Al Muajam Al Kabir Tibrani

22534حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : اگر کوئی ایسی چیز موجود ہوتی جس کے ذریعہ سے دواء تلاش کی جاتی اور بیماری سے نفع حاصل کیا جاتا تو پچھنے لگوانا بیماری سے نفع دیتا پھر تم سترہ تاریخ یا انیس تاریخ یا اکیس تاریخ کو پچھنے لگوایا کرو۔

حضرت محمد بن سیرین فرماتے ہیں : سب سے زیادہ نفع دینے والا پچھنا وہ ہے جو مہینہ ختم ہونے سے پہلے لگایا جائے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : سحری کھایا کرو کیونکہ سحری میں برکت ہوتی ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : آدمی حاملہ لونڈیوں سے وطی سے دور رہے جب تک وہ بچہ نہ جن دے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : مجھے ہدیہ کی ہوئی رحمت بنا کر بھیجا گیا ہے ۔

حضرت ابو ہریرہ رضی اللہ عنہ بیان کرتے ہیں : ایک مرتبہ نبی کریم صلی اللہ علیہ و الہ وسلم نے ہمیں ظہر یا عصر کی نماز پڑھائی اور دو رکعتوں کے بعد سلام پھیر دیا اور جلدی سے لوگوں کے درمیان سے چلے گئے ۔ لوگوں نے کہا : کیا نماز میں کمی کر دی گئی ہے ؟ لوگوں میں حضرت ابو بکر حضرت عمر رضی اللہ عنہ بھی تھے لیکن وہ آپ صلی اللہ علیہ و الہ وسلم سے بات کرنے سے ڈر رہے تھے اور جلدی سے لوگوں کے درمیان سے نکل گئے ۔ مسجد میں ایک لکڑی کا تنا تھا جس پر آپ صلی اللہ علیہ و الہ وسلم ٹیک لگا کر کھڑے ہوا کرتے تھے ، آپ صلی اللہ علیہ و الہ وسلم اس کے ساتھ کھڑے ہو گئے ۔ لوگوں میں ایک شخص تھا جس کو " ذو الیدین " کہا جاتا تھا اور اس کا یہ نام نبی کریم صلی اللہ علیہ و الہ وسلم نے رکھا تھا۔ اس نے عرض کیا : یا رسول اللہ صلی اللہ علیہ و الہ وسلم کی نماز چھوٹی ہو گئی ہے یا آپ بھول گئے ہیں ؟ آپ صلی اللہ علیہ و الہ وسلم نے فرمایا : نہ نماز کم ہوئی ہے اور نہ ہی میں بھولا ہوں ۔ پھر آپ صلی اللہ علیہ و الہ وسلم واپس تشریف لائے اور دو رکعتیں پڑھائیں اور اس میں پہلے کی طرح رکوع کیا یا اس سے کچھ لمبا کیا پھر دو سجدے کئے ۔

حضرت ابو ہریرہ رضی اللہ عنہ بیان کرتے ہیں کہ حضرت عمر بن خطاب رضی اللہ عنہ نے کہا : مجھے کسی بات پر کبھی ندامت نہیں ہوئی جو ندامت مجھے اس پر ہوئی کہ میں نے حضور صلی اللہ علیہ و الہ وسلم سے ہوا کے چلنے کی بابت سوال نہیں کیا۔ حضرت ابو ہریرہ رضی اللہ عنہ کہتے ہیں کہ میں نے آپ صلی اللہ علیہ و الہ وسلم سے ہوا کے بارے میں پوچھا تو آپ صلی اللہ علیہ و الہ وسلم نے فرمایا : یہ اللہ کی مہربانی سے چلتی ہے جس کو اللہ اپنی رحمت سے بھیجتا ہے اور اسے اپنے عذاب کے ساتھ بھی بھیجتا ہے ۔

حضرت ابو ہریرہ رضی اللہ عنہ بیان کرتے ہیں کہ انہوں نے نبی کریم صلی اللہ علیہ و الہ وسلم کو کھڑے ہو کر آب زمزم نوش فرماتے ہوئے دیکھا۔

