Al Muajam Al Kabir Tibrani

حضرت ابو ہریرہ رضی اللہ عنہ سے مروی ہے کہ رسول کریم صلی اللہ علیہ و الہ وسلم نے فرمایا :رحم ( قریبی رشتہ داریاں ) کا لفظ ، رحمان سے بنا ہے ۔ رحمان کی کمر سے بندھی ہوئی ہیں ۔ وہ عرض کرتا ہے ؛ اے اللہ ! جس نے مجھ سے صلہ رحمی کی ، اس سے اچھا سلوک کر اور جو مجھ سے تعلق توڑے تو اس سے تعلق توڑ لے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جو مجھ پر جان بوجھ کر جھوٹ باندھے ، اس کو چاہیے کہ اپنا ٹھکانہ جہنم میں بنا لے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : قیامت کے دن لوگوں کے آپس میں جو مظالم اور حقوق ہیں ، وہ پہاڑوں کی طرح لائے جائیں گے یہاں تک کہ ان میں سے کوئی چیز باقی نہ رہے گی ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا :اللہ عزوجل صدقات کو قبول کرتا ہے اور قبول پاک کو کرتا ہے اور اس کو اپنے دائیں ہاتھ سے قبول کرتا ہے ، پھر اس کو اس کے مالک کیلئے بڑھاتا ہے جس طرح تم میں سے کوئی آدمی اپنے گھوڑے کے بچہ کو بڑھاتا ہے یہاں تک کہ ایک لقمہ احد کی مثل ہو جاتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم ہمارے پاس تشریف لائے ، ہم کھنبی کے متعلق گفتگو کر رہے تھے ، آپ صلی اللہ علیہ و الہ وسلم نے فرمایا : کھنبی " من " سے ہے اور اس کا پانی آنکھ کیلئے شفاء ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : بے زبان مارے تو اس کی دیت نہیں ہے ، رکاز میں خمس ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : محبت کسی سے بھی درمیانی کرو کیونکہ ہو سکتا ہے کہ کسی دن اس سے ناراضگی ہو جائے اور کسی سے بغض بھی درمیانہ رکھو ہو سکتا ہے کہ کسی دن اس سے محبت ہوجائے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب آدمی اس ( اپنی بیوی ) کے چار زانوں میں بیٹھے اور شرمگاہ ، شرمگاہ میں داخل ہو جائے تو غسل فرض ہو جاتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا :باجماعت نماز ، اکیلے نماز پڑھنے سے پچیس گنا زیادہ ثواب رکھتی ہے ۔

حضرت عاصم بن ضمرہ رضی اللہ عنہ فرماتے ہیں کہ حضرت مولا علی بن ابو طالب رضی اللہ عنہ سے عرض کی گئی : ہمیں حضور صلی اللہ علیہ و الہ وسلم کے دن کے نوافل کے متعلق بتائیں! حضرت علی رضی اللہ عنہ نے فرمایا : تم اس کی طاقت نہیں رکھتے ہو ۔ عرض کی گئی : ہمیں بتائیں تو سہی ! آپ رضی اللہ عنہ نے فرمایا : جب سورج یہاں سے نماز عصر تک ہو جاتا تو آپ دو رکعت ادا کرتے تھے ، پھر ظہر کے بعد دو رکعت ادا فرماتے تھے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جمعہ کے دن مسلمانوں کے اکٹھے ہونے کا دن ہے ، یہ دن اللہ تعالیٰ نے تمہارے لیے عید بنایا ہے ، اس دن غسل کرو اور مسواک کرنا تم پر لازم ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا :اگر آدمی کو معلوم ہو جائے کہ مرنے کے بعد کیا ہوتا ہے تو وہ کھانے کا ایک لقمہ نہ کھائے اور پینے کی چیز کا ایک گھونٹ نہ پئے بس وہ روئے اور اپنا سینہ پیٹے ۔