر کو قتل کیا پھر مسلمان کی راہنمائی کی اور اس سے اچھا سلوک کیا ۔ اور کسی مومن کے پیٹ میں اللہ کی راہ میں چلنے کا گرد و غبار اور جہنم کا دھواں اکٹھا نہیں ہوگا۔ اور کسی مومن کے پیٹ میں ایمان اور حسد اکٹھے نہیں ہو سکتے ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : جس نے دن یا رات میں کسی بھی وقت اللہ کے رضا کیلئے سورۃ یٰس تلاوت کی اسے بخش دیا گیا۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : جس سے کوئی علم کی بات پوچھی گئی اور اس نے چھپا لیا تو اسے قیامت کے دن آگ کی لگام ڈالی جائے گی۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : بڑھ چڑھ کر بولیاں نہ لگا اور کوئی شخص اپنے بھائی کی بیع پر بیع نہ کرے اور کوئی شہری دیہاتی کیلئے بیع نہ کرے اور کوئی آدمی اپنے بھائی کی منگنی پر منگنی نہ کرے اور کوئی عورت اپنی بہن کی طلاق کا مطالبہ نہ کرے تاکہ اس کے برتن میں منہ مار سکے ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : جس نے دو گھوڑوں کے درمیان ایک گھوڑا داخل کیا اور اسے یقین ہے کہ یہ جیتے گا تو یہ جوا ہے ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : قرآن مجید میں جھگڑا کرنا کفر ہے ۔

حضرت ابو ہریرہ رضی اللہ عنہ بیان کرتے ہیں کہ مجھے میرے خلیل حضرت ابو القاسم صلی اللہ علیہ و الہ وسلم نے تین باتوں کی وصیت فرمائی : ہر مہینے میں تین روزے رکھنا ۔ جمعہ کے دن غسل کرنا ۔ اور سونے سے پہلے وتر پڑھنا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : قیامت کے دن سخت عذاب اس عالم کو ہو گا جس کے علم سے نفع نہ اٹھایا جائے ۔