Al Muajam Al Kabir Tibrani

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: اللہ عزوجل یہودیوں اور عیسائیوں کو ہلاک کرے' انہوں نے اپنے انبیاء کی قبروں کو سجدہ گاہیں بنا لیا۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: میں نے خواب میں ایک کنواں دیکھا' میں نے اس سے جو چاہا نکالا' پھر ابن ابو قحافہ نے پکڑا' بن قحافہ نے دو یا ایک ڈول نکالا' ان کے نکالنے میں کمزوری تھی' اللہ نے انہیں معاف کیا' پھر ڈول گھوما تو حضرت عمر بن خطاب نے اسے پکڑا۔ میں لوگوں میں کوئی ایسا باکمال آدمی نہیں دیکھا جو ان کی طرف نکالنے والا ہو (تو انہوں نے نکالا) یہاں تک کہ تمام لوگوں اپنے اونٹوں کو سیراب کر کے کنویں کے ساتھ بیٹھ گئے۔

حضرت ابو ہریرہ رضی اللہ تعالیٰ عنہ فرماتے ہیں: میں نے رسول کریم صلی اللہ علیہ وآلہ وسلم کو فرماتے ہوئے سنا: اللہ کی راہ میں جہاد کرنے والے کی مثال اس قیام کرنے والے کی ہے، جو روزے اور نماز سے نہیں تھکتا یہاں تک کہ لوٹ آئے۔ قسم ہے، اس ذات کی ، جس کے قبضہ میں حضرت محمد صلی اللہ علیہ وآلہ وسلم کی جان ہے، جو اللہ کی راہ میں زخمی ہوتا ہے، اور اللہ جانتا ہے کہ کون اس کی راہ میں زخمی ہوا ہے تو وہ قیامت کے دن اس حال میں آئے گا کہ اس کا رنگ خون کی طرح ہو گا اور کستوری کی طرح خوشبوہو گی۔ قسم ہے، اس ذات کی جس کے قبضے میں میری جان ہے، میری آرزو ہے کہ میں اللہ کی راہ میں شہید کیا جاؤں پھر زندہ کیا جاؤں پھر شہید کیا جاؤں پھر زندہ کیا جاؤں پھر شہید کیا جاؤں۔ حضرت اابو ہریرہ رضی اللہ تعالیٰ عنہ فرماتے ہیں: رسول کریم صلی اللہ علیہ وآلہ وسلم نے یہ کلمات تین بار کہے۔

حضرت ابو ہریرہ رضی اللہ تعالیٰ عنہ سے مروی ہے: رسول کریم صلی اللہ علیہ وآلہ وسلم نے فرمایا: فتنے آنے سے پہلے نیک آعمال کر لو جو تاریک رات کے ٹکڑوں کی طرح ہوں گے۔ جب وہ آئیں گے تو تم میں سے ایک آدمی صبح اس حال میں کرے گا کہ مسلمان ہو گا اور شام کو کافر ہو گا اور شام کو مسلمان ہو گا تو صبح کو کافر ہو گا۔ وہ تھوڑے سے سامان کے بدلے اپنا دین بیچ دے گا۔

حضرت ابو ہریرہ رضی اللہ تعالیٰ عنہ سے روایت ہے : رسول کریم صلی اللہ علیہ وآلہ وسلم نے فرمایا: کسی دن پر سورج طلوع و غروب نہیں ہوتا، جو جمعہ کے دن سے زیادہ بزرگی والا ہو۔ ہر جانور جمعہ کے دن گھبرایا ہوا ہوتا ہے مگر جن و انس (پریشان نہیں ہوتے حالانکہ قیامت جمعہ کے دن آئے گی) جمعہ کے دن ہر مسجد کے دروازوں میں سے ہر دروازے پر فرشتے کھڑے ہوتے ہیں، جوپہلے والے اور اس کے بعد دوسروں سے پہلے آنے والوں کو لکھتے ہیں کہ ان کی مثال جانور، گائے ، بکری ، پرندہ (مرغی ، بطخ وغیرہ) اور انڈہ بطور قربانی پیش کرنے والے کی طرح ہے۔ پس جب امام صاحب خطبہ دینے کے لئے تشریف لاتے ہیں تو صحیفے لپیٹ دئیے جاتے ہیں۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے حضرت عبداللہ بن عمرو سے فرمایا: اے عبداللہ ! تمہاری کیا حالت ہوگی جب تم لوگوں میں تلچھٹ کی طرح باقی رہو گے' جب امانت کو کھایا جائے گا اور وعدہ خلافی کی جائے گی' لوگ اس طرح اختلاف کریں گے۔ آپ صلی اللہ علیہ وآلہ وسلم نے اپنی انگلیاں دوسری انگلیوں میں داخل فرمائیں۔ حضرت عبداللہ بن عمرو نے عرض کی: یا رسول اللہ ! آپ مجھے کیا حکم دیتے ہیں ؟ آپ صلی اللہ علیہ وآلہ وسلم نے فرمایا: جو نیکی کا عمل تم جانتے ہو ، وہ کرو، اور وہ چھوڑ دو، جسے تم برا جانتے ہو' خاص اپنی ذات کے لئے عمل کرو اور عوام الناس کو چھوڑدو۔

