Al Muajam Al Kabir Tibrani

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جو بات کرتےوقت چھینک آ جائے' تو وہ بات درست ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: اللہ عزوجل اس امت کے لئے ہر سو سال کے بعد ایک شخص پیدا ہو گا، جو اس کے لئے اس کے دین کا مجدد ہو گا۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: اللہ عزوجل فرماتا ہے: میں شرک کرنے والوں کے شرک سے بے پرواہ ہوں ' جس نے کوئی عمل شرک والا کیا تو میں اس سے بری ہوں' یہ عمل اس کے لئے ہو گا، جس کو اس نے شریک بنایا۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے ہمیں منع فرمایا کہ ہم میں سے کوئی کھڑے ہو کر جوتی پہنے اور ہڈی سے استنجا کرے یا اس چیز کے کے ساتھ جو پیٹ سے نکلتی ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: بے شک یہود و نصاریٰ (اپنے بالوں کو ) مہندی نہیں لگاتے، تم ان کی مخالفت کرو۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جس شخص کو اللہ تعالیٰ نعمت عطا کرے، وہ کثرت سے شکر ادا کرے۔ جس کے غم زیادہ ہوں، وہ استغفار کی کثرت کرے۔ جس کا رزق کم ہو، وہ "لا حول ولا قوۃ الا باللہ" کثرت سے پڑھے جس کسی قوم کے پاس اترے تو وہ نفلی روزہ رکھے تو ان کو بتا کر بتا کر رکھے۔ جو کسی کے گھر میں داخل ہو تو جہاں گھر والے کہیں' وہاں بیٹھے ، کیونکہ گھر والے اپنے گھر کی پردے والی جگہ کو زیادہ جاننے والے ہیں اور وہ گناہ جو گناہ کرنے والے پر ناراضگی لاتے ہیں : 1۔ کینہ۔ 2 ۔ حسد ۔ 3۔ عبادت میں سستی۔ 4 ۔ معاش میں تنگی۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: اللہ عزوجل ہر بنی آدم سے قیامت کے دن وہ بات پوچھے گا ' جس اس سے ہوئی ہو گی' اللہ عزوجل چاہے تو انہیں معاف کرے یا عذاب دے' سوائے حضرت یحییٰ بن زکریا علیہما السلام کے' کیونکہ آپ سردار تھے اور گناہوں سے الگ رہنے والے تھے اور صالحین نبیوں سے تھے۔ حضور صلی اللہ علیہ وآلہ وسلم نے زمین کے تنکے کی طرف اشارہ کر کے فرمایا: ان کا ذکر اس تنکے کی مثال ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جو زیادہ مسکرائے گا، اس کا حق کم ہوگا' جو زیادہ دعوت قبول کرے گا اس کا جلال چلا جائے گا' جو زیادہ مذاق کرے گا، اس کا وقار چلا جائے گا' جو نہار منہ پانی پئے گا ، اس کی قوت باہ کمزور ہو جائے گی۔ جس کا کلام زیادہ ہوا، اس کی بکواسات زیادہ ہوئیں، جس کی بکواسات زیادہ ہوئیں اس کی غلطیاں زیادہ ہوئیں اور جس کی غلطیاں زیادہ ہوئیں ، اس کو جہنم جانا، زیادہ مناسب ہو گا۔

حضرت ابو ہریرہ رضی اللہ تعالیٰ عنہ روایت کرتے ہیں کہ میں رسول کریم صلی اللہ علیہ وآلہ وسلم کی معیت میں ایک دن بازار میں داخل ہوا تو آپ صلی اللہ علیہ وآلہ وسلم نے کپڑا فروشوں کےپاس تشریف رکھی اور چار درہم کے بدلے ایک پاجامہ خرید فرمایا۔ بازار والوں کے پاس تولنے والا ہوتا ہے۔ راوی کا بیان ہے کہ آپ صلی اللہ علیہ وآلہ وسلم نے اس سے فرمایا: اس طرح وزن کیا کر کہ چیز والی طرف جھکی ہوئی ہو۔ وزن کرنے والے نے عرض کی: بے شک یہ ایسی بات ہے، جو میں نے کسی فرد بشر سے کبھی نہیں سنی۔ حضرت ابو ہریرہ فرماتے ہیں: میں نے کہا: تجھے اپنے دین میں اس قدر جفا کافی ہے کہ تو اپنے نبی کو بھی نہیں پہچانتا ۔ اس نے ترازو ہاتھ سے چھوڑ دیا اور نبی کریم صلی اللہ علیہ وآلہ وسلم کے ہاتھ کی طرف لپکا تاکہ اس کو بوسہ دے سکے۔ رسول کریم صلی اللہ علیہ وآلہ وسلم نے اس سے اپنا ہاتھ چھڑا لیا اور فرمایا: یہ وہ کام ہے، جو عجمی لوگ اپنے بادشاہوں سے کرتے ہیں۔ بے شک میں تم میں سے ہی ایک آدمی ہوں۔ تو وزن کر اور ترازو کو جھکا۔ رسول کریم صلی اللہ علیہ وآلہ وسلم نے پاجامہ لے لیا۔ حضرت ابو ہریرہ فرماتے ہیں: میں اسے اٹھانے کے لئے آگے ہوا۔ فرمایا: چیز کا مالک ، اپنی چیز کو اٹھانے کا زیادہ حقدار ہو تاہے مگر یہ کہ وہ اٹھا نہ سکے (یعنی وہ چیز بھاری ہو) تو اس کا مسلمان بھائی، اس کی امداد کرے۔ فرماتے ہیں:میں نے عرض کی: اے اللہ کے رسول ! آپ بھی پاجامہ پہنتے ہیں؟ فرمایا: ہاں۔ رات اور دن میں، سفر اور حضر میں ، کیونکہ مجھے شرمگاہ چھپانے کا حکم دیا گیا ہے۔ میں نے کوئی چیز اس سے زیادہ چھپانے والی نہیں پائی۔

