Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اس دعا پڑھنے کے نتیجے میں ستر فرشتے آمین کہنے پر معمور کیے جاتے ہیں ( وہ یہ دعا ہے : ) " ؒاللھم انی اسألک العفو و العافیۃ الیٰ آخرہ" ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم اور حضرت ابو بکر و عمر رضی اللہ عنہما کے ساتھ مدینہ سے مکہ کی طرف سفر کرتے تھے ، سب حضرات دو رکعت ادا کرتے تھے ، جس وقت مدینہ سے نکلتے اور مدینہ واپس آتے اور سفر کے دوران بھی اور مکہ میں ٹھہرنے کے دوران بھی۔

حضرت امام شعبی بیان کرتے ہیں : حضرت ابو ہریرہ رضی اللہ عنہ نے ایک آدمی کو دیکھا تو اس کا حلیہ انہیں عجیب لگا۔ آپ نے پوچھا تم کون ہو ؟ اس آدمی نے کہا : میں ان لوگوں میں سے ہوں جن پر اللہ نے انعام کیا ہے ۔ آپ نے فرمایا : ہم سب وہی ہیں جن پر اللہ نے انعام کیا ہے ۔ تم کن میں سے ہو؟ اس نے کہا : میں اہل زمین میں سے ہوں ۔ آپ نے فرمایا : ہم سب اہل زمین ہیں ، تم کن میں سے ہو ؟ اس نے قوم انباط سے ۔ آپ نے فرمای ا : دور ہٹ جا مجھ سے ۔ میں نے نبی کریم صلی اللہ علیہ و الہ وسلم کو فرماتے ہوئے سنا : انبیاء کے قاتل اور ظالموں کے پشت پناہ ، جب لوگ دولت اکٹھی کرنے اور مکانات کو مضبوط کرنے لگ جائیں تو ان سے دور دور رہنا۔

حضرت عائشہ صدیقہ رضی اللہ عنہا بیان کرتی ہیں کہ نبی کریم صلی اللہ علیہ و الہ وسلم نے فرمایا : جس نے قرآن کی ایک آیت پڑھی خواہ کسی بھی قرأت کے مطابق ہو تو اس کے لئے دس نیکیاں لکھی دی گئیں اور ان کے دس گناہ مٹا دیے گئے اور دس درجے بلند کر دیئے گئے ۔ اور جس نے تلاوت کی اور بعض کو درست پڑھا اور بعض میں غلطی کی تو اس کے لئے بیس نیکیاں لکھ دی گئیں، اس کے بیس گناہ مٹا دیئے گئے اور بیس درجے بلند کر دیئے گئے ۔ اور جس نے تلاوت کی اور ساری درست کی تو اس کیلئے چالیس نیکیاں لکھ دی گئیں، چالیس گناہ مٹا دیئے گئے اور چالیس درجے بلند کر دیئے گئے ۔

حضرت ابو ہریرہ رضی اللہ عنہ بیان کرتے ہیں : مجھے میرے دوست ( حضرت محمد صلی اللہ علیہ و الہ وسلم ) نے چند باتوں کی وصیت فرمائی کہ میں مرنے تک انہیں ترک نہ کروں۔ آپ صلی اللہ علیہ و الہ وسلم نے مجھے فجر کی دو رکعتیں پڑھتے رہنے کی وصیت فرمائی اور فرمایا : ان میں زمانے بھر کی بھلائیاں ہیں ۔ اور آپ صلی اللہ علیہ و الہ وسلم نے مجھے چاشت کی دو رکعتیں پڑھنے کی وصیت کی اور فرمایا یہ اوابین ( متقیوںٰ) کی نماز ہے ۔ اور ظہر سے قبل دو رکعتیں اور بعد میں دو رکعتیں اور عشاء کے بعد دو رکعتیں پڑھنے کی وصیت فرمائی ۔ اور ہر مہینے میں تین روزے رکھنے کی وصیت فرمائی کہ زندگی بھر کے روزے کے برابر ہیں ۔ اور یہ کہ میں وتروں کے بغیر رات نہ گزاروں اور مجھ سے فرمایا : اے ابو ہریرہ ! دن کے اول میں دو رکعتیں پڑھ لے ، میں دن کے آخر تک تیرا ضامن ہوں ۔

