Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : ولیمہ کا برا کھانا وہ ہے جس میں مال دار لوگوں کو دعوت دی جائے اور محتاج لوگوں کو دعوت نہ دی جائے ، جس کو ولیمہ کی دعوت دی جائے اور وہ قبول نہ کرے تو اس نے اللہ اور اس کے رسول کی نافرمانی کی ، میں اپنی طرف سے گھر کر نہیں کہتا ہوں ۔

حضرت ابو ہریرہ رضی اللہ عنہ فرماتے ہیں کہ میں نے اصحاب صفہ میں سے ستر افراد کو دیکھا کہ ان میں سے کسی کے پاس چادر ہوتی تو اس کو اپنی گردنوں پر باندھتے تھے تو وہ کسی آدمی کی پنڈلی تک پہنچتی تھی تو کسی کے ٹخنوں تک ، وہ اپنے ہاتھ سے اکٹھا کر کے رکھتے تھے کہ شرمگاہ ننگی نہ ہو۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جہنم میں کافر کے دونوں کندھوں کے درمیان کی مسافت تیز چلنے والے سوار کیلئے تین دن کی ہوگی۔

حضرت ابو ہریرہ رضی اللہ عنہ سے مروی ہے : فرماتے ہیں : ( ایک بار ) مجھے انتہائی سخت بھوک لگی ۔ پس میں حضرت عمر کی خدمت میں حاضر ہوا۔ میں نے ان سے کتاب اللہ کی ایک آیت پوچھی ۔ پس وہ اپنے گھر میں داخل ہوئے پھر مجھے بتائی ۔ پس میں زیادہ دور نہیں گیا تھا کہ میں تھکاوٹ کے سبب منہ کے بل گر پڑا اچانک میری نگاہ اٹھی تو رسول کریم صلی اللہ علیہ و الہ وسلم میرے سر پر کھڑے تھے ۔ فرمایا : ابو ہریرہ ہو ؟ میں نے عرض کی : اے اللہ کے رسول ! حاضر ہوں اور خوشخبری آپ کے لیے ہے ۔ پس آپ کو میری حالت کی خبر دی گئی تو جو کچھ مجھے تھا آپ صلی اللہ علیہ و الہ وسلم پہچان گئے ۔ پس آپ اپنے گھر گئے اور میرے لیے ایک پیالہ دودھ کا حکم جاری فرمایا ۔ اے ابو ہریرہ ! اور پیو ! میں نے اور پیا یہاں تک کہ میری کمر سیدھی ہو گئی اور وہ تقریباً ایک کی مانند ہو گیا۔ پس میں حضرت عمر سے ملا تو میں نے اپنا معاملہ ذکر کیا اور میں نے ان سے کہا : تم میں سے جو اس کا مستحق ہے ، اللہ تعالیٰ اسے والی بنائے ۔ میں نے آپ کو ایک آیت پڑھنے کے لیے کہا اور میں اس کو آپ سے پڑھتا ہوں ۔ پس حضرت عمر نے فرمایا : قسم بخدا ! مجھے پسند ہے کہ میں آپ کو اس میں داخل کروں جو مجھے سرخ اونٹوں سے بھی زیادہ محبوب ہے ۔

حضرت ابو ہریرہ سے مروی ہے : آپ رضی اللہ عنہ فرماتے ہیں : ایک آدمی رسول کریم صلی اللہ علیہ و الہ وسلم کی خدمت میں آیا تاکہ وہ آپ کا مہمان بنے ، اس وقت آپ کے پاس مہمان نوازی کا سامان نہیں تھا۔ فرمایا : کوئی ایسا آدمی ہے ، جو اس کو اپنا مہمان بنائے ، اللہ اس پر رحم کرے ؟ پس ایک انصاری آدمی آیا۔ اسے اپنے گھر لے گیا اور اپنی بیوی سے کہا : رسول کریم صلی اللہ علیہ و الہ وسلم کے مہمان کی مہمان نوازی عزت کے ساتھ کر۔ اس نے عرض کی : بخدا ! ہمارے پاس اپنے بچوں کے کھانے کے سوا کچھ نہیں ۔ انصاری صحابی نے کہا : ( بہلا پھسلا کر آج بھوکا) بچوں کو سلا دے۔ پہلے چراغ جلا کر رکھ دے اور کھانا رسول کریم صلی اللہ علیہ و الہ وسلم کے مہمان کے قریب کر دے ، انہیں یہ معلوم ہو کہ میں ان کے ساتھ کھا رہا ہوں پھر چراخ بجھا دے اور سارا کھانا رسول کریم صلی اللہ علیہ و الہ وسلم کے مہمان کے لیے چھوڑ دے ( تاکہ وہ سیر ہو کر کھا لیں ) پس پس اس اللہ کی بندی نے ایسے ہی کیا ۔ راوی کہتا ہے : دوسرے دن صبح حضرت ابو طلحہ انصاری رسول کریم صلی اللہ علیہ و الہ وسلم کی خدمت میں آئے تو رسول کریم صلی اللہ علیہ و الہ وسلم نے فرمایا : تحقیق اللہ تعالیٰ خوش ہوا ( یا فرمایا : ) فلاں ( ابو طلحہ ) اور فلانی ( ان کی بیوی ) کے عمل کو دیکھ کر اللہ کو بھی ہنسی آ گئی اور ان کے بارے میں یہ آیت نازل فرمائی : اور وہ اپنی ذاتوں پر دوسروں کو ترجیح دیتے ہیں اگرچہ وہ خود شدید محتاج ہوں۔

