Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جہنم والوں میں سے دو قسم کے لوگ میں نے اس کے بعد نہیں دیکھے ، وہ عورتیں جو ننگی اور دوسروں کی طرف مائل ہونے والی اور دوسروں کو اپنی طرف متوجہ کرنے والیاں ہیں ، ان کے سروں پر بختی اونٹوں کے کوہانوں کی مانند بال ہیں اور وہ قوم جن کے بال ایسے ہے جیسے گاوں کی دُمیں نہ تو وہ جنت میں داخل ہوں گے ۔ اور نہ اس کی خوشبو سونگھ سکیں گے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے مجھے وتر پڑھے بغیر سونے سے منع فرمایا ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے کتاب میں میرے اوپر درود لکھا تو فرشتے مسلسل اس کیلئے دعاء استغفار کرتے رہیں گے ، جب تک کہ میرا نام کتاب میں رہے گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب اللہ نے عقل کو پیدا کیا تو اسے فرمایا : کھڑی ہو، وہ کھڑی ہوئی ، پھر اس کو فرمایا : تو پیچھے چل ، وہ چلی ، پھر اس کو فرمایا : بیٹھ جا ! تو وہ بیٹھ گئی ، فرمایا : میری عزت کی قسم ! میں نے تجھ سے بہتر چیز پیدا نہیں کی اور تجھ سے زیادہ عزت والی اور تجھ سے زیادہ افضل نہ تجھ سے زیادہ اچھی ، تیرے ذریعہ پکڑوں گا اور تیرے ذریعہ عطا کروں گا، تیرے ذریعہ پہچان جاؤں گا ، تیرے ذریعہ عذاب دوں گا، تیرے ذریعے ثواب دوں گا اور تیرے اوپر سزا کا دارومدار ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم کو چھینک آتی تو اپنا چہرہ مبارک ڈھانپ لیتے تھے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم میں سے کوئی اپنی شرمگاہ کی طرف اپنا ہاتھ لے جائے بغیر پردہ کے تو اس پر وضو واجب ہے ( یعنی ہاتھ دھو لے ) ۔

حضرت ابو ہریرہ سے مروی ہے : رسول کریم صلی اللہ علیہ و الہ وسلم نے فرمایا : میں نے اپنے رب سے اپنی امت کے لیے چار چیزوں کی اپیل کی ۔ پس میرے رب نے مجھے تین چیزیں عطا کیں اور ایک مانگنے سے روک دیا ۔ میں نے سوال کیا : میری امت ایک دم کافر نہ بن جائے تو یہ مجھے عطا کی ۔ میں نے اپنے رب سے سوال کیا کہ میری امت کے دشمن کو ان پر مسلط نہ فرمانا تو یہ مجھے عطا کیا۔ میں نے مانگا کہ میری امت کو اس طریقے سے عذاب نہ دینا جس سے پہلی امتوں کو عذاب دیا تو یہ بھی مجھے عطا کیا اور میں نے عرض کی کہ ان کے آپس میں جنگ اور لڑائی نہ ہو تو مجھے یہ مانگنے سے روک دیا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تین آدمیوں سے اللہ عزوجل قیامت کے دن کلام نہیں فرمائے گا اور نہ ان کی طرف نظر رحمت کرے گا، ان کیلئے درد ناک عذاب ہوگا، ایک وہ آدمی جو سامان فروخت کرنے کیلئے جھوٹی قسم اٹھاتا ہے ۔ تحقیق اس کو زیادہ دیا گیا ، اس سے جو ( پہلے ) دیا گیا، ایک وہ آدمی جو جھوٹی قسم اٹھاتا ہے عصر کے بعد تاکہ جائز طریقے سے کسی مسلمان کا مال ہتھیا لے اور ایک وہ آدمی جو اضافی پانی سے منع کرتا ہے کیونکہ اللہ عزوجل قیامت کے دن فرمائے گا : آج میں تم کو اپنا فضل نہیں دوں گا ، جس طرح تو نے اضافی پانی نہیں دیا تھا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا :جب تم کسی آدمی کو دیکھو جس کو دنیا میں بے رغبتی دی گئی اور کم بولنا تو اس کے قریب رہو کیونکہ اس کو حکمت دی گئی ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تم میں ہر گز کوئی یہ نہ کہے کہ اے اللہ ! مجھے میری حجت سکھا دے کیونکہ کافر کو بھی اس کی حجت تو سکھائی ہی جاتی ہے بلکہ عرض کرے : یا اللہ ! مجھے موت کے وقت ایمان کی حجت کی تلقین فرمانا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : آدمی چار کاموں کے وقت ظلم و زیادتی کا شکار ہوتا ہے : جب اکیلا سوئے ، جب سوئے تو چت لیٹے ، جب معصفر لگے بستر میں سوئے ۔ جب کھلی فضا میں نہائے ۔ پس جو کھلی فضا میں غسل نہ کرنے کی طاقت رکھے ۔ پس اگر وہ ایسا کرنے پر مجبور ہو تو ایک لمبی لکیر کھینچ لے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے دو سیاہ اور سینگوں والے بکروں کی قربانی کی ، ایک اپنی اور گھر والوں کی طرف سے اور دوسرا اپنی اس امت کی طرف سے جو قربانی نہیں کر سکتی ہے ۔