Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے ہر جمعہ کے دن والدین میں سے ایک یا دونوں کی قبر کی زیارت کی تو اس کو بخش دیا جائے گا اور اس کو نیکو کار لکھا جائے گا۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : جسے اللہ تعالیٰ نے نعمتوں کی کثرت سے نواز ہے اسے کثرت سے الحمد للہ کہنا چاہئے ۔ اور جس کے گناہ زیادہ ہوں وہ بکثرت استغفار پڑھے ۔ اور جس کا رزق دور ہو جائے اسے زیادہ سے زیادہ " لا حول ولا قوۃ الا باللہ " پڑھنا چاہئے ۔ اور جو کسی قوم کے ساتھ مہمان جائے وہ ان کی اجازت کے بغیر روزہ نہ رکھے ۔ اور جو کسی کے گھر میں جائے تو جہاں گھر والے بٹھائیں وہاں بیٹھے کیونکہ لوگ اپنے گھروں کے پردے کو زیادہ جانتے ہیں ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : زمین اللہ کی حدود کو قائم کرنا ، زمین پر بسنے والوں کیلئے چالیس دن بارش برسنے سے بہتر ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے تین چیزوں کیلئے برکت کی دعا کی : سحری، ثرید اور پیمانہ ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اللہ کا ذکر کثرت سے کرنے والا منافقت سے بری ہوتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا :انگور کو کرم نہ کہو کیونکہ کرم مسلمان آدمی ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : ہ یہ امت ختم ہونے سے پہلے تیس جھوٹے دجال نکلیں گے ، وہ سب کے سب گمان کریں گے کہ وہ اللہ کے رسول ہیں ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : بھاؤ نہ بڑھاؤ ، آپس میں غصہ نہ کرو، حسد نہ کرو، تدبیر نہ کرو، اللہ کے بندو ! بھائی بھائی بن جاؤ، جس طرح اللہ نے تمہیں حکم دیا ہے ۔

حضرت ابو ہریرہ رضی اللہ عنہ فرماتے ہیں کہ ایک آدمی نے عرض کی : یا رسول اللہ صلی اللہ علیہ و الہ وسلم ! میں نے آج رات آپ صلی اللہ علیہ و الہ وسلم کو دعا کرتے ہوئے سنا ہے ، جو مجھ تک آپ کے حوالہ سے پہنچی ہے ، آپ صلی اللہ علیہ و الہ وسلم اللہ کی بارگاہ میں عرض کر رہے تھے : " اللھم اغفرلی ذنبی الیٰ آخرہ " ۔ فرمایا : کیا تو سمجھتا ہے کہ ان میں کوئی چیز چھوڑ دی ہے ؟

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم میں سے کوئی کسی قوم کے پاس آئے اور لوگ بیٹھے ہوئے ہوں تو ان کو سلام کرے ، جب اپنی ضرورت پوری کر لے اور کھڑا ہونے کا ارادہ کرے تو سلام کرے ، پہلا دوسرے سے زیادہ حقدار ہے ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے مجھ سے فرمایا : اے ابو ہریرہ ! اللہ کی تقسیم پر راضی ہو جا، مالدار ہو جائے گا۔ متقی ہو جا، اللہ کا بندہ بن جائے گا، اور لوگوں کیلئے وہی پسند کر جو اپنے لئے کرتا ہے مومن ہو جائے گا۔ اور ہمسایوں سے اچھا سلوک کر مسلمان ہو جائے گا۔ اور بہت زیادہ ہنسنے سے پرہیز کر کیونکہ یہ دل کو مردہ کرتا اور قہقہہ شیطان کی طرف سے ہوتا ہے اور تبسم اللہ کی طرف سے ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : رکوع و سجود مکمل نہ کرنے والے کی نماز نہیں ہوتی ۔