Al Muajam Al Kabir Tibrani

حضرت ابو ہریرہ رضی اللہ عنہ بیان کرتے ہیں کہ مجھے میرے خلیل نے ہر مہینے میں تین روزے رکھنے اور جمعہ کا غسل کرنے کی وصیت فرمائی اور یہ کہ میں وتر پڑھے بغیر نہ سوؤں ۔ حضرت زبیر کہتے ہیں جب سے میں نے حضرت ابو ہریرہ رضی اللہ عنہ سے سنا ہے کبھی ان اعمال کو ترک نہیں کیا اور حضرت عمرو کہتے ہیں : جب سے میں نے اپنے والد سے سنا ہے کبھی ان اعمال کو ترک نہیں کیا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : قسم ہے اس ذات کی جس کے قبضہ قدرت میں میری جان ہے ! ہر نبی پر وحی عربی زبان میں اتاری گئی ، پھر وہ نبی اس وحی کو اپنی قوم کی زبان میں پہچانتے تھے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : حمایت صرف اللہ اور اس کے رسول کیلئے ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے نماز جنازہ پڑھایا اور اس میں چار تکبیریں پڑھیں ، پھر قبر کے پاس آئے اور اس کے سر کی جانب تین ہاتھ بھر کر مٹی کے ڈالے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تمہاری کانٹ چھانٹ کی جائے گی جس طرح کہ ردی کھجوروں کو دوسری کھجوروں سے علیحدہ کیا جاتا ہے ، تمہارے نیک لوگ چلے جائیں گے اور برے لوگ رہ جائیں گے ، اگر تم مرنے کی طاقت رکھتے ہو تو مر جانا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : عورت کو اس کی پھوپھی اور اس کی خالہ کے ساتھ نکاح میں جمع کرنا جائز نہیں ہے ۔

حضرت ابو ہریرہ رضی اللہ عنہ فرماتے ہیں کہ ایک آدمی حضور صلی اللہ علیہ و الہ وسلم کے پاس آیا، اس نے عرض کی : میں کوئی عمل کرتا ہوں اور اس پر کوئی مطلع ہو جائے تو مجھے خوشی ہوتی ہے ۔ آپ صلی اللہ علیہ و الہ وسلم نے فرمایا : تمہارے لیے دگنا ثواب ہے ، ایک چھپا کر عمل کرنے اور دوسرا اعلانیہ عمل کرنے کا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اللہ عزوجل نے رحمت کے سو حصے پیدا کیے ، ننانوے حصے اپنے لیے روک لیے اور ایک حصہ مخلوق کے درمیان رکھا ، اگر کافر کو اللہ کی رحمت معلوم ہو جائے تو وہ جنت سے مایوس نہیں ہوگا اور اگر مومن کو معلوم ہو جائے کہ اللہ عزوجل کا عذاب کتنا بڑا ہے تو وہ جہنم سے بے خوف نہ رہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم کو فرماتے ہوئے سنا : اگر آدمی آخرت کا کوئی عمل کرے حالآنکہ وہ آخرت کا ارادہ نہیں رکھتا اور اسے طلب نہیں کرتا تو تمام آسمانوں اور زمینوں میں اس پر لعنت کی جاتی ہے ۔

حضرت ابو ہریرہ رضی اللہ عنہ فرماتے ہیں کہ جب مکہ میں سورۃ الفاتحہ نازل ہوئی تو شیطان چیخنے لگا ۔ اور یہ سورت مدینہ منورہ میں نازل ہوئی۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا :اللہ عزوجل کے ننانوے نام ہیں جس نے انہیں یاد کر لیا وہ جنت میں داخل ہو گیا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اللہ کی راہ میں افضل جہادی وہ ہے جو مجاہدوں کا خدمت گزار ہے ، پھر جو ان کے پاس خبر لے کر آئے ان میں سے روزہ دار کا اللہ کے ہاں خاص مقام ہے ، جس نے پلایا اپنے ساتھیوں کو اللہ کی راہ میں وہ جنت میں ستر درجے یا ستر سال کے برابر پہلے جائے گا۔