Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اپنی ضرورتیں ان لوگوں کے پاس لے جاؤ، جن کے چہرے خوبصورت ہوں ۔(کیونکہ ظاہری حسن و جمال، باطنی حسن و جمال کا نمونہ ہے ۔ اکثر بد صورت بد خلق ہوتا ہے بعض نے کہا : جو لوگ والے صاحب قدرت ہوں ، ان سے اپنے کام لو ۔ )

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تمہارے پاس یمن کے لوگ آئیں گے وہ دلوں کے نرم ہیں ، ایمان یمن والوں کا ہے اور حکمت یمن والوں کی ہے اور فقہ یمن والوں کی ہے ۔

حضرت ابو ہریرہ رضی اللہ عنہ فرماتے ہیں کہ رسول کریم صلی اللہ علیہ و الہ وسلم نے فرمایا : بیشک اللہ تعالیٰ نے جب مخلوق کو پیدا کیا تو حضرت جبرائیل کو بھیج کر لوگوں کو دو حصوں میں تقسیم فرمایا ۔ ایک قسم عربیوں کی بنائی اور ایک قسم عجمیوں کی بنائی ۔ اللہ کے زیادہ نیک لوگ عرب میں تھے پھر عرب کو دو حصوں میں تقسیم کیا۔ یمن کو ایک قسم اور مضر کو دوسری قسم بنایا اور قریش کو ایک قسم بنایا ۔ پس اللہ کے بہترین لوگ قریش میں تھے پھر مجھے ان میں سے بہترین لوگوں میں پیدا کیا، جن میں سے میں ہوں ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : نماز میں امام کو لقمہ دینے کی خاطر مردوں کیلئے تسبیح اور عورتوں کیلئے تالی مقرر کی گئی ہے ۔

حضرت ابو ہریرہ رضی اللہ عنہ روایت کرتے ہیں کہ وہ احد میں حضور صلی اللہ علیہ و الہ وسلم کے ساتھ تھے ، ان کے پاؤں پر تیر لگا ، وہ مسلسل لنگڑاتے رہے ، یہاں تک کہ ان کا وصال ہوا۔

حضرت ابو ہریرہ رضی اللہ عنہ روایت کرتے ہیں کہ جب حضرت ابو طالب کا وصال ہوا تو، حضور صلی اللہ علیہ و الہ وسلم کو اطلاع دی گئی، آپ صلی اللہ علیہ و الہ وسلم نے فرمایا : اے چچا ! کتنا جلدی میں نے آپ کو کھو دیا۔

حضرت براء بن عازب رضی اللہ عنہ فرماتے ہیں کہ میری ماں کے بھائی میرے خالو نے مجھے حدیث بیان کی کہ رسول کریم صلی اللہ علیہ و الہ وسلم نے فرمایا : آج کے دن ہمارے لیے سب سے پہلا حکم نماز ہے پھر بعد از نماز قربانی کرنا ہے ۔ راوی کا بیان ہے : میں نے عرض کی : اے اللہ کے رسول ! میں نے نماز پڑھنے سے پہلے قربانی کر لی ہے ۔ مجھے پسند ہے کہ میرے پاس میرے پڑوسیوں کے لیے ایک وقت کاکھانا موجود ہو ۔ میرے پاس بھیڑ کا ایک بچہ ہے ،جو مجھے دو بکریوں کے گوشت سے زیادہ پسند ہے ، کیا میں اسے ذبح کر سکتا ہوں ؟ فرمایا : ہاں ، لیکن تیرے بعد کسی کے لیے جائز نہ ہو گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : ایک عمرہ سے لے کر دوسرے عمرہ تک کے درمیان ہونے والے گناہوں کی معافی ہے اور حج مبرور کی جزاء جنت ہی ے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : میری اس مسجد کی اذان سن کر نکلنے والا یا تو ضرورت مند ہوگا ، یا منافق ہو گا، جو واپس نہیں لوٹے گا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : قیامت آنے سے پہلے سر عام اللہ کا انکار ہو گا، یہ کام اس وقت ہو گا جب وہ اپنے رب کے بارے میں کلام کریں گے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم کے پاس تھا کہ ایک آدمی یعنی قیس آپ کے پاس آیا، اس نے عرض کی : یا رسول اللہ ! قبیلہ حمیر پر لعنت کریں ؟ حضور صلی اللہ علیہ و الہ وسلم نے ان سے اعراض فرمایا: وہ دوسری طرف سے ہو کر آیا تو حضور صلی اللہ علیہ و الہ وسلم نے اس بار بھی اعراض فرمایا : پھر حضور صلی اللہ علیہ و الہ وسلم نے فرمایا : اللہ حمیر پر رحم کرے ، ان کے دل جھکے ہوئے ان کے کام سلامتی والے ،ان کے ہاتھ کھانا کھلانے والے ، وہ امن اور ایمان والے ہیں ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : نماز چاشت کی حفاظت صرف رجوع کرنے والا ہی کر سکتا ہے ۔