Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ میں نے حضور صلی اللہ علیہ و الہ وسلم کو کھڑے ہو کر اس کنویں سے پانی پیتے ہوئے دیکھا اور آپ صلی اللہ علیہ و الہ وسلم نے اپنے ہاتھ سے زمزم کی طرف اشارہ کیا ۔

حضرت فرزوق فرماتے ہیں کہ مجھے حضرت ابو ہریرہ رضی اللہ عنہ نے فرمایا : میں تجھے چھوٹے قدموں والا دیکھتا ہوں ، اگر تو طاقت رکھتا ہے کہ کل دونوں کو حوض پر جگہ ملے تو یہ عمل کر۔ میں نے حضور صلی اللہ علیہ و الہ وسلم کو فرماتے ہوئے سنا : میرا حوض عمان اور یلہ کے درمیانی فاصلہ جتنا ہے ، اس کا پانی دودھ سے زیادہ سفید اور شہد سے زیادہ میٹھا ہے اس کے پیالے آسمان کے ستاروں کی تعداد جتنے ہیں ، جو اس حوض سے ایک مرتبہ پی لے گا پھر اسے کبھی پیاس نہیں لگے گی ۔

ابو جعفر محمد بن علی فرماتے ہیں کہ ہم نے عبداللہ بن جعفر سے عرض کی : ہمیں بیان کریں جو آپ نے حضور صلی اللہ علیہ و الہ وسلم کو فرماتے ہوئے سنا اور آپ صلی اللہ علیہ و الہ وسلم کو دیکھا اور اپنے علاوہ کسی اور سے روایت کر کے نہ سنائیں ، اگرچہ وہ ثقہ ہوں ۔ فرمایا : میں نے حضور صلی اللہ علیہ و الہ وسلم کو فرماتے ہوئے سنا : ناف اور گھٹنوں کے درمیان کی جگہ عورت ( یعنی شرمگاہ ) ہے ۔

حضرت مطر ابو موسیٰ جو آل ابو طلحہ کے آزاد کردہ غلام ہیں بیان کرتے ہیں کہ حضرت عبداللہ بن عمر اور حضرت ابو ہریرہ رضی اللہ عنہ ایک جگہ اکٹھے ہوئے تو حضرت ابو ہریرہ نے کہا : اے ابو عبدالرحمن ! لوگ سمجھتے ہیں کہ میں حضور صلی اللہ علیہ و الہ وسلم پر جھوٹ باندھتا ہوں ( اگر ایسا ہے ) تو کون سی زمین مجھے پناہ دے گی اور کون سا آسمان مجھ پر سایہ کرے گا ؟ حضرت ابن عمر رضی اللہ عنہ نے فرمایا : آپ اس سے بہتر ہیں حضرت ابو ہریرہ رضی اللہ عنہ نے کہا : میں نے نبی کریم صلی اللہ علیہ و الہ وسلم کو فرماتے ہوئے سنا : اگر سب لوگ ایک راستے پر ہوں اور انصار دوسرے راستے پر ہوں تو میں نے انصار کے ساتھ دوسرے راستے پر چلوں گا ۔ حضرت ابن عمر رضی اللہ عنہ نے فرمایا : بے شک میں نے بھی نبی کریم صلی اللہ علیہ و الہ وسلم کو اسی طرح فرماتے ہوئے سنا ہے ۔

حضرت ابو ہریرہ رضی اللہ عنہ فرماتے ہیں کہ میں نے حضور صلی اللہ علیہ و الہ وسلم کو فرماتے ہوئے سنا : اگر ہجرت نہ ہوتی تو میں انصار کا ایک آدمی ہوتا۔ حضرت ابن عمر رضی اللہ عنہ نے فرمایا : تم نے سچ کہا ، میں نے حضور صلی اللہ علیہ و الہ وسلم کو اسی طرح فرماتے ہوئے سنا اور اس دن ابو ہریرہ نے خود بھی بیان کیا حضرت ابن عمر رضی اللہ عنہ نے اس کی تصدیق فرمائی ۔

حضرت ابو ہریرہ رضی اللہ عنہ فرماتے ہیں کہ میں نے حضور صلی اللہ علیہ و الہ وسلم کو فرماتے ہوئے سنا : امام کو درمیان میں کھڑا کرو اور صفوں کی درمیانی جگہ کو پر کرو، شیطان کیلئے جگہ نہ چھوڑو اور اپنے جوتے اپنے قدموں کے درمیان رکھو۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : میں ارادہ کرتا ہوں کہ میں کسی نوجون کو حکم دوں کہ وہ لکڑیوں کا گٹھا اکٹھا کرے ، پھر میں ان لوگوں کے پاس آؤں جو اپنے گھروں میں نماز پڑھتے ہیں بغیر کسی عذر کے اور میں ان کو ان کے گھروں میں جلا دوں ۔

اور میں نے رسول اللہ صلی اللہ علیہ و الہ وسلم کو فرماتے ہوئے سنا: صدقہ اللہ عزوجل کے غضب کو ٹھنڈا کر دیتا ہے ۔

اور میں نے حضور صلی اللہ علیہ و الہ وسلم کو فرماتے ہوئے سنا : میری امت میں بدترین لوگ وہ ہیں جو نعمتوں میں پیدا ہوئے اور اس میں پرورش پائی اور رنگ برنگ کھانا کھاتے ہیں اور منہ پھاڑ کر باتیں کرتے ہیں ۔

اور میں نے حضور صلی اللہ علیہ و الہ وسلم کو فرماتے ہوئے سنا : اے بنو ہاشم ! میں نے تمہارے لیے اللہ سے مانگا کہ تمہیں نجباء رحماء بنائے اور مین نے مانگا کہ تمہارے گمراہوں کو ہدایت دے ، تمہارے ڈرنے والوں کو امن دے اور تمہارے بھوکوں کو سیر کر دے ۔

میں رسول اللہ صلی اللہ علیہ و الہ وسلم کے دائیں دست مبارک میں ککڑی دیکھی اور بائیں دست مبارک میں تاز ہ کھجوریں دیکھیں، آپ ایک مرتبہ ککری اور دوسری مرتبہ کھجور کھاتے تھے ۔

حضور صلی اللہ علیہ و الہ وسلم کو بھونی ہوئی بکری تحفہ دی گئی ، آپ صلی اللہ علیہ و الہ وسلم خود بھی تناول کرتے ور دوسروں کو کھلاتے بھی تھے اور میں نے آپ صلی اللہ علیہ و الہ وسلم کو فرماتے ہوئے سنا کہ تم پر پشت کا گوشت لازم ہے کیونکہ وہ زیادہ بہتر ہے ۔