حضرت حسن بصری رضی اللہ عنہ بیان کرتے ہیں کہ میں نے حضرت ابو ہریرہ رضی اللہ عنہ کو منبر رسول صلی اللہ علیہ و الہ وسلم پر خطبہ دیتے ہوئے سنا، آپ نے فرمایا کہ میں نے نبی کریم صلی اللہ علیہ و الہ وسلم کو فرماتے ہوئے سنا : قیامت کے دن اللہ تعالیٰ حضرت آدم علیہ السلام کے سامنے تین عذر بیان فرمائے گا۔ اللہ فرمائے گا : اے آدم ! اگر میں نے جھوٹوں پر لعنت کی ہوتی اور مجھے جھوٹ اور وعدہ خلافی ناپسند نہ ہوتی اور اس پر عذاب کا وعدہ نہ ہوتا تو آج تیری ساری اولاد پر رحم کرتا اس عذاب سے جو میں نے ان کے لئے تیار کر رکھا ہے ۔ لیکن میری بات حق ہے کہ اگر میری رسولوں کو جھٹلایا گیا اور میرے حکم کی نافرمانی کی گئی تو میں سارے جنوں اور انسانوں سے جہنم کو بھر دوں گا۔ اور اللہ تعالیٰ فرمائے گا : اے آدم ! جان لے کہ میں کسی کو جہنم میں داخل نہیں کروں گا اور نہ آگ کا عذاب دوں گا مگر اسے کہ جس کے بارے میں میں اپنے علم ازلی سے جانتا ہوں ک اگر میں اسے دوبارہ دنیا میں بھیجوں تو وہ دوبارہ انہی برائیوں میں مبتلا ہو جائے گا جن میں پہلے تھا۔ اور توبہ نہیں کرے گا۔ اور اللہ تعالیٰ فرمائے گا: اے آدم ! میں نے تجھے اپنے اور تیری اولاد کے درمیان منصف مقرر کر دیا ہے تو میزان کے پاس کھڑا ہو جا اور ان کے اعمال کو تولتے ہوئے دیکھ جس شخص کی برائیوں پر رائی کے دانے برابر بھی اس کی نیکیاں غالب آ جائیں ، اس کے لئے جنت ہے ۔ تاکہ تو نے جان جائے کہ میں صرف ظالم ہی کو جہنم میں ڈالا ہے ۔

حضرت ابو ہریرہ رضی اللہ عنہ بیان کرتے ہیں کہ حضرت ابو ذر غفاری رضی اللہ عنہ نے عرض کیا : یا رسول اللہ صلی اللہ علیہ و الہ وسلم مالدار لوگ ہم پر نیکیوں میں سبقت لے گئے ۔ وہ نماز تو ہماری طرح ہی پڑھتے ہیں اور روزے بھی ہماری طرح ہی رکھتے ہیں لیکن ان کے پاس مال و دولت کی کثرت ہے ( جس سے وہ صدقہ و خیرات کر کے اضافی اجر کما لیتے ہیں ) اور ہمارے پاس اتنا کچھ بھی نہیں کہ اس سے صدق کر سکیں ۔ آپ صلی اللہ علیہ و الہ وسلم نے فرمایا : اے ابو ذر ! کیا میں تمہیں ایسے کلمات نہ سکھا دوں جن کو پڑھنے سے تم سبقت لے جانے والوں کو پالو اور پیچھے رہ جانے والے تجھ تک نہ پہنچ سکیں سوائے ان کے جو تیرے جیسے عمل کریں ۔ عرض کیا : کیوں نہیں ! یا رسول اللہ صلی اللہ علیہ و الہ وسلم ؟ آپ صلی اللہ علیہ و الہ وسلم نے فرمایا : ہر نماز کے بعد تینتیس مرتبہ سبحان اللہ پڑھا کر اور ایک مرتبنہ یہ پڑھا کر " لا الہ الل اللہ و حدہ لا شریک لہ لہ الملک و لہ الحمد و ھو علی کل شیء قدیر " ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے فرمایا : جب تم میں سے کوئی اپنے بستر سے اٹھے تو اپنے ہاتھ وضو والے پانی میں نہ ڈالے جب تک کہ اپنے ہاتھوں کو تین مرتبہ دھو نہ لے کیونکہ اس کو معلوم نہیں ہے کہ اس کے ہاتھوں نے رات کہاں گزاری ہے ۔

حضرت ابو ہریرہ رضی اللہ عنہ فرماتے ہیں کہ حضور صلی اللہ علیہ و الہ وسلم نے دو لباس ، دو بیعتوں سے منع فرمایا اور ارشاد فرمایا : آدمی ایک کپڑا پہن کر نہ چلے اس حالت میں کہ اس کی شرمگاہ پر کوئی شی نہ ہو اور ایک کپڑا میں لپٹنے ، پھر اسے کندھے تک اٹھا لے اور بیع ملامسہ اورلقاء سے منع فرمایا ۔