Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ نبی کریم صلی اللہ علیہ و الہ وسلم نے فرمایا : اہل جنت ، جنت میں اس حال میں داخل ہونگے کہ ان کے بدن پر کوئی بال نہ ہوگا، روشن چہرے اور سرمہ لگائے ہوئے ہونگے ۔ ان کی عمرتیں تینتیس برس کی ہونگی اور قد کاٹھ حضرت آدم علیہ السلام کی تخلیق کے مطابق ساٹھ ضرب سات ہاتھ ہوگا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : کعبہ کو ایک حبشی اور پتلی پنڈلیوں والا تباہ کرے گا۔

حضرت ابو ہریرہ رضی اللہ عنہ سے روایت ہے کہ آپ نے ایک آدمی کو اذان کے بعد مسجد سے نکلتے ہوئے دیکھا تو آپ رضی اللہ عنہ نے فرمایا : اس نے ابو القاسم صلی اللہ علیہ و الہ وسلم کی نافرمانی کی ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : حضرت عیسیٰ علیہ السلام دنیا میں تشریف لائیں گے اور دنیا میں چالیس سال رہیں گے ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا :بے شک اللہ تعالیٰ قیامت کے لوگوں کے درمیان بدلہ دلوائے گا حتی کہ بغیر سینگوں والی بکری کا سینگوں والی بکری سے بقدر زیادتی بدلہ دلوایا جائے گا۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : تم ضرور سب کے سب اکٹھے جنت میں داخل ہو گے سوائے اس آدمی کے جس نے اللہ سے بغاوت کی جس طرح اونٹ بھاگ جاتا ہے ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : لوگوں کے لئے مناسب نہیں کہ لعنتیں کرنے والے ( بلا تحقیق ) تصدیقیں کرنے والے ہوں ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : کون مجھ سے حدیثیں سنے گا ؟ حضرت ابو ہریرہ رضی اللہ عنہ فرماتے ہیں کہ میں نے اپنا کپڑا بچھا لیا جب آپ صلی اللہ علیہ و الہ وسلم گفتگو سے فارغ ہوئے تو میں نے کپڑا لپیٹ کر سینے سے لگا لیا۔ اس ذات کی قسم جس کے قبضہ قدرت میں میری جان ہے اس کے بعد میں آپ صلی اللہ علیہ و الہ وسلم کی کوئی حدیث نہیں بھولا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اللہ عزوجل قیامت کے دن جہنم سے ایسے لوگوں کو نکالے گا جنہوں نے کبھی دنیا میں نیک اعمال نہیں کیے تھے ان کو اپنی رحمت سے جنت میں داخل کرے گا، شفاعت کرنے والوں کی شفاعت کے بعد ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : ایک عمرہ ، دوسرے عمرہ تک کے درمیانی گناہوں کا کفارہ ہے اور حج مبروز کی جزاء جنت ہی ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : حضرت داؤد علیہ السلام اپنے ہاتھ کی کمائی سے ہی کھاتے تھے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب نماز کیلئے اقامت ہو جائے تو سوائے فرض نماز کے اور کوئی نماز نہیں ہے ۔