Al Muajam Al Kabir Tibrani

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: پیٹ کی بیماری میں اور ڈوب کر مرنے والا شہید ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: منافق میں دو باتیں جمع نہیں ہو سکتی ہیں: اچھا اخلاق اور دین میں سمجھ۔

حضرت ابو ہریرہ رضی اللہ تعالیٰ عنہ روایت کرتےہیں کہ حضور صلی اللہ علیہ وآلہ وسلم نے فرمایا: جس نے معاہدہ والے کو بلا وجہ قتل کیا وہ جنت کی خوشبو بھی نہیں پائے گا حالانکہ جنت کی خوشبو سو سال کی مسافت سے محسوس کی جائے گی۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضرت عائشہ اور حضرت حفصہ رضی اللہ تعالیٰ عنہما کو تحفہ دیا گیا' دونوں روزہ کی حالت میں تھیں' دونوں نے اس سے کھالیا' دونوں نے اس کا ذکر حضور صلی اللہ علیہ وآلہ وسلم سے کیا تو آپ صلی اللہ علیہ وآلہ وسلم نے فرمایا: اس کی جگہ قضاء کرو اور اعادہ نہ کرو۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا : تم میں سے کوئی ہر گز یہ نہ کہے کہ میں نے کھیتی کو بڑھایا (کیونکہ یہ اللہ کا کام ہے) ' بلکہ یہ کہے کہ میں نے کھیتی باڑی کے لئے ہل چلایا۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: گرمی کے موسم میں نماز ٹھنڈی کر کے پڑھو کیونکہ سخت گرمی جہنم کی تپش سے ہے ' یا فرمایا : جہنم کے دروازے کھولے جاتے ہیں ۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: تم اپنے گھروں کو قبرستان نہ بناؤ' نہ میری قبر کو عید بناؤ (کہ کہیں سال بعد حاضری دو) اور میری بارگاہ میں درود پڑھو کیونکہ تمہارا درود میری بارگاہ تک پہنچ جاتا ہے' خواہ تم کہیں بھی ہو۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: کسریٰ ہلاک ہو گا' اس کے بعد کوئی کسریٰ نہیں ہو گا کیونکہ اس نے کہا: میں بادشاہوں کا بادشاہ ہوں' قیصر ہلاک ہو گا اور اس کے بعد کوئی قیصر نہ ہو گا کیونکہ اس نے کہا تھا : میں بادشاہوں کا بادشاہ ہوں۔ (بادشاہوں کا بادشاہ اللہ ہے۔ )

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جو اللہ سے ڈرے گا تو وہ جنت میں داخل ہو گا' اس میں ایسی نعمتیں ہیں جو کبھی پرانی نہیں ہوں گی اور زندگی میں مرنا نہیں ہو گا' اس کے کپڑے پرانے بھی نہیں ہوں گے' جوانی ختم نہیں ہو گی۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے لونڈی کی کمائی سے منع فرمایا ' ہاں کوئی کام ہو تو جائز ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: دشمن سے ملاقات کی تمنا کبھی نہ کرو' تم نہیں جانتے ہو کہ اس میں کیاہے۔

حضور صلی اللہ علیہ وآلہ وسلم نے فرمایا: ہر نماز میں قرأت ہے اگرچہ سورۂ فاتحہ ہو' حضور صلی اللہ علیہ وآلہ وسلم نے جو کام اعلانیہ کیا تو ہم اعلانیہ کرتے ہیں جو پوشیدہ کیا' ہم پوشیدہ کرتے ہیں۔