Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے بیع محاقلہ اور مزابنہ اور ملامسہ سے منع فرمایا اور نکاح شغار سے منع فرمایا ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : بچہ ولادت کے وقت چیختا ہے کیونکہ شیطان اس وقت اس کو چھو رہا ہوتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : کہ میں نے کہا : اے جبرائیل ! کیا تمہارا رب عزوجل نماز پڑھتا ہے ؟ عرض کی : جی ہاں ! میں نے کہا : اللہ کی نماز کیا ہے ؟ فرمایا : میں سبوح قدوس ہوں ، میری رحمت میرے غضب پر غالب ہے ، میری رحمت میرے غضب پر غالب ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم میں سے کوئی جوتا پہنے تو پہلے دائیں پاؤں میں پہنے اور جب اتارے تو پہلے بائیں پاؤں سے اتارے۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : کسی کھیل میں سبقت لے جانا ، جائز نہیں ہے سوائے تین کھیلوں کے : اونٹ تیرا اور گھوڑے میں ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اللہ تعالیٰ نے فرمایا : میں نے اپنے بندوں کیلئے وہ تیار کر رکھا ہے جو کسی آنکھ نے دیکھا نہیں ہے ، کسی کان نے سنا نہیں ہے اور کسی انسان کے دل میں اس کا خیال تک نہیں آیا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم سے گم شدہ کے متعلق پوچھا گیا تو آپ صلی اللہ علیہ و الہ وسلم نے فرمایا : گم شدہ شی سے نفع اٹھانا، جائز نہیں ہے ، جسے کوئی گم شدہ شی ملے تو وہ اعلان کرے ، اگر اس کا مالک آ جائے تو اسے واپس کر دے ، اگر مالک نہ آئے تو اس کی طرف سے ( یعنی مالک کی طرف سے ) صدقہ کر دے اگر اس کے بعد مالک آ جائے تو اسے اس شی اور اجر کے درمیان اختیار دے ( یعنی وہ شخص چاہے تو اپنی شی لے لے ، چاہے تو ثواب لے لے ) ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب حضرت موسیٰ علیہ السلام نے اللہ سے گفتگو کی تو صفا پہاڑی پر اندھیری رات میں چیونٹی چلتے ہوئے دس فرسخ کی مسافت سے دیکھ لیتے تھے ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : تم میں سے جو زندہ رہا وہ حضرت عیسیٰ علیہ السلام کو امام اور حاکم منصف کے طور پر دیکھے گا۔ آپ علیہ السلام جزیہ روک دیں گے اور صلیب کو توڑ دیں گے اور خنزیر کو قتل کریں گے اور جنگ اسلحے سے جیتی جائے گی ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب ثریا ستارہ بلند ہو گا تو ہر شہر سے مصیبت اٹھ جائے گی۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم کو چھینک آتی تو آپ اپنا چہرہ مبارک ( ہاتھوں کے ذریعہ ) ڈھانپ لیتے تھے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم میں سے کسی کا ہاتھ اس کی شرمگاہ کو لگے جبکہ شرمگاہ پر پردہ نہ ہو تو ہاتھ دھونا واجب ہے ۔