حضرت ابو ہریرہ رضی اللہ تعالیٰ عنہ فرماتے ہیں : لوگوں کی عادت تھی: جب ان کا کوئی آدمی فوت ہو جاتا تو وہ اسے رسول کریم صلی اللہ علیہ وآلہ وسلم کی خدمت میں لاتے تاکہ آپ صلی اللہ علیہ وآلہ وسلم اس پر سوال فرماتے : کیا اس پر کوئی قرضہ تو نہیں ہے؟ پس اگر لوگ کہتے : ہاں ۔ آپ صلی اللہ علیہ وآلہ وسلم فرماتے : کیا اس آدمی نے اپنے قرضے کی ادائیگی کے لئے کوئی مال چھوڑا ہے؟ اگر لوگ کہتے : ہاں تو آپ صلی اللہ علیہ وآلہ وسلم اس پر نماز پڑھاتے ورنہ فرماتے : اپنے دوست کی نماز جنازہ تم خود ہی ادا کرو۔ پس جب اللہ تعالیٰ نے آپ صلی اللہ علیہ وآلہ وسلم کو فتوحات عطا فرمائیں توفرمایا: میں مؤمنوں کی جانوں سے زیادہ ان کے حقوق ادا کرنے کا مستحق ہوں، جو قرض چھوڑ کر فوت ہو، اس کا قرضہ ہم ادا کریں گے اور جو مال چھوڑ کر فوت ہو، اس کا مال اس کے وارثوں کا ہو گا۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم دعا کرتے تھے: "اللھم ایما عبد سبیت فاجعلہ لہ الیک قربۃ یوم القیامۃ " ۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے فرمایا: ہم اپنے والد ابراہیم علیہ السلام سے زیادہ شک کرنے کا حق رکھتے ہیں' جب آپ نے عرض کی: اے میرے رب! مجھے دکھا دے کہ تو مردوں کو کیسے زندہ کرے گا؟ فرمایا: کیا تجھے یقین نہیں ؟ عرض کیا: یقین تو ہے لیکن یہ درخواست اس لئے ہے کہ میرا دل مطمئن ہو جائے۔ اللہ عزوجل میرے بھائی حضرت لوط علیہ السلام پر رحم کرے ، وہ مضبوط قبیلے کی پناہ لے رہے تھے اور اگر میں قید خانہ میں ٹھہرتا ، جہاں حضرت یوسف علیہ السلام ٹھہرے تو میں بلانے والے کی بات کو مان لیتا۔

حضرت ابو ہریرہ رضی اللہ تعالیٰ عنہ روایت کرتے ہیں کہ حضور صلی اللہ علیہ وآلہ وسلم نے پہلی صف والوں کے لئے تین مرتبہ دعا فرمائی اور دوسری صف والوں کے لئے دو مرتبہ ' تیسری صف والوں کے لئے ایک مرتبہ دعا فرمائی۔

حضرت ابو ہریرہ رضی اللہ تعالی عنہ روایت کرتے ہیں کہ حضور صلی اللہ علیہ وآلہ وسلم نے فرمایا: ثیبہ (شوہر ویدہ) کی ذات کے بارے اس سے مشورہ کیا جائے گا اور کنواری کا نکاح اس کی اجازت کے بغیر نہیں کیا جائے گا۔ صحابہ کرام نے عرض کی: اس کی اجازت کیسے ہو گی؟ آپ صلی اللہ علیہ وآلہ وسلم نے فرمایا : اس کا خاموش رہنا (ہی اجازت ہے)۔

حضرت ابو ہریرہ رضی اللہ تعالی عنہ روایت کرتے ہیں کہ حضور صلی اللہ علیہ وآلہ وسلم نے فرمایا: جس نے ثواب کی نیت سے اور ایمان سے رمضان کے روزے رکھے تو اس کے پہلے گناہ معاف کیے جائیں گے' جس نے لیلۃ القدر کو ایمان اور ثواب کی نیت سے قیام کیا تو اس کے پہلے گناہ معاف کیے جائیں گے۔