Al Muajam Al Kabir Tibrani

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : نماز فجر کے بعد سورج کے طلوع ہونے تک کوئی نماز نہیں ہے اور نماز عصر کے بعد سورج کے غروب ہونے تک ( کوئی نماز نہیں ہے ) ۔

حضرت ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ و الہ وسلم نے فرمایا : جو شخص ( استنجاء کیلئے ) پانی استعمال کرے وہ پانی کو پھیلا کر ڈالے اور جو ڈھیلا استعمال کرے وہ طاق تعداد میں استعمال کرے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جو مریض کی عیادت کرتا ہے ، وہ اللہ کی رحمت میں غوطہ زن ہوتا ہے ، اور جب اس کے پاس بیٹھتا ہے تو وہ ( اللہ کی رحمت میں ) ڈوب جاتا ہے ۔

حضرت ابو ہریرہ رضی اللہ عنہ فرماتے ہیں کہ ایک آدمی حضور صلی اللہ علیہ و الہ وسلم کے پاس آیا اور عرض کی : کیا ایک کپڑے میں نماز پڑھنا جائز ہے ؟ آپ صلی اللہ علیہ و الہ وسلم نے فرمایا : کیا تم میں سے ہر کسی کے پاس دو کپڑے ہیں ؟

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : با جماعت نماز ، اکیلے نماز پڑھنے سے پچیس گنا زیادہ فضیلت رکھتی ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس سے علم کے متعلق پوچھا گیا اور اس نے چھپایا تو قیامت کے دن اس کو آگ کی لگام ڈالی جائے گی ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : چاند دیکھ کر روزہ رکھو اور چاند دیکھ کر عید کرو، اگر آسمان غبار آلود ہو تو تیس دن مکمل کر لو۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جس نے نماز فجر کے بعد بارہ مرتبہ سورۃ اخلاص کی تلاوت کی ، اس کو چار مرتبہ قرآن پڑھنے کا ثواب ملے گا یہ اس دن روئے زمین کے لوگوں سے افضل ہوگا بشرطیکہ اللہ سے ڈرتا ہو۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جو کسی کے گھر میں بٖغیر اجازت کے جھانکے تو جائز ہے کہ اس کی آنکھ پھوڑ دی جائے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے اللہ عزوجل کے ارشاد : " جس دن آپ کے رب کی بعض نشانیاں آئیں گی " کی تفسیر کرتے ہیں کہ اس سے مراد سورج کا مغرب سے طلوع ہونا ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : ندامت ، توبہ ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : ہر نبی اور امیر کے ساتھ دوپہریدار ہوتے ہیں ، ایک اس کو نیکی کا حکم دیتا ہے اور دوسرا برائی کا حکم دیتا ہے ، جو برائی والے سے بچا لیا گیا وہ بچ گیا۔