Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ ایک آدمی حضور صلی اللہ علیہ و الہ وسلم کے پاس آیا اس نے عرض کی : یا رسول اللہ ! کیا آدمی ایک کپڑے میں نماز پڑھ سکتا ہے ؟ آپ صلی اللہ علیہ و الہ وسلم نے فرمایا : کیا تم میں سے کوئی دو کپڑے پاتا ہے ؟

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : شیطان تم میں سے ہر کسی کی نماز میں آتا ہے تاکہ اس کو شک میں ڈالے یہاں تک کہ بندہ کو معلوم نہیں ہوتا کہ اس نے کتنی رکعت پڑھی ہیں ، جب تم میں سے کوئی یہ حالت پائے تو وہ بیٹھے بیٹھے دو سجدے کرے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جو تم میں سے وضو کرے وہ اچھی طرح کرے اور جو استنجاء کرے تو وہ طاق مرتبہ کرے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : والدین کی اطاعت اللہ کی اطاعت اور والدین کی نافرمانی اللہ کی نافرمانی ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم سے پوچھا : عورت کا احتلام ہو تو اس پر غسل فرض ہے ؟ آپ صلی اللہ علیہ و الہ وسلم نے فرمایا : جب پانی پائے تو غسل کرے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب نماز کیلئے اقامت پڑھی جائے تو صرف فرض نماز ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : با جماعت نماز پڑھنا اکیلے نماز پڑھنے سے پچیس گنا زیادہ ثواب رکھتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس سے علم کے متعلق پوچھا گیا اور اس نے نہ بتایا تو وہ قیامت کے دن اس حالت میں آئے گا کہ اس کو آگ کی لگام پہنائی گئی ہو گی۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : چاند دیکھ کر روزہ رکھو اور چاند دیکھ کر عید کرو، اگر تم پر آسمان غبار آلود ہو تو تیس مکمل کر لو۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تم میں سے کوئی بھی اپنےعمل سے نجات نہیں پائے گا۔ صحابہ کرام نے عرض کی : یا رسول اللہ ! آپ بھی نہیں ؟ آپ صلی اللہ علیہ و الہ وسلم نے فرمایا : میں بھی نہیں ، ہاں مجھے میرے رب نے اپنی رحمت اور فضل سے ڈھانپ لیا۔ اگر ان لوگوں کی کوتاہیوں کے سبب میرا مؤخذہ ہوتا تو مجھے ہلاک کر دیا جاتا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اللہ عزوجل کے ننانوے نام ہیں جس نے ان کو یاد کر لیا، وہ جنت میں داخل ہو گیا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم اپنی زوجہ محترمہ حضرت عمر کی بیٹی حضرت حفصہ کے گھر میں اپنی زوجہ محترمہ حضرت ماریہ قبطیہ کے ساتھ خلوت میں تھے تو انہوں نے دیکھ لیا۔ عرض کی : اے اللہ کے رسول ! اپی دیگر بیویوں کے گھروں کو چھوڑ کر میرے گھر میں ( آپ اس کو لائے ؟ ) آپ صلی اللہ علیہ و الہ وسلم نے فرمایا : اے حفصہ ! اب کے بعد اس کو چھونا مجھ پر حرام ہوا، لیکن تو اسے چھپانا۔ پس وہ وہاں سے نکل کر حضرت عائشہ کے پاس آئیں اور کہا : اے ابو بکر کی بیٹی ! کیا میں تجھے خوشخبری نہ دوں ؟ کہا : کس چیز کے ساتھ ؟ کہا : میں نے اپنے گھر میں حضرت ماریہ کو اللہ کے رسول کے ساتھ پایا تو میں نے عرض کی : اے اللہ کے رسول ! اپنی دیگر بیویوں کے گھروں کو چھوڑ کر میرے گھر میں ( آپ اس کو لائے ؟ ) اور آپ نے اپنی دیگر بیویوں کو چھوڑ کر میرے ساتھ یہ کام کیا ؟ پس پہلی خوشی تو یہ ہے کہ آپ صلی اللہ علیہ و الہ وسلم نے اس کو اپنے اوپر حرام کر لیا ہے پھر مجھے کہا ؛ اے حفصہ ! کیا میں تجھے خوشخبری نہ دوں ؟ میں نے عرض کی : کیوں نہیں میرے ماں باپ آپ پر قربان ہوں ، اے اللہ کے رسول ! پس آپ نے مجھے بتایا کہ تیرے والد گرامی ( اے عائشہ ! ) ان کے بعد خلیفہ ہوں گے اور تیرے باپ کے بعد میرے باپ خلیفہ ہوں۔ پس آپ صلی اللہ علیہ و الہ وسلم نے مجھے یہ بات چھپانے کو کہا ہے ، تو بھی اسے چھپانا۔ پس اللہ تعالیٰ نے یہ آیت نازل فرمائی : "اے نبی ! اس کو اپنے اوپر حرام کیوں کرتے ہیں ، جو ( حضرت ماریہ ) میں نے آپ پر حلال کیا "۔ صرف اپنی بیویوں ( حضرت حفصہ ) کی رضامندی کے لیے ۔ حالانکہ اللہ تعالیٰ بہت بخشنے والا ، ہمیشہ رحم فرمانے والا ہے ۔ ( یعنی اس کو جو آپ کی طرف سے ہوا ) بیشک اللہ نے تمہارے لیے ( کفارہ کے ذریعے ) تمہارے قسموں کا کھولنا ( سورۃ مائدہ : 89 میں ) مقرر فرما دیا اور اللہ تمہارا دوست ( مددگار و کار ساز ) اور وہی بہت علم والا ، بڑا حکمت والا ہے ۔ اور ( مسلمانو ! یاد کرو ) جب نبی صلی اللہ علیہ و الہ وسلم نے اپنی ایک بیوی ( حضرت حفصہ ) سے خفیہ بات کی ( اور فرمایا کہ کسی کو نہ بتانا میں نے ماریہ کو اپنے اوپر حرام ٹھہرایا ہے اور یہ کہ میرے بعد ابوبکر پھر عمر خلیفہ ہوں گے ) تو جب وہ ( بی بی عائشہ سے ) اس ( خفیہ راز میں سے دونوں باتوں ) کا ذکر کر بیٹھیں اور اللہ نے اس ( بات ) کو ( کہ حفصہ نے رزا کی باتیں عائشہ کو بتا دیں ) نبی پر ظاہر کر دیا تو نبی نے ( حفصہ کو ) اس ( راز ) کے کچھ حصہ ( کے عائشہ کو بتا دینے ) جتایا اور ( ازراہ کرم ) کچھ ( حصے کے جتانے ) سے در گزر فرمایا تو جب نبی نے اس ( حفصہ بی بی ) کو اس ( راز کے فاش کرنے ) کی خبر دی تو وہ بولیں آپ کو یہ کس نے بتایا ؟ نبی صلی اللہ علیہ و الہ وسلم نے فرمایا : مجھے بہت علم والے بہت خبر رکھنے والے ( اللہ ) نے بتایا ۔ ( اے نبی کی دونوں بیویو ! حفصہ و عائشہ ) اگر تم دونوں اللہ کی بارگاہ میں توبہ کرو ( تو یہ تم پر واجب ہے ) کیونکہ یقیناً تمہارے دل ( حق سے ) پھر گئے ( کہ تمہیں ماری کو حرام ٹھہرانے کی بات پسند آئی جو نبی کو پسند نہ تھی ) اور اگر تم دونوں نے نبی صلی اللہ علیہ و الہ وسلم کے مقابلہ میں ایک دوسری کی مدد کی بے شک اللہ اور حضرت جبرائیل اور نیک ایمان والے ( ابو بکر و عمر ) اس کے مددگار ہیں اور اس کے بعد فرشتے ( بھی اس کے ) مددگار ہیں ۔ اگر وہ تمہیں طلاق دے دیں تو دور نہیں کہ اس کا رب ان کو تم سے بہتر بیویاں بدل دے ( ( ایسی کہ ) فرمانبردار ، ایمان والیاں، ادب والیاں، توبہ کرنے والیاں، عبادت والیاں، روزہ رکھنے والیاں، بیاہیاں اور کنواریاں ( اس فرمان کے بعد انہوں نے توبہ کی اور حضور کی رضا جوئی کو مقدم رکھا تو آپ نے انہیں طلاق نہ دی اور ان سے راضی ہوئے ) پس اس بات میں شک نہیں ہے کہ اللہ تعالیٰ نےآپ صلی اللہ علیہ و الہ وسلم سے وعدہ فرما رکھا ہے ثیبہ عورتوں میں فرعون کی بیوی آسیہ بنت مزاحم اور حضرت نوح کی بہن اور کنواریوں میں مریم بنت عمران اور حضرت موسیٰ کی بہن ۔