Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : میری امت کا کوئی شخص دل میں برائی کا سوچے لیکن جب تک اس پر عمل نہ کرے یا اسے بول نہ دے تو اللہ تعالیٰ اس سے درگزر فرماتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم کے پاس احد کے دن برتن لایا گیا ، آپ صلی اللہ علیہ و الہ وسلم نے برتن کے پاس بول مبارک فرمایا : پھر اس برتن سے پانی نوش فرمایا ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : ہر بندے کی آسمان میں کوئی نہ کوئی شہرت ہوتی ہے ۔ اگر اس کی شہرت اچھی تو دنیا میں بھی اچھی شہرت ہوتی ہے اور اگر بری ہو تو دنیا میں بھی بری شہرت ہو جاتی ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : زمیں میں میری امت کنکروں کے ذروں اور بارش کے قطروں سے زیادہ ہو گی۔

حضرت ابو ہریرہ رضی اللہ عنہ فرماتے ہیں کہ میرے دوست صلی اللہ علیہ و الہ وسلم نے مجھے تین وصیتیں فرمائیں : نماز چاشت کی دو رکعت ، سونے سے پہلے وتر پڑھنے ، اور ہر ماہ تین روزے رکھنے کی اور مجھے منع فرمایا کہ جب میں سجدہ کروں تو بندر کی طرح بیٹھوں یا کوے کی طرح ٹھونکے لگاؤں اور لومڑی کی طرح ادھر اُدھر دیکھوں ۔

حضرت اعرج فرماتے ہیں کہ حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اے ابو ہریرہ ! علم الفرائض سیکھو کیونکہ یہ نصف علم ہے ، یہ بھلا دیا جائے گا اور میری امت میں سب سے پہلے اٹھایا جائے گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم میں سے کوئی اپنے مسلمان بھی کے پاس آئے اور وہ اسے کھانا کھلائے تو وہ کھا لے اور اس بارے میں نکتہ چینی نہ کرے اگر پانی پلائے تو پی لے ۔

حضرت ابو ہریرہ رضی اللہ عنہ فرماتے ہیں کہ نبی کریم صلی اللہ علیہ و الہ وسلم نے فرمایا : جو شخص حج کرنے کیلئے نکلا اور راستے میں فوت ہو گیا اس کیلئے قیامت تک حج کا ثواب لکھا جاتا ہے ۔ اور جو عمرے کیلئے نکلا اور راستے میں فوت ہو گیا تو اس کیلئے قیامت تک عمرے کا ثواب لکھا جاتا ہے اور جو شخص جہاد کے لیے نکلا اور راستے میں فوت ہو گیا اس کیلئے قیامت تک جہاد کا ثواب لکھا جاتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے ایک آدمی کو اکیلے صفوں کے پیچھے نماز پڑھتے دیکھا تو آپ صلی اللہ علیہ و الہ وسلم نے فرمایا : دوبارہ نماز پڑھ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے رمضان میں روزہ کی حالت میں بھول کر کھایا یا پیا ، اس پر قضاء اور کفارہ نہیں ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : آدمی کے غلام اور استعمال کے گھوڑے پر زکٰوۃ نہیں ہے۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم جب کسی قوم کے لیے یا اس کے خلاف دعا کرنا چاہتے تو آپ دعائے قنوت پڑھتے تھے ۔