Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم سے اس آدمی کے بارے پوچھا گیا ، نماز میں جس کا وضو ٹوٹ جاتا ہے؟ آپ نے فرمایا : نماز نہ توڑے جب تک آواز نہ سے یا بدبو نہ پائے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم چاند دیکھو تو روزہ رکھو، جب تم چاند دیکھو تو عید کرو، اگر آسمان پر گرد و غبار ہو تو تیس دن مکمل کرو۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : عورت تیرے لیے ایک حالت پر نہیں رہے گی ، وہ ٹیڑھی پسلی کی طرح ہے ، اگر تو اس کو سیدھا کرے گا تو توڑ دے گا اور اگر اس کو چھوڑ دے گا تو ٹیڑھا ہونے کے باوجود اس سے فائدہ اٹھائے گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم کو فرماتے ہوئے سنا : اللہ کی لونڈیوں کو مسجد میں آنے سے نہ روکو، ہاں ! پردہ کر کے آئیں ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جو عورت اللہ اور آخرت کے دن پر ایمان رکھتی ہے ، وہ ایک دن کا سفر شوہر یا محرم کے علاوہ نہ کرے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس کو تم دیکھو کہ وہ تم سے مال اور اخلاق میں اعلیٰ ہے تو اس سے نیچے والے کو دیکھو۔

ہمام بن یحییٰ فرماتے ہیں : قتادہ سے اس آدمی کے بارے پوچھا گیا، جس کی صبح کی ایک رکعت فوت ہو گئی یہاں تک کہ سورج طلوع ہو گیا ؟ تو کہا : مجھے خلاس بن عمرو نے حدیث سنائی ، انہوں نے رافع سے اور انہوں نے حضرت ابو ہریرہ رضی اللہ عنہ سے روایت کی کہ حضور صلی اللہ علیہ و الہ وسلم نے فرمایا : اس کے ساتھ ایک اور رکعت ملا لے ۔ یعنی اب پوری دو رکعت نئے سرے سے ادا کرے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم جب قضائے حاجت کا ارادہ کرتے تھے تو میں آپ کے پاس پانی لاتا، آپ اس سے استنجاء کرتے اور اپنے دست مبارک زمین پر رگڑتے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : لوگوں پر ایسا زمانہ آئے گا کہ باندھا ہوا اونٹ اور دوزاد راہ آدمی کو زیادہ پسند ہوگا، ہر اس چیز سے جس کا وہ مالک ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : عنقریب تم پر قیصر اور ہر قل کا شہر فتح ہوگا، اس کا مال ترکہ کے ساتھ تقسیم کیا جائے گا ، اس کی آواز سنیں گے ، دجال ان کے پیچھے نکلے گا ، جو ان کے پاس ہو گا پھینک دیں گے ، وہ نگلیں گے اور اس سے لڑیں گے ۔

حضرت ابو ہریرہ رضی اللہ عنہ فرماتے ہیں کہ انصار کے ایک نابینا صحابی نے حضور صلی اللہ علیہ و الہ وسلم کی طرف پیغام بھیجا کہ میرے لیے میرے گھر میں خط کھینچیں کہ میں اس میں نماز پڑھوں ۔ حضور صلی اللہ علیہ و الہ وسلم تشریف لائے ، وہاں پر صحابہ کرام جمع ہوئے ، ان میں سے ایک آدمی نہ آیا، حضور صلی اللہ علیہ و الہ وسلم نے فرمایا : فلاں نہیں آیا؟ بعض لوگوں نے عرض کی : ہاں ! حضور صلی اللہ علیہ و الہ وسلم نے فرمایا : کیا وہ بدر میں شریک نہ ہوا تھا ؟ صحابہ کرام نے عرض کی : حاضر ہوا تھا لیکن اس اس طرح ۔ حضور صلی اللہ علیہ و الہ وسلم نے فرمایا : یقینا ً اللہ نے بدر والوں کو دیکھا ۔ فرمایا : تم جو چاہو عمل کرو ، میں نے تم کو معاف کر دیا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے وعدہ والے کو ناحق قتل کیا وہ جنت کی خوشبو نہیں پائے گا حالانکہ جنت کی خوشبو سو سال کی مسافت سے محسوس کی جائے گی۔