Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تم ضرور نیکی کے کاموں کا حکم کرو اور برائی کے کاموں سے منع کرو ، ورنہ تم پر برے لوگ مسلط ہوں گے ، پھر تمہارے نیک لوگ دعا کریں گے ، تمہارے حق میں دعا قبول نہیں ہو گی۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم کے پاس دو آدمیوں کو چھینک آئی ، ایک شریف تھا اور دوسرا تیز تھا ۔ آپ نے تیز والے کی چھینک کا جواب دیا، شریف کی چھینک کا جواب نہیں دیا۔ اس نے عرض کی : یا رسول اللہ ! آپ نے میری چھینک کا جواب نہیں دیا، یا اس کی چھینک کا جواب دیا۔ آپ صلی اللہ علیہ و الہ وسلم نے فرمایا : اس نے اللہ کا ذکر کیا ( یعنی چھینک آنے پر الحمد للہ کہا ) تو اللہ نے اسے یاد کیا تو اللہ عزوجل کو بھول گیا تھا ، تجھے بھلا دیا گیا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے شام کے وقت یہ کلمات پڑھے : " اعوذ بکلمات اللہ التامات کلھا من شر ما خلق" اس کو کوئی شی نقصان نہیں دے گی۔

حضرت ابو ہریرہ سے مروی ہے کہ انہوں نے فرمایا : میرے اس تھیلے میں ایک ایسی حدیث ہے کہ اگر میں اس کو بیان کروں تو تم مجھے پتھر مارو پھر کہا : اے اللہ مجھے ساٹھ ہجری کے آخر تک زندہ رکھنا ۔ لوگوں نے سوال کیا : ساٹھ ہجری کے آخر میں کیا ہو گا؟ فرمایا : بچوں کی حکومت ، فیصلے کو بیچنا، شرطوں کی کثرت، اور جان پہچان کی بنیاد پر گواہی دینا اور لوگ امانت کو مال غنیمت سمجھیں گے اور صدقہ دینے کو چٹی سمجھیں گے ۔ ایک گروہ ایسا ہوگا، جو قرآن کو مزامیر بنا لے گا۔ حماد کا قول ہے : میرا گمان ہے کہ کہا : خون کے سلسلے میں سستی کی جائے گی۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اگر آسمان اور زمین والے سارے مل کر ایک مسلمان آدمی کو قتل کریں تو اللہ عزوجل ان سب کو جہنم میں اوندھے منہ گرائے گا۔

حضرت عبداللہ رومی ، حضرت ابو ہریرہ کے بارے میں روایت کرتے ہیں ، کہ وہ مدینہ کے بازار سے گزرنے لگے تو کھڑے ہو کر فرمایا : اے بازار والو ! تم کس قدر عاجز ہو ؟ انہوں نے عرض کی : اے ابو ہریرہ ! کیا بات ہے ؟ فرمایا : یہ اللہ تعالیٰ کے رسول صلی اللہ علیہ و الہ وسلم کی میراث تقسیم ہو رہی ہے اور تم یہاں ہو کر وہاں اپنا حصہ حاصل کرنے کے لیے نہیں جاتے ۔ کہا، وہ کہاں ہے ؟ فرمایا : مسجد میں ہے ۔ پس وہ جلدی جلدی نکل کر مسجد میں گئے اور حضرت ابو ہریرہ ان کے آنے تک وہیں ٹھہر گئے ۔ ان سے فرمایا : تمہیں کیا ہے؟ انہوں نے عرض کی : اے ابو ہریرہ ! ہم مسجد میں جا کر داخل ہوئے ، پس ہم نے تو اس میں کوئی شی نہیں دیکھی ، جو پیش کی جا رہی ہو۔ پس حضرت ابو ہریرہ نے ان سے فرمایا : کیا تم نے مسجد میں کسی آدمی کو دیکھا ؟ انہوں نے عرض کی : کیوں نہیں ہم نے ایک گروہ کو دیکھا جو نماز پڑھ رہا تھا ۔ ایک گروہ قرآن پڑھ رہا تھا اور ایک گروہ حلال و حرام کے بارے میں مذاکرہ کر رہے تھے ۔ پس حضرت ابو ہریرہ نے ان سے فرمایا : تمہیں افسوس ! یہی تو حضرت محمد صلی اللہ علیہ و الہ وسلم کی میراث تھی ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے کسی کو ظلماً کوڑا مارا، قیامت کے دن اس سے قصاص لیا جائے گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے گرہ لگائی پھر اس میں پھونک ماری ، جادو کیا اور جس نے جادو کیا اس نے شرک کیا، جس نے کوئی شی متعلق کی اس کو اسی کے سپرد کر دیا جائے گا۔

