Al Muajam Al Kabir Tibrani

حضرت ابو ہریرہ رضی اللہ عنہ روایت ہیں کہ حضور صلی اللہ علیہ و الہ وسلم نے فرمایا : وہ ذات جس کے قبضہ قدرت میں میری جان ہے اگر مجھے ایمان والوں پر مشقت کا خوف نہ ہوتا تو میں کبھی بھی اللہ کی راہ میں کسی سر یہ ( چھوٹے لشکر ) میں پیچھے نہ رہتا ، لیکن میں وہ چیز نہیں پاتا کہ اس پر انہیں سوار کروں اور و ہ طاقت نہیں پاتے کہ میری پیروی کریں ، ان میں سے کوئی بھی پسند نہیں کرے گا کہ میرے بعد پیچھے بیٹھا رہے ۔

حضرت ابو ہریرہ رضی اللہ عنہ روایت ہیں کہ حضور صلی اللہ علیہ و الہ وسلم نے فرمایا : میں چاہتا ہوں کہ اللہ کی راہ میں لڑوں اور شہید ہو جاؤں ،پھر زندہ کیا جاؤں ، پھر شہید ہو جاؤں ، پھر زندہ کیا جاؤں پھر شہید کیا جاؤں، پھر زندہ کیا جاؤں پھر شہید ہو جاؤں۔

حضرت ابو ہریرہ رضی اللہ عنہ روایت ہیں کہ حضور صلی اللہ علیہ و الہ وسلم نے فرمایا : جو امام سے پہلے سجدہ کرتا ہے اور امام سے پہلے سر اٹھاتا ہے تو اس کی پیشانی شیطان کے ہاتھ میں ہوتی ہے ۔

حضرت ابو ہریرہ رضی اللہ عنہ روایت ہیں کہ حضور صلی اللہ علیہ و الہ وسلم نے فرمایا : تم میں سے مجھے زیادہ پسند وہ ہے جس کے اخلاق اچھے ہوں ، وہ جو محبت کرتا ہو، اس سے محبت لوگ کرتے ہیں ، اللہ کو ناپسند وہ لوگ ہیں ، جو چغل خوری کرنے والے ہوں ، محبت کرنے والوں کے درمیان جدائی ڈالنے والے ہوں ، اور لڑائی سے پاک لوگوں کیلئے لڑائی کی کوشش کرنے والے ہوں ۔

حضرت ابو ہریرہ رضی اللہ عنہ سے مروی ہے انہوں نے نبی کریم صلی اللہ علیہ و الہ وسلم سے روایت کیا کہ ایک گروہ حضرت عیسیٰ بن مریم کے پاس سے گزرا تو فرمایا : آج انشاء اللہ ان میں سے کوئی ایک مر جائے گا ۔ پس وہ چلے گئے پھر وہ عشاء کے وقت واپس لوٹے اس حال میں کہ ان کے پاس لکڑیوں کے گٹھے تھے ۔ فرمایا : رکھ دو۔ پس آپ علیہ السلام نے اس آدمی سے فرمایا : جس کے لیے کہا تھا کہ یہ آج مر جائے گا ، اپنا گٹھا کھولو۔ پس اس نے کھولا تو اچانک اس میں ایک سانپ موجود تھا تو آپ نے فرمایا : تو نے آج کونسا عمل کیا ہے ؟ اس نے جواب دیا : میں نے کوئی عمل نہیں کیا۔ فرمایا غور کرو جو تو نے عمل کیا ہے ۔ کہا : میں نے کوئی عمل نہیں کیا۔ مگر یہ کہ میرے ہاتھ میں روٹی کا ایک ٹکڑا تھا تو میرے پاس سے ایک مسکین گزرا ۔ اس نے مجھ سے سوال کیا تو میں نے اس کا کچھ حصہ اسے دے دیا تو حضرت عیسیٰ نے فرمایا : اسی عمل کے سبب تجھ سے موت کو دور کر دیا گیا ۔

حضرت ابو ہریرہ رضی اللہ عنہ روایت ہیں کہ حضور صلی اللہ علیہ و الہ وسلم نے منع فرمایا کہ کوئی آدمی اپنے کولہو پر ہاتھ رکھ کر نماز پڑھے ۔

حضرت ابو ہریرہ رضی اللہ عنہ روایت ہیں کہ حضور صلی اللہ علیہ و الہ وسلم نے فرمایا : جو اللہ اور آخرت کے دن پر ایمان رکھتا ہے اس پر جمعہ لازم ہے سوائے عورت اور غلام اور بچے کے جو کھیل کود اور کاروبار میں لگا رہا اور جمعہ سے لاپرواہی کی تو اللہ تعالیٰ اس سے بے پرواہ ہے اللہ غنی قابل تعریف ہے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : جو اپنے مسلمان بھائی کیلئے عاجزی کرتا ہے ، اللہ اس کو پسند کرتا ہے ، جو اس کے سامنے تکبر کرتا ہے تو اللہ اس کو گرا دیتا ہے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : جو تم میں سے جمعہ کے دن نفل نماز پڑھنا چاہے ، وہ چار رکعت پڑھے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : سجدہ سات اعضاء پر ہے ۔

حضرت ابو ہریرہ رضی اللہ عنہ روایت کرتے ہیں میں نے حضرت انس رضی اللہ عنہ سے زیادہ حضور صلی اللہ علیہ و الہ وسلم کی طرح نماز پڑھتے ہوئے کسی کو نہیں دیکھا ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : جب تم کوئی نمائندہ بھیجو تو اچھے چہرے اور اچھے نام والا بھیجا کرو۔