Al Muajam Al Kabir Tibrani

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جس کو پسند ہو کہ اللہ تعالیٰ اس کو آخرت کی شراب پلائے تو وہ دنیا کی شراب چھوڑ دے ' جو چاہتا ہے کہ آخرت میں ریشم پہنے تو وہ دنیا میں ریشم پہننا چھوڑ دے۔

حضرت سعد بن ابو وقاص اپنے دادا سے روایت کرتے ہیں : نبی کریم صلی اللہ علیہ وآلہ وسلم نے فرمایا: اگر جنت سے (حور) چھوٹا ناخن بھی ظاہر ہو جائے تو آسمان و زمین کا درمیان روشن ہو جائے اور اگر کوئی جنتی آدمی جھانکے اور اس کا کنگن ظاہر ہو جائے تو اس کی روشنی کے سامنے سورج کی روشنی ماند پڑ جائے جس طرح سورج کی روشنی کے سامنے تاروں کی روشنی ماند پڑ جاتی ہے۔

حضرت ابو ہریرہ رضی اللہ تعالیٰ عنہ فرماتے ہیں : نبی کریم صلی اللہ علیہ وآلہ وسلم نے فرمایا: تین بار تک چھینک مارنے والے کا جواب دو۔ پس اگر وہ پھر چھینک مارے تو وہ زکام کی علامت ہے۔

حضرت ابو ہریرہ رضی اللہ تعالیٰ عنہ فرماتے ہیں : رسول کریم صلی اللہ علیہ وآلہ وسلم نے فرمایا: جب تم میں سے کوئی آدمی اپنا ہاتھ اپنے ذکر (بلا حجاب) کی طرف لے جائے تو چاہیے کہ وہ وضو کرے۔

حضرت ابو ہریرہ رضی اللہ تعالیٰ عنہ فرماتے ہیں : حضرت بلال رضی اللہ تعالیٰ عنہ جب نماز کی اقامت کہنے کا ارادہ کرتے تو کہتے: "السلام علیک ایھا النبی ورحمۃ اللہ وبرکاتہ' الصلاۃ رحمک اللہ "۔

حضرت ابو ہریرہ رضی اللہ تعالیٰ عنہ فرماتے ہیں : رسول کریم صلی اللہ علیہ وآلہ وسلم نے فرمایا: ایک فرشتہ آسمان کے دروازوں میں سے ایک دروازے پر کہتا ہے: کون آج قرضہ دے گا، جو کل بدلہ دیا جائے اور ایک فرشتہ دوسرے دروازے پر کہتا ہے: اے اللہ ! (اپنی راہ میں ) مال خرچ کرنے والے کو اور مال عطا فرما اور نہ دینے والے کا مال ضائع کر دے۔

حضرت ابو ہریرہ رضی اللہ تعالیٰ عنہ سے مروی ہے کہ ایک یہودی نے رسول کریم صلی اللہ علیہ وآلہ وسلم کی خدمت میں عرض کی: اے ابو القاسم! اللہ تعالیٰ نے آسمان و زمین کے علاوہ کسی چیز کوپردے میں رکھا ہے؟ فرمایا: ہاں۔ اس کے اور ان فرشتوں کے درمیان جو عرش کے ارد گرد ہیں، ستر پردے آگ کے، ستر پردے نور کے ، ستر پردے تاریکی کے، ستر پردے ریشم کے ٹکڑوں کی مانند موتی کے، ستر پردے زرد موتی کے، ستر پردے سبز موتی کے، ستر پردے پانی کے، ستر پردے بادل کے ،ستر پردے برف کے ، ستر پردے اللہ کی رحمت کے ہیں، جن کے بارے میں کچھ بیان نہیں کیا جا سکتا۔ اس نے کہا: مجھے اللہ تعالیٰ اس فرشتے کے بارے میں بتائیں، جو اس سے زیادہ نزدیک ہے؟ فرمایا: اے یہودی ! جو میں تجھے بتاؤں گا، کیا تو اسے سچ سمجھے گا؟ کہا: ہاں ۔ فرمایا: بے شک ، جو فرشتہ اللہ تعالیٰ سے زیادہ نزدیک ہے، وہ اسرافیل پھر جبریل پھر میکائیل پھر موت کا فرشتہ ہے، اللہ تعالیٰ آپ اور آپ کی جملہ آل پررحمتیں فرمائے اور سلام بھیجے۔

