Al Muajam Al Kabir Tibrani

حضرت ابو ہریرہ رضی اللہ عنہ روایت فرماتے ہیں کہ حضور صلی اللہ علیہ و الہ وسلم نے فرمایا : اس کی تلاش چھوڑ دو جو چیز میں نے بیان نہیں کی، کیونکہ تم سے پہلی امتیں آپس کے اختلاف کی وجہ سے ہلاک ہوئیں۔ پس جب میں تمہیں کسی چیز کا حکم دوں تو اسے بجا لاؤ اور جس چیز سے منع کرو ، اپنی طاقت کی حد تک اسے ترک کر دو۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب دو خلیفوں کی بیعت کی جائے تو ان دونوں میں سے جو نیا ہو ( یا بدعت رائج کرنے والا ہو ) اسے قتل کر دو۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تم میں سے کوئی اپنے پڑوسی کو اپنی دیوار پر شہتیر رکھنے سے منع نہ کرے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم سے ہے کہ دو عورتیں حضرت داؤد علیہ السلام کی خدمت میں حاضر ہوئیں، جن میں سے ایک کے بیٹے کو بھیڑئیے نے کھا لیا تھا اور وہ پیچھے رہ جانے والے بچے کے بارے میں جھگڑ رہی تھیں۔ پس حضرت داؤد نے بڑی کے حق میں فیصلہ کر دیا۔ جب وہ وہاں سے نکلیں تو حضرت سلیمان علیہ السلام کے پاس سے گزریں تو انہوں نے کہا : انہوں ( والد گرامی ) نے تم دونوں کے درمیان کیا فیصلہ فرمایا : پس انہوں نے بتایا تو آپ نے فرمایا : میرے پاس چھری لاؤ۔ حضرت ابو ہریرہ رضی اللہ عنہ فرماتے ہیں : یہ پہلا موقعہ تھا ، جب میں نے آپ صلی اللہ علیہ و الہ وسلم سے چھری کے لیے " سکین " کا لفظ سنا ، کیونکہ ہم تو اسے " مدیہ " کہا کرتے تھے ۔ پس چھوٹی نے فورا ً سوال کیا : کس لیے ؟ فرمایا : تاکہ میں اس بچے کو کاٹ کر تم دونوں کے درمیان تقسیم کر دوں ۔ اس نے کہا : آپ یہ بچہ اسی کو دے دیں ۔ پس حضرت سلیمان نے اس بچہ کا فیصلہ چھوٹی کے حق میں کر دیا اور فرمایا : اگر یہ بچہ تیرا ہوتا تو اسے کاٹنے پر کبھی راضی نہ ہوتی۔

حضرت ابو ہریرہ رضی اللہ عنہ فرماتے ہیں کہ رسول کریم صلی اللہ علیہ و الہ وسلم مکہ کے راستے میں تھے تو آپ صلی اللہ علیہ و الہ وسلم ایک پہاڑ سے گزرے ، جس کو " جمدان " کہا جاتا تھا۔ فرمایا یہ جمدان ہے ۔ تم چلو ! دوبار فرمایا : مفردون سبقت لے گئے ۔ صحابہ نے عرض کی : اے اللہ کے رسول ! مفردون کون لوگ ہیں ؟ فرمایا : کثرت سے اللہ کا ذکر کرنے والے مرد اور ذکر کرنے والی عورتیں۔ ( فرمایا : حج یا عمرہ کرنے کے وقت ) ٹنڈ کروانے والوں پر اللہ رحم کرے ۔ صحابہ نے عرض کی : اے اللہ کے رسول ! بال چھوٹے کروانے والوں کے لیے کیا اجر ہے ؟ فرمایا : ( حج یا عمرہ کرنے کے وقت ) ٹنڈ کروانے والوں پر اللہ رحم کرے ۔ صحابہ نے عرض کی : اے اللہ کے رسول چھوٹے کروانے والوں کے لیے کیا اجر ہے ؟ فرمایا : اور بال چھوٹے کروانے والوں پر بھی اللہ رحم کرے ۔

اور اسی سند سے مروی ہے کہ رسول کریم صلی اللہ علیہ و الہ وسلم نے فرمایا : اعمال بجا لانے میں جلدی کرو، اس سے پہلے کہ فتنے رو نما ہو جائیں جیسے تاریک رات کے ٹکڑے ہوتے ہیں۔ صبح کے وقت آدمی مومن ہوگا اور شام اس حال میں کرے گا کہ وہ کافر ہو گا یا شام کے وقت مومن ہو گا اور صبح کفر کی حالت میں کرے گا ۔ دنیاوی عزت کی خاطر اپنے دین کو بیچ ڈالے گا۔

