Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تین دعائیں قبول ہوتی ہیں ، جن کے قبول ہونے میں کوئی شک نہیں ہے ، مظلوم کی بددعا ، ماں باپ کی اولاد کے حق میں دعا اور مسافر کی دعا۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم صرف جمعہ کے دن روزہ رکھنے سے منع کرتے تھے ، ہاں اگر اس سے پہلے والے دن کا روزہ رکھا جائے تو پھر ٹھیک ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : تم کافروں سے مسلسل لڑتے رہو گے یہاں تک کہ تم ایسی قوم سے لڑو گے جن آنکھیں چھوٹی ہوں گی ، ناک بڑے ہوں گے ، ان کے چہرے پھٹے ہوئے انگور کی طرح ہوں گے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : میری امت سے کچھ لوگ ہمیشہ دمشق کے دروازوں اور اس کے اردگرد اور بیت المقدس کے دروازوں اور اس کے اردگرد جہاد کریں گے ، جو ان کو رسوا کرنا چاہے گا ان کو کوئی نقصان نہیں پہنچا سکے گا ، وہ قیامت تک حق پر قائم رہیں گے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : روزہ جہنم سے ڈھال ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے یہ دعا کی : اے اللہ ! قبیلہ مضر والوں کو ہلاک کر ، ان پر حضرت یوسف علیہ السلام کے زمانہ کی طرح قحط سالی نازل فرما۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اللہ عزوجل فرماتا ہے : اے ابن آدم ! اگر زیادہ مال خرچ کر لے تو تیرے لیے بہتر ہے ، اگر تو روک لے تو تیرے لیے برا ہے ، مال دینے میں ابتداء اس سے کر جو تیرے زیر کفالت ہیں ، بطور کفایت رکھنے پر ملامت نہیں ہے ، اوپر والا ہاتھ نیچے والے ہاتھ سے بہتر ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : قیامت کے دن ( جسم کے حوالہ ) سے سب سے پہلے جو حساب لیا جائے گا، اللہ عزوجل فرمائے گا : کیا میں نے تجھے صحت نہیں دی تھی اور پیاس ختم کرنے کیلئے ٹھنڈا پانی نہیں دیا تھا ؟

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم میں سے کوئی جوتا پہنے تو پہلے دایاں جوتا پہنے اور جب اتارے تو پہلے بایاں اتارے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : امام ضامن ہوتا ہے اور مؤذن امانت دار ہوتا ہے ، اے اللہ ! اماموں کو ہدایت دے اور مؤذنوں کی مغفرت فرما۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس سے مجلس میں زیادہ لغو باتیں ہو جائیں وہ کھڑا ہونے سے پہلے یہ پڑھے : " سبحانک و بحمدک ، لا الہ الا انت ، استغفرک و اتوب الیک فانہ یغفر لہ ما کان فی ذلک المجلس " ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے صبح روزہ رکھ کر بھول سے کچھ کھا پی لیا ( تو اس کا روزہ اپنی جگہ قائم ہے ، اسے ) اللہ نے کھلایا اور پلایا ہے ۔