Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم میں سے کوئی مسجد میں داخل ہوتو بیٹھنے سے پہلے دو رکعت نفل ادا کرے ( بشرطیکہ مکروہ وقت نہ ہو ) ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم میں سے کسی کا پڑوسی اپنا شہتیر ( گاڈر وغیرہ ) اس کی دیوار پر رکھنے کی اجازت مانگے تو اس کو منع نہ کرو۔

اور اسی سند سے ہے کہ حضور صلی اللہ علیہ و الہ وسلم نے زنا کے مہر اور نر کو مادہ پر کدوانے کی کمائی سے منع فرمایا ۔

اور اسی سند سے کہ حضور صلی اللہ علیہ و الہ وسلم نے دھوکہ کی بیع سے منع فرمایا۔

اور اسی سند سے ہے کہ حضور صلی اللہ علیہ و الہ وسلم نے فرمایا : زانی ، زنا کرتے وقت اور چور چوری کرتے وقت ، شرابی ، شراب پیتے وقت مومن نہیں ہوتے ہیں ۔

اور اسی سند سے ہے کہ حضور صلی اللہ علیہ و الہ وسلم نے فرمایا : چاند دیکھ کر روزہ رکھو اور دیکھ کر افطار کرو، اگر تم پر آسمان ابر آلود ہو تو تیس پورے کرو۔

اور حضور صلی اللہ علیہ و الہ وسلم نے فرمایا : میں نماز کی حالت میں اپنے پیچھے بچہ کے رونے کی آواز سنتا ہوں تو نماز کو مختصر کر دیتا ہوں کہ اس کی والدہ پریشان نہ ہو۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تم اپنے سے نیچے والے کو دیکھو ، اپنے سے اوپر والے کو نہ دیکھو، اس طرح تم اللہ کی نعمتوں کو حقیر نہ جانو گے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : ہر شی کیلئے سردار ہوتا ہے اور مجالس کی سردار وہ ہے مجلس ہے جوقبلہ رخ ہو۔

حضور صلی اللہ علیہ و الہ وسلم نے فرمایا : جو آدمی امام سے پہلے سر اٹھاتا ہے ، ہو سکتا ہے کہ اللہ عزوجل اسکے سر کو گدھے کے سر سے بدل دیا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تجھ پر سب سے زیادہ حق تیری ماں کا ہے ، اس کے بعد تیرے باپ کا، اس کے بعد تیری بہن اور بھائی کا پھر درجہ بدرجہ ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جو بھوکا ہو یا محتاج ہو اور اس نے لوگوں سے چھپایا اور اللہ کی بارگاہ میں فریاد کی تو اللہ پر حق ہے کہ اس کیلئے رزق حلال کا دروازہ کھول دے ۔