Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : عورت پر اس کی پھوپھی یا خالہ سے نکاح نہ کیا جائے ۔

حضرت ابو ہریرہ رضی اللہ عنہ فرماتے ہیں کہ ہم نے عرض کی : یا رسول اللہ ! جہنم میں کس وجہ سے زیادہ لوگ جائیں گے ؟ آپ صلی اللہ علیہ و الہ وسلم نے فرمایا : دو کھوکھلی چیزوں کی وجہ سے : شرمگاہ اور منہ کی وجہ سے ۔

حضرت ابو ہریرہ رضی اللہ عنہ سے مروی ہے : نبی کریم صلی اللہ علیہ و الہ وسلم نے فرمایا : جس نے دنیا میں مسلمانوں کی تکالیف میں سے کوئی تکلیف دور کی تو اللہ تعالیٰ اس کی آخرت کی تکلیفوں میں سے ایک تکلیف دور کرے گا۔ جس نے دنیا میں مسلمان کی پردہ پوشی کی تو اللہ تعالیٰ دنیا و آخرت میں اس کی پردہ پوشی کرے گا ۔ جس نے دنیا میں تنگ دست پر آسانی کی تو اللہ تعالیٰ دنیا و آخرت میں اس پر آسانی فرمائے گا اور اللہ تعالیٰ بندے کی خصوصی مدد کر رہا ہوتا ہے جب تک بندہ اپنے بھائی کی مدد کر رہا ہوتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : بچہ ولادت کے وقت جوچیختا ہے ، اس کی وجہ سے یہ ہے کہ شیطان اس کو ٹھونگے مارتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جو اپنے مال کی زکوٰۃ نہیں دیتا تو وہ قیامت کے دن جمع کیا جائے گا ، اس جہنم کی تخلیق کو گرم کیا جائے گا۔ اس کے ساتھ اس کے پہلو اور پیٹھ کو داغا جائے گا یہاں تک کہ اللہ لوگوں کے درمیان فیصلہ فرما دے ایک ایسے دن میں جس کی مقدار تمہاری گنتی کے لحاظ سے پچاس ہزار سال ہو گی پھر وہ جنت یا دوزخ کی طرف اپنا راستہ دیکھے گا۔

عرض کی گئی : اے اللہ کے رسول ! گھوڑوں کا کیا حکم ہے ؟ فرمایا : گھوڑوں کی پیشانیوں میں قیامت تک بھلائی بندھی ہوئی ہے ۔ گھوڑا تین آدمیوں کے لیے ہے : ایک آدمی کے لیے اجر ہے ۔ ایک کے لیے پردہ اور ایک کے لیے بوجھ ہے ۔ پس وہ آدمی جس کے لیے اجر ہے ، وہ ہے ، جو اسے اللہ کی راہ میں روک کر رکھتا ہے اور تیار کرتا ہے ۔ جو کچھ گوڑے کے پیٹ میں جاتا ہے وہ اس کے لیے اجر ہے اور اگر وہ اسے چراگاہ میں لے جا کر چرائے تو گھوڑا جو کھائے گا، اس کا بھی اسے اجر ملے گا۔ اگر وہ دوڑ کر ایک چڑھائی یا دو چڑھائیاں چڑھے تو مالک کے لیے اس کے اٹھائے گئے ہر قدم کے بدلے اجر ہوگا ۔ اگر وہ اسے دریا پر لے جائے اور اس سے اسے پلائے تو اس چشمے کے ہر قطرے کے بدلے اجر ہوگا یہاں تک کہ اس کے گوبر اور پیشاب میں بھی اجر ہے ۔ لیکن وہ جس کے لیے پردہ ہے ، وہ آدمی ہے ، جو عفت ، خوبصورتی اور عزت کے لیے گھوڑا رکھتا ہے اور اس کی پیٹھ اور پیٹ کا حق نہیں بھولتا ، خواہ تنگدستی کی حالت ہو یا خوشحالی ہو۔ رہا وہ آدمی ، جس پر یہ بوجھ ہے ، وہ ہے ، جو گھوڑے کو اترانے ، تکبر ، فخر و مباھات ، لوگوں کو دکھانے اور لوگوں پر عظمت و بزرگی جتلانے کے لیے رکھتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جو مال قسم اٹھا کر فروخت کرتا ہے تو اس میں برکت ختم ہو جائے گی۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : کیا وہ آدمی نہیں ڈرتا ، جو سجدے سے اپنا سر اٹھاتا ہے جبکہ امام بھی سجدے میں ہوتا ہے ، اس بات سے کہ اللہ تعالیٰ اس کا سر گدھے کی مانند بنا دے ۔

حضرت ابو ہریرہ رضی اللہ عنہ سے مروی ہے : نبی کریم صلی اللہ علیہ و الہ وسلم نے فرمایا : اپنی ڈھال لے لو۔ صحابہ نے عرض کی : اے اللہ کے رسول ! کیا اس دشمن سے موجود ہے ( فرمایا : ) نہیں بلکہ دوزخ کی آگ سے کہا کرو : " سبحان اللہ، و الحمد للہ ، ولا الہ الا اللہ ، و اللہ اکبر" کیونکہ قیامت کے دن یہ آئیں گے ، اس حال میں آگے آگے ہوں گے ، بچانے والے ہوں گے اور یہی باقی رہنے والی نیکیاں ہیں ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : میں دن میں ( اپنی امت کیلئے ) ستر مرتبہ اللہ سے بخشش مانگتا ہوں ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : میری مسجد میں نماز ،سوائے مسجد حرام کے دوسری مسجدوں کے مقابلہ میں ایک ہزار نمازوں سے بہتر ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اللہ عزوجل اس آدمی کی طرف نظر رحمت نہیںکرتا ہے جو اپنی عورت کی دبر میں وطی کرے ۔