حضرت ابو ہریرہ رضی اللہ عنہ سے مروی ہے کہ رسول کریم صلی اللہ علیہ و الہ وسلم ایک غزوہ سے فارغ ہوئے تو صحابہ کرام کو بھوک کا احساس ہوا جبکہ ان کا زادراہ ختم ہو چکا تھا۔ پس وہ رسول کریم صلی اللہ علیہ و الہ وسلم کی خدمت میں بھوک کی شکایت لائے اور اجازت مانگنے لگے کہ ہمیں اپنی سواریوں میں سے بعض اونٹ ذبح کرنے کی اجازت دی جائے۔ پس آپ نے اجازت دے دی اور وہ آپ کی بارگاہ سے اٹھ کر نکلے تو حضرت عمر کے پاس سے گزرے ۔ انہوں نے کہا : تم کہاں سے آئے ؟ انہوں بتایا کہ رسول کریم صلی اللہ علیہ و الہ وسلم نے انہیں اپنے بعض اونٹ ذبح کرنے کی اجازت دے دی ہے ۔ کہا : واقعی تمہیں اجازت مل گئی ہے ؟ کہا : ہاں ۔ کہا : میں تمہیں قسم دے کر کہتا ہوں : تم میرے ساتھ رسول کریم صلی اللہ علیہ و الہ وسلم کی بارگاہ میں چلو ! ۔ پس وہ سارے آپ کے ساتھ لوٹ چلے ۔ پس حضرت عمر نے رسول کریم صلی اللہ علیہ و الہ وسلم کی خدمت میں آ کر عرض کی : اے اللہ کے رسول ! کیا آپ نے ان لوگوں کو اپنی سواری کے اونٹ ذبح کرنے کی اجازت دے دی ہے تو یہ کس چیز پر سوار ہوں گے ؟ رسول کریم صلی اللہ علیہ و الہ وسلم نے فرمایا : پس میں کیا کروں ؟ جبکہ بظاہر میرے پاس ان کو دینے کے لیے کچھ نہیں ہے ۔ حضرت عمر نے عرض کی : کیوں نہیں اے اللہ کے رسول ! آپ حکم فرمائیں ہر اس آدمی کو جس کے پاس کچھ زاد راہ باقی ہے کہ وہ لے آئے ۔ پس آپ اس کسی شے رکھ کر برکت کی دعائیں فرمائیں پھر ان کے درمیان تقسیم فرما دیں ۔ پس آپ نے ایسے ہی کیا ۔ پس آپ صلی اللہ علیہ و الہ وسلم نے لوگوں سے ان کا بچا ہو زاد راہ منگوایا۔ پس ان میں سے بعض تھوڑا اور بعض زیادہ لائے تو آپ صلی اللہ علیہ و الہ وسلم نے سب کو ایک برتن میں رکھ دیا پھر اس میں برکت کی دعا کی جو اللہ نے چاہا کہ آپ صلی اللہ علیہ و الہ وسلم دعا کریں پھر ان کے درمیان کھانا تقسیم کیا تو قوم میں سے کوئی بھی ایسا نہ تھا جس کے پاس موجود اس کا برتن بھر نہ گیا ہو اور بچ بھی گیا ۔ پس اپ صلی اللہ علیہ و الہ وسلم نے اس موقع پر فرمایا : میں گواہی دیتا ہوں کہ اللہ کے سوا کوئی سچا معبود نہیں ۔ اس کا کوئی شریک نہیں اور میں گواہی دیتا ہوں کہ حضرت محمد صلی اللہ علیہ و الہ وسلم اللہ کے برگزیدہ بندے اور سچے رسول ہیں ۔ جو آدمی اس کو لایا بغیر شکایت کے، اللہ اسے جنت میں داخل فرمائے گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم موزوں اور عمامہ کے نیچے ( ہاتھ داخل کر کے ) مسح کرتے تھے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب آدمی کا مقروض مفلس قرار دے دیا جائے اور اسی دوران وہ اس مال کو بعینہ پائے تو دیگر سارے قرض خواہوں کی نسبت وہ اس کا زیادہ حقدار ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم نماز کیلئے ارادہ کرو تو نماز کیلئے آؤ سکون اور وقار کے ساتھ جو پا لو وہ پڑھ لو اور جو رہ جائے وہ بعد میں پڑھ لو۔