Al Muajam Al Kabir Tibrani

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: قیامت کے دن اللہ عزوجل سب سے پہلے حقوق العباد سے فیصلہ کرے گا' سینگ والے بکرے سے بغیر سینگ والے بکرے کو انصاف دلائے گا۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: زکوٰۃ مال دار اور اس کے علاوہ کے لئے جو کہ ضرورت مند نہ ہو' اس کے لئے جائز نہیں ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جمعہ کے دن نیکیوں میں اضافہ کیا جاتا ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جس نے اپنے بھائی کے عیب پر پردہ ڈالا' قیامت کے دن اس کو ایک نیکی ملے گی۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: میری امت کا ایک گروہ ہمیشہ اللہ کے دین پر قائم رہے گا' جو ان کی مخالفت کرے گا، اس کو نقصان نہیں دیں گے' وہ اللہ تعالیٰ کے دشمنوں سے لڑیں گے' جب وہ لوگ چلے جائیں گے تو اللہ دوسری قوم کو لائے گا' اللہ عزوجل ان کو بلند کرے گا' ان کو اپنی جانب سے رزق دے گا، قیامت کے آنے تک' پھر حضور صلی اللہ علیہ وآلہ وسلم نے فرمایا: وہ شام والے ہیں۔

حضرت ابو ہریرہ رضی اللہ تعالیٰ عنہ فرماتے ہیں: کہ رسول کریم صلی اللہ علیہ وآلہ وسلم نے بنو تمیم کے بارے میں تین چیزیں سنیں تو اس کے بعد کبھی بھی بنو تمیم سے بغض نہیں رکھا۔ حضرت عائشہ نے نذر مانی کہ حضرت اسماعیل علیہ السلام کی اولاد سے غلام آزاد کریں گی۔ بنو عنبر کے قیدی لائے گئے۔ رسول کریم صلی اللہ علیہ وآلہ وسلم نے ان سے فرمایا: اگر تجھے پسند ہے کہ اولاد اسماعیل سے غلام آزاد کرے تو ان میں سے آزاد کر لے۔ پس نبی کریم صلی اللہ علیہ وآلہ وسلم نے انہیں حضرت اسماعیل کی اولاد سے قرار دیا۔ بنو سعد کے صدقہ کے اونٹ آئے۔ پس جب ان کا حسن آپ کو پسند آیا تو فرمایا: یہ میری قوم کے صدقت ہیں۔ پس رسول کریم صلی اللہ علیہ وآلہ وسلم نے انہیں اپنی قوم فرمایا اور فرمایا: جنگوں میں یہ تمام لوگوں سے زیادہ قتال کرنے والے ہیں۔

حضرت نعیم بن حصین سدوسی کے چچا زیاد نے ان کے دادا سے روایت کی: فرماتے ہیں: نبی کریم صلی اللہ علیہ وآلہ وسلم مدینے میں تھے ۔ میرے پاس اونٹ تھے۔ میں مدینے آیا تو میں نے عرض کی: اے اللہ کے رسول ! غائط والوں کو حکم فرمائیں کہ میری خاندان سے اچھا سلوک کریں اور میری مدد کریں۔ کہا وہ میرے ساتھ کھڑے ہوئے۔ پس جب میں نے اپنا اونٹ بیچا تو میں نبی کریم صلی اللہ علیہ وآلہ وسلم کی بارگاہ میں آیا۔ آپ نے مجھ سے فرمایا: میرے قریب ہو۔ پس آپ نے میری پیشانی پر ہاتھ پھیرا اور تین بار میرے لیے دعا فرمائی۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: کسی کے لئے جائز نہیں ہے کہ اپنے پڑوسی کو اپنی دیوار پر شہتیر (یعنی گاڈر وغیرہ) رکھنے سے منع کرے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جو رحم نہیں کرتا ہے اس پر رحم نہیں کیا جاتا ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم جمعہ کے دن نماز ِ فجر میں الم تنزیل اور ھل اتیٰ پڑھتے تھے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: تم میں سے کوئی بھی اپنے عمل کی وجہ سے جنت میں جائے گا' نہ جہنم سے نجات پائےگا۔ صحابہ کرام نے عرض کی: یا رسول اللہ ! آپ بھی؟ آپ صلی اللہ علیہ وآلہ وسلم نے فرمایا: میں بھی نہ جاتا، لیکن اللہ عزوجل نے اپنی رحمت سے مجھے ڈھانپ لیا ہے۔

حضرت ابو ہریرہ رضی اللہ تعالیٰ عنہ سے مروی ہے کہ رسول کریم صلی اللہ علیہ وآلہ وسلم نے فرمایا: جس نے مجھے خواب میں دیکھا، اس نے مجھے ہی دیکھا۔