اور اسی سند کے ساتھ فرماتے ہیں : رسول کریم صلی اللہ علیہ و الہ وسلم نے فرمایا : اے عبداللہ بن عمرو جب تو لوگوں کی تلچھٹ میں ہوگا تو تیرا کیا حال ہوگا ؟ عرض کی : اے اللہ کے رسول ! وہ کیا ہے ؟ فرمایا : وہ قت جس میں لوگوں کی امانتیں اور ذمہ داریاں حرج کا شکار ہو جائیں گی۔ پس وہ اس طرح ہوں گے اور آپ صلی اللہ علیہ و الہ وسلم نے اپنی انگلیوں کو ایک دوسرے میں داخل کیا ۔ عرض کی : اے اللہ کے رسول ! ایسے میں ہمارے لیے کیا لائحہ عمل ہے ؟ فرمایا : جس کو تم نیکی جانتے ہو ، اسے بجا لانا اور جسے برائی سمجھتے ہو ، اسے چھوڑ دینا اور خاص اپنی ذات کے لیے عمل کرنا جبکہ عوام الناس کو ان کے حال پر چھوڑ دینا۔

حضور صلی اللہ علیہ و الہ وسلم نے فرمایا : دین غریبوں سے شروع ہوا تھا اور عنقریب غریبوں میں واپس آئے گا جس طرح شروع ہوا تھا ، غریبوں کیلئے خوشخبری ہے ۔

اسی سند سے آپ رضی اللہ عنہ فرماتے ہیں کہ رسول کریم صلی اللہ علیہ و الہ وسلم نے فرمایا : کیا تم جانتے ہو ، مفلس کون ہے ؟ صحابہ نے عرض کی : اے اللہ کے رسول ! ہمارے اندر وہ آدمی جس کے پاس دراھم اور سامان دنیا نہ ہو ۔ فرمایا : میرے امت کا مفلس وہ ہے ، جو قیامت کے دن روزے ، نمازیں اور صدقات لائے گا جبکہ اس نے کسی پر ظلم کمایا ہوگا، کسی کا مال کھایا ہوگا، کسی کو بے جا مارا ہوگا اور کسی کو گالی دی ہو گی۔ پس اسے بٹھا دیا جائے گا اور اس کی نیکیوں میں سے ایک ایک آدمی کو بدلہ دلوایا جائے گا۔ پس اگر اس کی نیکیاں ختم ہو جائیں گی تو دوسرے لوگوں کے گناہ لے کر اس پر ڈال دیئے جائیں گے اور ( آخرکار ) اسے جہنم میں ڈال دیا جائے گا۔

اور اسی سند کے ساتھ آپ رضی اللہ عنہ فرماتے ہیں : رسول کریم صلی اللہ علیہ و الہ وسلم نے فرمایا : اگر مومن کو معلوم ہو جائے کہ اللہ کے پاس کتنی سزا ہے ان میں سے کوئی بھی جنت کی طمع نہ کرے ، اگر کافر کو معلوم ہو جائے کہ اللہ کی رحمت کتنی ہے تو جنت سے نا امید نہ ہو، اللہ نے رحمت کے سو حصے بنائے ہیں ، پھر اس نے ایک رحمت کا حصہ دنیا میں اپنے بندوں کے درمیان اتارا، جس کے ذریعے وہ آپس میں رحم کرتے ہیں اور ننانوے حصے اپنے پاس رکھے ، یہ دنیا کی آگ جہنم کی آگ کے سو میں سے ایک حصہ ہے ۔

اور اسی سند کے ساتھ آپ رضی اللہ عنہ فرماتے ہیں : رسول کریم صلی اللہ علیہ و الہ وسلم نے فرمایا : بیشک ایک آدمی لمبا عرصہ جنتیوں والے اعمال کرتا رہتا ہے پھر اللہ تعالیٰ اس کا خاتمہ دوزخیوں والے اعمال پر فرماتا ہے تو اسے دوزخی بنا دیتا ہے اور بیشک ایک دوسرا آدمی لمبا عرصہ دوزخیوں والے اعمال کرتا رہتا ہے پھر اللہ تعالیٰ اس کا خاتمہ جنتیوں والے اعمال پر فرماتا ہے تو اسے جنتی بنا دیتا ہے ۔

اور اسی سند کے ساتھ آپ رضی اللہ عنہ فرماتے ہیں : رسول کریم صلی اللہ علیہ و الہ وسلم نے فرمایا : مجھے حکم دیا گیا کہ لوگوں سے جہاد کروں لا الہ الا اللہ محمد رسول اللہ پڑھنے تک اور جو میں لے کر آیا ، اس پر ایمان رکھنے تک ، جب وہ ایسا کریں گے تو انہوں نے مجھ سے اپنا خون اور مال بچا لیا مگر حق کے ساتھ ان کا حساب اللہ کے ذمہ ہے ۔