حضرت ابو ہریرہ رضی اللہ عنہ فرماتے ہیں کہ : رسول کریم صلی اللہ علیہ و الہ وسلم نے فرمایا :میری امت کا پہلا گروہ جو جنت میں داخل ہو گا، ان کی شکلیں چودھویں رات کے چاند کی مانند ہوں گی اور جو ان کے پیچھے داخل ہوگا، وہ آسمان کے انتہائی چمکدار ستارے کی مانند چمک رہے ہوں گے ، وہ چھوٹے بڑے پیشاب ( قضائے حاجت ) کے محتاج نہ ہوں گے ، نہ تھوک آئے گی نہ رینٹھ ( کھنکار ) ان کی کنگھیاں سونے کی ہوں ،کستوری چھڑکی ہو گی ، ان کی انگیٹھیاں عود کی لکڑی کی ہوں گی ، ان کی بیویاں موٹی آنکھوں والی حوریں ہوں گی ، اور وہ اپنے باپ حضرت آدم کی شکل و صورت پر ہوں گے حتیٰ کہ ان کا قد بھی ساٹھ گز ہو گا۔

حضرت ابو ہریرہ رضی اللہ عنہ سے مروی ہے کہ رسول کریم صلی اللہ علیہ و الہ وسلم نے فرمایا : عنقریب میری امت پر ایسا زمانہ آئے گا ، قاری زیادہ ہوں گے ، لیکن فقیہ کم ہوں گے ۔ علم قبض کر لیا جائے گا اور ہرج زیادہ ہو گا۔ صحابہ نے عرض کی : ہرج کیا ہے ؟ فرمایا : تمہارے درمیان قتل و غارت ہو گی پھر اس کے بعد ایک زمانہ آئے گا ، قرآن ایسے لوگ پڑھ جائیں گے ، جن کے گلے سے نیچے نہیں اترے گا پھر ایک زمانہ آئے گا جس میں منافق مشرک ، ایمان والوں سے مسائل میں جھگڑا کریں گے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نماز میں اپنے قدموں کے بل اٹھتے تھے۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے رمضان المبارک کا مہینہ پایا جبکہ پہلے رمضان کی قضا اس کے ذمے باقی ہے اور اس نے روزے قضاء نہیں کیے تو اس کے روزے قبول نہیں کیے جائیں گے ۔

حضرت ابو ہریرہ رضی اللہ عنہ سے مروی ہے کہ رسول کریم صلی اللہ علیہ و الہ وسلم نے فرمایا : شہید کے جس سے پہلا قطرہ نکلنے کے ساتھ ہی اس کی بخشش کر دی جاتی ہے ۔ حوروں سے اس کا نکاح کر دیا جاتا ہے ۔ وہ اپنے گھر والوں میں سے بہتر آدمیوں کی سفارش کرے گا۔ اللہ کی راہ میں گھوڑے باندھنے والا جب اپنے اصطبل میں فوت ہو گیا تو اللہ تعالیٰ اس کے لیے قیامت کے دن تک اس کے عمل کا ثواب لکھے گا۔ اس کو صبح و شام رزق دیا جائے گا اور ستر حوروں سے اس کا نکاح کیا جائے گا۔ اس سے کہا جائے گا : ٹھہر ! اور سفارش کرنا شروع کر دے یہاں تک کہ حساب سے فراغت ہو جائے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا :جو اپنی بیوی سے حالت حیض میں وطی کرے اور اس دوران عورت حاملہ ہو جائے اور اس بچہ کو جذام کی بیماری لگے تو وہ صرف اپنے آپ کو ملامت کرے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے ہمیں نماز ظہر یا عصر پڑھائی ، آپ نے دو رکعت پڑھ کر ( سلام پھیر دیا ) تو " ذوالیدین "نامی ایک آدمی نے کھڑے ہو کر عرض کی : اے اللہ کے رسول ! کیا آپ بھول گئے یا نماز کم ہو گئی ؟ فرمایا : ( نماز کم نہیں ہوئی ) بلکہ مجھے بھول ہوئی ۔ پس آپ کھڑے ہوئے اور دو رکعتیں پڑھیں، ( جو رہ گئی تھیں۔ ) پھر بیٹھے بیٹے دو سجدے کیے پھر سلام پھیرا۔