حضرت ابو ہریرہ رضی اللہ تعالیٰ عنہ سے مروی ہے کہ رسول کریم صلی اللہ علیہ وآلہ وسلم نے فرمایا: نہیں ہے، کوئی سونے اور چاندی والا جو اس کا حق ادا نہیں کرتا مگر (اس سے) آگ کی تختیاں بنائی جائیں گی پھر انہیں جہنم کی آگ میں گرم کیا جائے گا۔ پس ان کے ساتھ اس کی پیشانی اور پیٹھ کو داغا جاتا رہے گا، ایک ایسے دن میں جس کی مقدار پچاس ہزار سال ہو گی یہاں تک کہ لوگوں کے درمیان فیصلہ کیا جائے۔ اس کے بعد وہ جنت یا دوزخ کی طرف اپنا راستہ دیکھے گا۔ ہر اونٹ والا جو اس کا حق ادا نہیں کرتا، (اور اس کے حقوق میں سے یہ ہے کہ اس کے وارد ہونے کے وقت اس کا دودھ نکالا جائے)۔ اسے قیامت کے دن لایا جائے گا ، اس میں سے کوئی ایک چیز بھی مفقود نہ ہو گی' اسے نشیبی نرم ہموار کھلے میدان میں ڈال دیا جائے گا اور وہ اونٹ اپنے کھروں سے اسے روندے گا اور منہ سے کاٹے گا۔ جب بھی ان میں سے ایک گزرے گا تو دوسرا آ جائے گا ایک ایسے دن میں جس کی مقدار پچا س ہزار سال ہو گی یہاں تک کہ لوگوں کے درمیان فیصلہ کیا جائے۔ اس کے بعد وہ جنت یا دوزخ کی طرف اپنا راستہ دیکھے گا اور ہر گائے اور بھیڑ بکری کا مالک جو ان کے حقوق ادا نہیں کرتا تو وہ قیامت کے دن لایا جائے گا، جس میں کوئی ایسا نہ ہو گا جو پھٹے کان اور ٹوٹے سینگ والا ہو پھر اسے نشیبی نرم ہموار کھلے میدان میں ڈال دیا جائے گا اور وہ اپنے سینگوں سے ماریں گے اور منہ سے کاٹے گا۔ جب بھی ان میں سے ایک گزرے گا تو دوسرا آ جائے گا، ایک ایسے دن میں جس کی مقدار پچاس ہزار سال ہو گی یہاں تک کہ لوگوں کے درمیان فیصلہ کای جائے۔

حضرت یحییٰ بن ابی سے روایت ہے کہ لوگوں میں سے سب سے بڑا چور وہ ہے ، جو نماز میں چوری کرتا ہے۔ لوگوں نے عرض کی: اے اللہ کے رسول ! وہ کیسے چوری کرتا ہے؟ فرمایا: وہ نماز کے رکوع و سجود مکمل نہیں کرتا۔

حضرت ابو ہریرہ رضی اللہ تعالیٰ عنہ سے مروی ہے : نبی کریم صلی اللہ علیہ وآلہ وسلم نے فرمایا: بے شک اللہ تعالیٰ جب اپنے کسی بندے کو پسند کر لیتا ہے تو حضرت جبریل علیہ السلام سے فرماتا ہے : میں اپنے فلاں بندے سے محبت کرتا ہوں تو بھی اس سے محبت کر! پس حضرت جبریل علیہ السلام اس سے محبت کرنا شروع کر دیتے ہیں اور وہ آسما ن والوں سے کہتے ہیں: بے شک اللہ تعالیٰ فلاں بندے سے پیار کرتا ہے ، تم بھی اس سے محبت کرو۔ پس آسمان والے بھی اس سے محبت کرنا شروع کر دیتے ہیں اور اس کے لئےزمین میں قبول عام رکھ دی جاتی ہے۔

حضرت ابو ہریرہ رضی اللہ تعالیٰ عنہ سے مروی ہے : فرماتے ہیں: ہم نے رسول کریم صلی اللہ علیہ وآلہ وسلم کی معیت میں "اذا السماء انشقت اور اقرء باسم ربک" میں سجدہ کیا۔

حضرت ابو ہریرہ رضی اللہ تعالیٰ عنہ سے مروی ہے : فرماتے ہیں: رسول کریم صلی اللہ علیہ وآلہ وسلم نے حضرت نجاشی بادشاہ کی نماز جنازہ چار تکبیریں کہہ کر پڑھائی۔