حضرت ابو ہریرہ رضی اللہ عنہ بیان کرتے ہیں : ایک مرتبہ نبی کریم صلی اللہ علیہ و الہ وسلم نے ہمیں دن کی کوئی نماز پڑھائی اور دو رکعتوں کے بعد سلام پھیر دیا اور جلدی سے لوگوں کے درمیان سے چلے گئے ۔ لوگوں نے کہا : کیا نماز میں کمی کر دی گئی ہے ؟ لوگوں میں حضرت ابو بکر حضرت عمر رضی اللہ عنہ بھی تھے لیکن وہ آپ صلی اللہ علیہ و الہ وسلم سے بات کرنے سے ڈر رہے تھے اور جلدی سے لوگوں کے درمیان سے نکل گئے ۔ لوگوں میں ایک شخص تھا ( جس کو " ذوالیدین" کہا جاتا تھا ) ۔ اس نے عرض کی : یا رسول اللہ صلی اللہ علیہ و الہ وسلم کیا نماز چھوٹی ہو گئی ہے یا آپ بھول گئے ہیں ؟ آپ صلی اللہ علیہ و الہ وسلم نے فرمایا : نہ نماز کم ہوئی ہے اور نہ ہی میں بھولا ہوں ۔ اس نے کہا : میرے ماں باپ آپ پر قربان ہوں آپ نے ہمیں دو رکعتیں پڑھائی ہیں ۔ آپ صلی اللہ علیہ و الہ وسلم نے فرمایا : کیا ذوالیدین صحیح کہہ رہا ہے ؟ لوگوں نے عرض کیا : اس نے سچ کہا ہے ۔ پھر آپ صلی اللہ علیہ و الہ وسلم واپس تشریف لائے اور پہلی رکعتوں تک دو رکعتیں پڑھائیں پھر سلام پھیرا اور عام نماز کی طرح یا کچھ لمبے دو سجدے کئے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جو اپنے پڑوسی کے گھر میں جانک کر دیکھے اور اپنے مسلمان بھائی کے پردہ کو دیکھے یا عورت کے بال یا جسم کی کوئی شی دیکھے تو اللہ پر حق ہے کہ اس کو جہنم میں داخل کر دے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم کو فرماتے ہوئے سنا : جمعہ کے دن میں ایک وقت ہے کہ اس وقت اللہ عزوجل سے کوئی شی مانگی جائے تو اللہ عطا کرتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : مجھے لوگوں سے جہاد کرنے کا حکم دیا گیا یہاں تک کہ لوگ لا الہ الا اللہ محمد رسول اللہ پڑھیں، جب وہ ایسا کریں گے تو ان کے اموال اور خون مجھ پر حرام ہیں اور ان کا باطنی معاملہ اللہ کے سپرد ہے ۔

حضرت ابو ہریرہ رضی اللہ عنہ فرماتے ہیں کہ انہوں نے حضور نبی کریم صلی اللہ علیہ و الہ وسلم کو فرماتے ہوئے سنا : جس نے بیت اللہ کا طواف کیا اور اس میں " سبحان اللہ ، لا الہ الا اللہ ، اللہ اکبر ، الحمد للہ ، لا قوۃ الا باللہ " کے سوا کوئی بات نہیں کی اس کے دس گناہ مٹا دیئے گئے اور اس کیلئے دس نیکیاں لکھ دی گئیں اور دس درجے بلند کر دیئے گئے اور جس نے بیت اللہ کا طواف کیا اور باتیں کرتا رہا ، اس نے رحمت میں صرف پاؤں بھگوئے ہیں جیسے پانی میں بگوئے جاتے ہیں ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : امام ، ضامن اور مؤذن ، امانت دار ہوتا ہے ، اے اللہ ! ائمہ کو ہدایت دے اور مؤذنوں کو بخش دے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم کو فرماتے ہوئے سنا : مسلمانوں کی دور کی چوکیوں پر مسلح فوج کا ایک دستہ ہونا چاہیے اور ایک دستہ خیبر میں ہونا چاہیے ۔