Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا :بیوہ اور مسکین پر خرچ کرنے والا ، اللہ کی راہ میں جہاد کرنے والا ہے ، یا رات کو قیام کرنے والے اور دن کو روزہ رکھنے والے کی طرح ہے اور یتیم اور اس کے علاوہ کی کفالت کرنے والا ، بشرطیکہ اللہ سے ڈرنے والا ہو، میں اور وہ جنت میں اس طرح ہوں گے ۔ آپ صلی اللہ علیہ و الہ وسلم نے اپنی سبابہ اور وسطیٰ انگلی کے ساتھ اشارہ کیا ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : مقبول حج کی جزاء جنت ہی ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : روزہ چاند دیکھ کر رکھو اور چاند دیکھ کر عید کرو، اگر تم پر آسمان ابر آلود ہو تو تیس مکمل کرو۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : آدمی کا اپنے گھر والوں پر خرچ کرنا صدقہ ہے ۔

حضرت یحییٰ بن زکریا بن ابو الحواجب کوفی فرماتے ہیں کہ میں نے حضرت اعمش کا ہاتھ پکڑا تھا، آپ نے فرمایا : میں نے قرآن یحییٰ بن وثاب سے تیس مرتبہ پڑھا، ہر مرتبہ " والرجز" پڑھا، اسی طرح یحییٰ نے حضرت علقمہ سے اور علقمہ نے حضرت ابن مسعود سے اور حضرت ابن مسعود نے حضور صلی اللہ علیہ و الہ وسلم سے روایت کیا ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے حضرت جعفر بن ابوطالب اور گروہ کو حبشہ کی طرف بھیجا، آپ کو زاد راہ کیلئے یہ کلمات دیئے : " اللھم الطف لی فی تیسیر کل عسیر الیٰ آخرہ " ۔

اسی سند کے ساتھ حضور صلی اللہ علیہ و الہ وسلم سے مروی ہے : اللہ عزوجل عرفہ کی رات عام لوگوں کی وجہ سے فرشتوں کے سامنے فخر فرماتا ہے اور خاص کر کے حضرت عمر بن خطاب کے حوالے سے فخر فرماتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : میرے نام پر نام رکھو اور میری رکنیت پر رکنیت نہ رکھو۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : ( دوران نماز کسی واقعہ کی صورت میں امام کو متوجہ کرنے کیلئے ) مرد سبحان اللہ کہیں اور عورتیں تالی بجائیں۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : دو آدمی بیت الخلاء میں بیٹھ کر گفتگو نہ کریں اس حالت میں کہ دونوں کی شرمگاہ کھلی ہوئی ہو کیونکہ اللہ عزوجل ایسا کرنے سے ناراض ہوتا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : مجھے حکم دیا گیا ہے کہ لوگوں سے جہاد کروں لا الہ الا اللہ پڑھنے تک ، جس نے لا الہ الا اللہ پڑھا ، اس نے مجھ سے اپنا مال اور اپنی جان بچالی ، اس کا معاملہ اللہ کے سپرد ہے ، اللہ عزوجل نے اپنی کتاب میں نازل فرمایا ہے اور ایک متکبر قوم کا ذکر کیا ہے ۔ فرمایا : بیشک جب انہیں کہا جاتا تھا : " اللہ کے سوا کوئی عبادت کے لائق نہیں " تو وہ تکبر کرتے تھے ۔ " سورہ صافات : 35 ۔ اور فرمایا : یاد کرو جب مکہ کے کافروں نے اپنے دلوں میں ہٹ دھرمی پختہ کر لی ، وہی جاہلیت کی ہٹ دھرمی تو اللہ تعالیٰ نے اپنے رسول اور ایمان والوں پر اپنی تسکین نازل کر دی اور انہیں رسول اور ایمان والوں پر اپنی تسکین نازل کر دی اور انہیں پرہیزگاری کے کلمہ ( طیبہ ) مستحکم کر دیا اور وہ اس کے زیادہ حقدار اور اہل تھے ۔ اور اس کلمہ سے مراد : لا الہ الا اللہ ہے ۔

حضرت ابو ہریرہ رضی اللہ عنہ فرماتے ہیں کہ میں نے حضور صلی اللہ علیہ و الہ وسلم کو فرماتے ہوئے سنا کہ وہ ذات جس کے قبضہ قدرت میں میری جان ہے ! میں چاہتا ہوں کہ میں اللہ کی راہ میں شہید کیا جاؤں ، پھر میں زندہ کیا جاؤں پھر شہید کیا جاؤں ، پھر زندہ کیا جاؤں۔