Al Muajam Al Kabir Tibrani

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: تقدیر پر بات کرنا ، آخر زمانہ کے اس امت کے بد ترین لوگوں کے لئے مؤخر کر دیا گیا۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: پھوپھی اور بھائی کی بیٹی ' خالہ اور بہن کی بیٹی کو ایک نکاح میں جمع کرنا' جائز نہیں ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ رسول کریم صلی اللہ علیہ وآلہ وسلم کے پاس ایک دن بخار کو گالی دی گئی تو آ پ صلی اللہ علیہ وآلہ وسلم نے فرمایا: تم بخار کو گالی نہ دو' اس ذات کی قسم جس کے قبضہ ٔ قدرت میں میری جان ہے! مؤمن کے گناہ اس طرح ختم ہو تے ہیں جس طرح کہ لوہے کے زنگ کو بھٹی ختم کر دیتی ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ رسول کریم صلی اللہ علیہ وآلہ وسلم سے گدھوں کے بارے میں پوچھا گیا تو آپ صلی اللہ علیہ وآلہ وسلم نے فرمایا: ان کے بارے میں کوئی حکم نہیں آیا ہے سوائے اس اکیلی جامع آیت کے: "تو جو (دنیاوی زندگی میں) ذرہ بھر نیکی کرے گا (قیامت کے دن) اے دیکھے گا اور جو ذرہ بھر برائی کرے گا (قیامت کے دن) اسے دیکھے گا۔"

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: گھوڑے اور غلام میں زکوٰۃ نہیں ہے' ہاں غلام میں صدقۂ فطر ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جس نے ایک دن کا روزہ اللہ کی رضا کے لئے رکھا تو اللہ کو جہنم سے ستر سال کی مسافت دور کر دے گا۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: پرندہ کا انڈہ جو محرم اُٹھائے ' اس کے پیسے دے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: اچھے اخلاق کی وجہ سے بندہ' نفلی روزہ رکھنے والے کے برابر اور اللہ کی راہ میں جہاد کرنے والے کے برابر ثواب پا لیتا ہے۔

حضرت ابو ہریرہ رضی اللہ تعالیٰ عنہ روایت کرتے ہیں کہ رسول کریم صلی اللہ علیہ وآلہ وسلم گھر سے نکل کر صفہ والوں کے پاس تشریف لائے جبکہ ان کی آوازیں بلند ہو رہی تھیں اور ہنسی سے لوٹ پوٹ ہو رہے تھے۔آپ صلی اللہ علیہ وآلہ وسلم کو یہ دیکھ کر غصہ آ گیا۔ فرمایا: تم ہنسنے کے لئے پیدا نہیں کیے گئے اور ان کے حق میں اس بات کو اچھا خیال نہ کیا۔ پس اللہ تعالیٰ کی طرف سے حضرت جبریل علیہ السلام نازل ہوئے اور کہا: " بے شک اللہ تعالیٰ حکم دیتا ہے کہ آسانی اختیار کرو، مشکل میں نہ ڈالو۔ بشارتیں دیا کرو اور نفرت نہ پھیلایا کرو۔ " پس (دوبارہ) رسول کریم صلی اللہ علیہ وآلہ وسلم ان کے پاس آئے تو ان کو بشارت دی، ان کے سامنے خوشی کا اظہار کیا اور ان سے مبسوط ہوئے۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: میرے بعد عنقریب تم پر حکمران مسلط ہوں گے' اچھے تم کو اچھے طریقے سے اور برے تم کو برے طریقے سے پیش آئیں گے' ان کی بات سننا ' پھر اس بات کی اطاعت کرنا، جو حق کے موافق ہو' ان کے پیچھے نماز پڑھنا' اگر وہ تمہارے ساتھ اچھا سلوک کریں گے تو تمہارے اور ان کے لئے ثواب ہو گا' اگر برے طریقے سے پیش آئیں گے تو تمہارے لیے ثواب اور ان کے لئے گناہ ہو گا۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: حاجی اور عمرہ کرنے والے اللہ کے مہمان ہوتے ہیں' اگر وہ دعا کریں تو ان کی دعا قبول ہو گی' اگر بخشش مانگیں تو ان کی مغفرت ہو گی۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے مشکیزہ سے منہ لگا کر پینے سےمنع فرمایا۔