Al Muajam Al Kabir Tibrani

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : آدمی کا ایمان مکمل تب ہوتا ہے ، جب وہ ہر حدیث بیان کرنے میں ان شاء اللہ کہے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : جو کوئی لا الہ الا اللہ محمد رسول اللہ کہتا ہے تو اس کو خوشخبری دی جاتی ہے اور جو کوئی اللہ اکبر کہتا ہے تو اس کو بھی خوشخبری دی جاتی ہے ۔ عرض کی گئی :یا رسول اللہ جنت کی ؟ آپ نے فرمایا : ہاں ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : کاروبار میں قسم سے نفع تو ہوتا ہے ، لیکن کمائی میں برکت ختم ہو جاتی ہے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : لوگ ایسے سو اونٹ کی طرح ہیں ، جن میں کوئی سواری موجود نہ ہو۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : جس نے کسی قسم کے گھر میں بغیر اجازت کے جھانکا تو اس گھر والوں کے لئے اس کی آنکھوں کو پھوڑنا جائز ہے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : جنت میں موتیوں کا محل ہے ، اس میں سر درد اور تھکاوٹ نہیں ہے ، اللہ عزوجل نے وہ اپنے خلیل حضرت ابراہیم علیہ السلام کی مہمان نوازی کیلئے تیار کیا ہے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : کنواری عورت کی شادی، اس کی اجازت سے کرنی چاہیے اور اس کی خاموشی اس کی اجازت ہے اور ثیبہ ( شوہر دیدہ ) کا معاملہ اس وقت تک درست ہوگا، جب تک کسی ناراضگی کا سبب نہ بنے ۔ پس جب ناراضگی کا سبب بنے جبکہ اس کے ولی رضامندی چاہتے ہوں تو مقدمہ بادشاہ وقت ( قاضی کے عدالت ) کے سامنے پیش کیا جائے گا۔ حضرت اسحاق فرماتے ہیں ، کہ میں نے راوی حدیث عیسیٰ سے عرض کی : اس حدیث کے آخری حسہ کا تعلق بھی حضور صلی اللہ علیہ و الہ وسلم کی حدیث سے ہے ؟ فرمایا : ہمیں اوزاعی نے اسی طرح بیان کیا ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے عرض کی اے اللہ ! حاجی کو بخش دے ، جس کیلئے حاجی بخشش کی دعا کرے ، اس کو بخش دے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے اللہ عزوجل کے ارشاد : " جو مومن کو جان بوجھ کر قتل کرے ، اس کی سزا جہنم ہے ۔ " کے متعلق فرمایا : اس کا مطلب ہے : بیشک ہم اسے سزا دیں گے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : عورت کے ساتھ اس کی پھوپھی اور اس کی خالہ پر نکاح نہ کیا جائے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے فرمایا : جب نماز کیلئے اقامت پڑھی جائے تو وہ صرف وہی نماز ہے ، جس کیلئے اقامت پڑھی جائے ۔

حضرت ابو ہریرہ رضی اللہ عنہ روایت کرتے ہیں کہ حضور صلی اللہ علیہ و الہ وسلم نے صحابہ کرام کو نماز پڑھائی ، آپ نے نماز کے دوران اپنے نعلین مبارک اتارے ، جب صحابہ کرام نے یہ محسوس کیا ، تو انہوں نے بھی اپنے جوتے اتار دیئے ، جب حضور صلی اللہ علیہ و الہ وسلم نماز سے فارغ ہوئے تو لوگوں کی طرف متوجہ ہو کر فرمایا : میرے پاس ایک فرشتہ آیا، اس نے مجھے بتایا : آپ کے نعلین میں قذر ( تکلیف دہ چیز ) ہے ۔ پس جب تم میں سے کوئی مسجد کے دروازے کی طرف آئے تو اپنے جوتے الٹ پلٹ کے دیکھ لے ، اگر اس میں کوئی شی دیکھے تو اسے صاف کر لے ، پھر اس میں نماز پڑھے ، اگر اس کی مرضی ہو ورنہ اسے اتار دے ۔