Al Muajam Al Kabir Tibrani

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : چوپایوں پر کوئی تاوان نہیں اور معدنیات میں سے خمس ادا کیا جائے گا۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : با جماعت نماز کو تنہا ء نماز پر پچیس درجے فضیلت حاصل ہے ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : جس نے اپنے مسلمان بھائی پر ظلم کیا ہے وہ آج ہی اسے معاف کرو لے قبل اس کے کہ اس کی نیکیوں کو لے لیا جائے نہ کہ دینار اور درہم سے ادائیگی ہو گی ۔ اگر اس کے پاس نیک اعمال ہوئے تو اس کے ظلم کی مقدار کے مطابق اس کی نیکیاں لے لی جائیں گی اور اگر اس کے نیک اعمال نہ ہوئے مظلوم کے گناہ لے کر اس پر ڈال دیئے جائیں گے ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم کسی جمعہ میں خطبہ دیتے ہوئے فرمایا : اے مسلمانو ! یہ ایسا دن ہے جسے اللہ تعالیٰ نے تمہارے لئے عید کا دن بنایا ہے ۔ لہذا اس دن غسل کیا کرو اور تم پر مسواک کرنا لازم ہے ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : اگر آدمی جان جائے کہ مرنے کے بعد اس پر کیا بیتے گی تو وہ لقمہ تک نہ کھائے اور گھونٹ تک نہ پئے بلکہ روئے اور سینہ کوبی کرتا رہے ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : جب تم میں سے کوئی مجلس میں آئے تو سلام کرے اور جب جائے تو بھی سلام کرے اور پہلا آدمی دوسرے سے زیادہ ( جگہ کا ) حقدار نہیں ہے ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : جب گرمیاں ہوں تو نماز کو ٹھنڈا کیا کرو بے شک گرمی جہنم تپش میں سے ہے ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : جس نے لا الہ الا اللہ پڑھ لیا تو اسے زندگی میں ایک دن ضرور نفع ہو گا خواہ سختی آنے کے بعد ہی ہو ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے حضرت علاء الحضرمی رضی اللہ عنہ کو بحرین بھیجا تو میں ان کے پیچھے چلا گیا۔ میں نے ان کی باتوں کو نوٹ کیا اور میں نہیں جانتا کہ ان میں زیادہ عجیب کونسی ہے ۔ جب ہم دریا کے کنارے پہنچے تو انہوں نے کہا : اللہ کا نام لو اور اونٹوں کو ڈال دو ۔ ہم نے بسم اللہ پڑھی اور اونٹوں کو ڈال دیا۔ پھر ہم نے دریا عبور کیا لیکن ہمارے اونٹوں کے سموں کے علاوہ کچھ بھی گیلا نہ ہوا۔ پھر ہم ایک بیابان میں سے گزرے تو ہمارے پاس پانی نہ تھا ہم نے ان کی پانی کی شکایت کی تو انہوں نے نماز پڑھی اور لوگوں نے بھی ان کے ساتھ دو رکعتیں پڑھی پھر انہوں نے اللہ سے دعا کی تو بادل کا ٹکڑا آیا اور اس نے ہم پر خوب پانی برسایا ، ہم نے پانی پیا اور خوب سیراب ہوئے ۔ اور ان کا وصال ہو گیا تو ہم نے انہیں ریت میں دفن کر دیا جب ہم تھوڑی دور گئے تو سوچا کہ انہیں کوئی درندہ نہ کھا جائے ۔ جب ہم واپس لوٹ کر آئے تو ہم نے انہیں وہاں نہ پایا ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم ہمارے پاس تشریف لائے اور فرمایا : اپنی ڈھال پکڑ لو۔ ہم نے عرض کی : یا رسول اللہ صلی اللہ علیہ و الہ وسلم کیا دشمن آ گیا ہے ؟ آپ صلی اللہ علیہ و الہ وسلم نے فرمایا : اپنے لئے جہنم سے ڈھال پکڑ لو ۔ تم سب کہو " سبحان اللہ و الحمد للہ ولا الہ الا اللہ و اللہ اکبر ولا حول و لا قوۃ الا باللہ " بے یہ شک کلمات قیامت کے دن آگے اور پیچھے سے آئیں گے اور نجات دلانے والے بن کر آئیں گے اور بے شک یہی باقی رہ جانے والی نیکیاں ہیں ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : جنت کی خوشبو پانچ سو سال کی مسافت سے سونگی جا سکتی ہے لیکن اپنے عمل پر احسان جتلانے والا، عادی شرابی اور ماں باپ کا نافرمان اسے خوشبو کو سونگھ نہ سکے گا۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : جہنم میں جو بندے اکٹھے نہیں ہونگے : ایک وہ شخص جس نے اپنے ساتھی کو تکلیف پہنچائی اور دوسرا وہ مسلمان جس نے کسی کافر کو قتل کیا پھر مسلمان کی راہنمائی کی اور اس سے اچھا سلوک کیا ۔ اور کسی مومن کے پیٹ میں اللہ کی راہ میں چلنے کا گرد و غبار اور جہنم کا دھواں اکٹھا نہیں ہوگا۔ اور کسی مومن کے پیٹ میں ایمان اور حسد اکٹھے نہیں ہو سکتے ۔