حضرت ابو ہریرہ رضی اللہ تعالیٰ عنہ روایت کرتے ہیں: رسول کریم صلی اللہ علیہ وآلہ وسلم نے فرمایا کہ انبیاء میں سے ایک نبی نے ایک شہر والوں کا محاصرہ فرمایا یہاں تک کہ ان کو خوف ہوا کہ وہ اسے فتح کر لیں گے، لیکن ڈر یہ ہے کہ سورج غروب ہو جائے گا ۔ فرمایا: اے سورج ! تو بھی مأمور ہے اور میں بھی مأمور آدمی ہوں ۔ میں تجھے قسم دیتا ہوں کہ تو دن کی ایک گھڑی ٹھہر جا۔ فرمایا: اللہ تعالیٰ نے ان کی خاطر سورج کو روک دیا یہاں تک کہ انہوں نےشہر فتح کر لیا اور لوگوں کا طریقہ تھا کہ جب وہ غنیمت کے مال پا لیتے تو انہیں قربانی کے لئے پیش کرتے۔ آگ آتی اور انہیں کھا جاتی۔ (یہ قبولیت کی نشانی تھی) پس (اس بار) جب انہوں نے پا لیا، جو پالیا تو (مال قربانی کے لئے ) رکھ دیئے ، لیکن آگ نہ آئی تاکہ ان کو کھائے۔ انہوں نے عرض کی: اے اللہ کی نبی ! کیا وجہ ہے کہ ہماری قربانیاں قبول نہیں ہو رہی ہیں۔ فرمایا: تم نے مال میں خیانت کی ہے۔ عرض کی: اے اللہ کے نبی ! اس وقت ہم کیسے پہچانیں کہ خیانت کیا ہے؟ فرمایا: تم بارہ گروہ ہو تو تمہارے ہر گروہ کا سردار مجھ سے بیعت کرے۔ فرمایا: ہر گروہ کے سردار نے ان سے بیعت کی تو ان میں سے ایک آدمی کے ہاتھ سے اللہ کے نبی کا ہاتھ چمٹ گیا۔ فرمایا: تمہارے (غنیمت کے ) مال میں خیانت ہے۔ کہا: میں کیسے پہچانوں کہ کس کے پاس خیانت ہے؟ فرمایا: پس وہ ان سے ایک ایک آدمی کر کے بیعت کرے۔ پس اس نے ایسے ہی کیا تو ان میں سے اک آدمی کا ہاتھ اس سے چمٹ گیا۔ اس سے کہا: تیرے پاس خیانت کا مال ہے؟ کہا: ہاں ۔ کہا: وہ کیا ہے؟ کہا: سونے کے بیل کا سر ہے۔ وہ مجھے پسند آ گیا تو میں نے خیانت کا ارتکاب کیا۔ پس وہ اسے لے آیا اور اسے غنیمتوں کے ساتھ رکھ دیا تو آگ آئی اور انہیں کھالیا۔ پس حضرت کعب نے فرمایا: یہ روایت تو حضرت ابو ہریرہ کے پاس ہے، اللہ اور اس کے رسول نے سچ فرمایا۔ اسی طرح اللہ کی کتاب میں ہے اے ابو ہریرہ ! کیا اللہ کے نبی نے آپ کو بتایا کہ وہ کونسے نبی تھے؟ کہا: نہیں۔ حضرت کعب نے فرمایا: وہ حضرت موسیٰ کے ساتھی حضرت یوشع بن نون تھے۔ میں تمہیں بتاؤں کہ وہ کونسا شہر تھا؟ کہا: ہاں۔ فرمایا: یہ "اریحا " کا شہر تھا۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جو چاند کی سترہ تاریخ کو صبح کے وقت پچھنے لگائے' اس کو ہر بیماری سے شفاء ملے گی۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جب تم میں سے کسی کو دعوت دی جائے اور وہ اس قاصد کے ساتھ آ جائے تو یہی اس کے لئے اجازت شمار ہو گی۔