Al Muajam Al Kabir Tibrani

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : سنو ! میرے اور حضرت عیسیٰ علیہ السلام کے درمیان کوئی نبی ہے نہ کوئی رسول مگر یہ کہ وہ میرے بعد میرے نائب ہو نگے ۔ دجال کو قتل کریں گے ، صلیب کو توڑ دیں گے ، جزیے ختم کر دیں گے اور جنگیں اسلحوں سے ہونگی ۔ سنو ! تم میں سے جو انہیں پائے تو انہیں سلام کرے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جو اللہ اور آخرت کے دن پر ایمان رکھتا ہے ، وہ جب کسی کام میں شریک ہو تو حق بات کہے یا خاموش رہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : آدمی جبار ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : دنیا میں نیکی کرنے والے ، آخرت میں بھی نیکی کرنے والے ہوں گے اور دنیا میں برائی کرنے والے آخرت میں برائی کرنے والے ہوں گے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : سعادت مند وہ ہے جو اپنی ماں کے پیٹ میں سعادت مند تھا۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : جب تم میں سے کوئی نماز پڑھے تو اپنے جوتے اتار لے ، ان کو پیروں کے آگے اتار کر ان کے ذریعے کسی کو تکلیف نہ دے ۔

حضرت ابو ہریرہ رضی اللہ عنہ فرماتے ہیں کہ عرض کی گئی : یا رسول اللہ ! کیا ہم جنت میں اپنی عورتوں سے جماع کریں گے ؟ آپ صلی اللہ علیہ و الہ وسلم نے فرمایا : ایک آدمی دن میں سو حوروں کے پاس جائے گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : امام ضامن ہے اور مؤذن امانت دار ہے ، اے اللہ ! ماموں کو ہدایت دے اور مؤذنوں کو بخش دے ۔

حضرت ابو ہریرہ رضی اللہ عنہ بیان کرتے ہیں کہ حضرت ابو ذر غفاری رضی اللہ عنہ نے عرض کیا : یا رسول اللہ صلی اللہ علیہ و الہ وسلم ! مالدار لوگ ہم پر نیکیوں میں سبقت لے گئے ۔ وہ نماز تو ہماری طرح ہی پڑھتے ہیں اور روزے بھی ہماری طرح ہی رکھتے ہیں لیکن ان کے پاس مال و دولت کی کثرت ہے ( جس سے وہ صدقہ و خیرات کر کے اضافی اجر کما لیتے ہیں ) اور ہمارے پاس اتنا کچھ بھی نہیں کہ اس سے صدقہ کر سکیں ۔ آپ صلی اللہ علیہ و الہ وسلم نے فرمایا : اے ابو ذر ! کیا میں تمہیں ایسے کلمات نہ سکھا دوں جن کو پڑھنے سے تم سبقت لے جانے والوں کو پالو اور پیچھے رہ جانے والے تجھ تک نہ پہنچ سکیں سوائے ان کے جو تیرے جیسے عمل کریں ۔ عرض کیا : کیوں نہیں ؟ یا رسول اللہ صلی اللہ علیہ و الہ وسلم ! آپ صلی اللہ علیہ و الہ وسلم نے فرمایا : ہر نماز کے بعد تینتیس مرتبہ سبحان اللہ ، تینتیس مرتبہ الحمد للہ اور تینتیس مرتبہ اللہ اکبر پڑھا کر۔ یہ بات مالداروں کو پہنچی تو انہوں نے وہی بات کی جو انہوں نے کی تھی ۔ وہ نبی کریم صلی اللہ علیہ و الہ وسلم کے پاس آئے اور انہیں خبر دی تو آپ صلی اللہ علیہ و الہ وسلم نے فرمایا : یہ اللہ کا فضل ہے وہ جسے چاہتا ہے عطا فرماتا ہے ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم صبح کی نماز میں تشریف لائے اور نماز کیلئے تکبیر کہی پھر اشارہ کیا اور چلے گئے ۔ جب واپس لوٹے تو آپ کے بالوں سے پانی کے قطرے ٹپک رہے تھے ۔ آپ صلی اللہ علیہ و الہ وسلم نے لوگوں کو نماز پڑھائی اور اس کے بعد فرمایا : بے شک میں بھی ایک انسان ہوں ، اور میں اجنبی تھا لیکن غسل کرنا بھول گیا ۔ ( نوٹ : یاد رہے کہ یہ بات آپ صلی اللہ علیہ و الہ وسلم نے تعلیم امت کیلئے کی ورنہ حضور صلی اللہ علیہ و الہ وسلم کی ذات اطہر اس سے پاک و صاف ہے ، آپ کی ذات پاک کے متعلق ایسا گمان کرنا سوائے ایمان ضائع کرنے کے کچھ نہیں ۔ دستگیر غفرلہ ، )

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : مونچھیں کٹواؤ اور داڑھی بڑھاؤ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : اہل جنت ، جنت میں اس حال میں داخل ہونگے کہ ان کے بدن پر کوئی بال نہ ہوگا، روشن چہرے اور سرمہ لگائے ہوئے ہونگے ۔ ان کی عمریں تینتیس برس کی ہونگی اور قد کاٹھ حضرت آدم علیہ السلام کی تخلیق کے مطابق ساٹھ ضرب سات ہاتھ ہوگا۔